سلام عليكم جيت نعاود لكم قصتي لوقعات ليا هادي 4 سنين تقريبا وهاد القصة غيرات شحال من حاجة فحياتي وقلباتها.. فيما لا شك فيه انو العنوان معجبكش اولاا خلااك تعطي مجموعة من تصورات والأفكار فدماغك على مضمون القصة وعطاك أحكام مسبقة على مضمون القصة ولكن سمح ليا نقولك بلي دوك التصورات ودوك الأفكار ودوك الفرضيات كلها خاطئة ولذلك خدهوم وخرجهم من دماغك وخليهم بعيد .. مزيان عطيني شويا من وقتك وخليني نعاود لك قصتي لتقدر تنفعك وتكون من أروع القصص لقريتي بمشيئة الله. انديك لصيف د 2013 ملي كانت عندي ديك 19 عام كنت داك لعام كنقرا فلافاك وقلت مع راسي هاد صيف انعطيها غي لتسركيل ونعاس انطهلاا فراسي ونخرج مع عشراني ونعيشو شويا الحياة را شباب غي مرحلة وكتفوت حمد الله ربي عطانا الفلوس ولواليد عندي خدام محامي ومخصنا تاخير حمد الله ...ماعلينا واحد نهار فصيف فقت مع 12 كالعادة ممولفش نفيق بكري وفقت غا حيت لواليدة صدعاتني بصوتها وهي كتعيط حسين حسين فيق را خاصك تفطر فيق خلاص را ظهر قرب يودن وناس شبعو فياق. فقت ومهضرتش ومخرجاتش من فمي ولو كلمة وحدة حيت كنفيف خاسر ومدردك نضت من فراشي مشيت غسلت وجهي نزلت عند الواليدة سلمت عليها وقلتلها صباح الخير كلست نفطر خدمت تلفازة وبقيت كنقلب وكنشقلب مبان ليا والو كاع القنوات حامضين مفيهم ميتشاف مهم نعدي بشي حاجة حتى نفطر وصاف حطات لواليدة لفطور فطرت نضت طلعت لبيتي قلت اشغندير اه نقسر شويا بلاي بينما يفوتني هاد العكز خدمت بلاي لعبت شويا مليتو تاهوا كلت مع راسي نعيط على شي دري ندوز معاه لوقت اااا تفكرت عشيري "خالد " هو لغنشد معاه ستون تاني وندوز معاه هاد نهار حيت عندو موطور نبيبي عليه ونقوليه يجي يدينا نتسركلو شويا ونهضرو مهم حليت فايسبوك دخلت لميساجات قلبت عليه سلمت عليه وزربت عليه قلتلو يجي يديني من باب دار نمشيو نضحكو ونشطو شويا مكاين ميدار الملل فدار. مهم جاوبني ضغيا بحكم انو واحد من المهوسين بالمواقع الإجتماعية نضت لبست حوايجي مشطت شعري ضربت ريحة قاديت حالتي سلمت على لواليدة ودرت ليكيت وهبطت نتسنا خالد يوصل تسنيتو واحد 10 دقائق تقريبا وجا وقف لموطور سلم عليا قاليا طلع طلعت تمينا غادين تاوصلنا لواحد لبلاصة قاليا اشبانلك نكلسو فشي قهوة ونهضرو شويا ؟ واخا سير عالله بالحق را بحال والو نرجع لدار واحد شويا حيت لواليدة وصاتني منتعطلش باش نتغداو مجموعين ..مهم ماعليناش وصلنا لقهوة كلسنا. خالد علاش منمشيوش لدار وتغدا عدنا هاد نهار .. لا لا احسين غا خلي لشي نهار اخر .. لا ليوما اشريكي تغدا معنا وتعرف على لواليدة را ديما كتقول ليا جيبو شي نهار يأكل معنا حيت كنعاود لها علك .. وخا لعجبك مهم را عندي لك واحد البلان واعر ابا حسين غا يجيب هاد ساط القهوة ونعاود لك .. اشمن بلان اخالد ياكما شي مونتيف تاني ؟ ههه والاا غا تهنا ايعجبك .. مهم سكتنا شويا وبدينا كنكتاشفو المكان بعينينا كنت كنشوف فالزبائن لكانو فديك القهوة والمحيط ديالها وفواحد اللحظة قطع واحد دري صمت وقال سلام عليكم وحط لينا القهوة بصحتكم .. الله يعطيها لك اخويا شكرا .يالاه اخالد غا القهوة ارا البلان نخلطوهوم.. وا المهم احسين اشبانلك هاد نهار نمشيو نقسرو شويا . لا مافيا ليلعب اخويا مليت لكورة لا فبلاي لا فالواقع . ولا اصاحبي اشمن كورة تانتا ونمشيو نقصرو دبصح اشريكي (وغمزني ودار ديك ضحيكة ديال راك فاهم ) اااااا ههه اوا قولها من صباح اوا لعجبك ولكن راك عارفني معنديش مع داكشي وعمرني جربتو .. واكلشي على حسابي مضرب لحساب لوالو ... [خالد هو عشيري قريت معاه هاد العام فلافاك وهو ماشي هنا غي نتاقلو وصاف وانا حاسبو بحال خويا ولا كثر واي بلان كندخل فيه معاه طولاا وعرضا واي حاجة خصاتو كنتعاون معها تا كيديرها ] ... وخا لعجبك ابا خالد اني معاك .. كلسنا واحد ساعة وربع تقريبا فديك القهوة وخرجنا رجعنا لدار وملي وصلنا لحدا باب دار خالد كيحاول يتهرب وكيقول ليا حسين غا سير اصاحبي تالشي نهار اخر ونجي لعدكم حق الله ... وتانزل اصاحبي راعادي غا تغدا معنا وسير فحالاتك مكلتش لك سكن معنا ولا شي لعبة وغا زعم را كاين غي انا ولواليدة ولواليد .. مهم دخلت خالد بزز من بعد ماقنعتو طلعنا دخلت عند الواليدة لكوزينة عرفتها بخالد وهضرو شويا دوك الخزعبلات ديال تعارف بلا مندكرهم حيت غتملو من المحادثات من بعد شديتو ودخلنا لبيت ضياف كلسنا وخالد حاول يدير فيها مأدب وقاليا واو احسين داركم زوينة .. ههههه بونجوغ واش نتا خالد لكنعرف اشطرا لمك عطيتو تصرفيقة خفيفة راكم عارفين ضحك ديال العشران ضحكن شويا وفواحد لحظة سمعت لواليد جاي قرصت خالد قلتلو تقاد وناض جمع رجليه وتقاد دخل لواليد نضت سلمت عليه وبست يدو مهضرش معيا عادي هوا ديما هكا .. شرت لخالد ناض سلم عليه .سلام عليكم اعمي سمح ليا ايلاا صدعناك انا خالد صديق ديال حسين كيقرا معيا ... الواليد اكتفى بصمت وشير بيدو زعما متشرفين [ لواليد ديالي من نهار عقلت على راسي وهو ديما فنفس الحالة ونفس المزاج هو من نوع ديال البنادم لكيبقا ساكت وعندو هبة وكريزما خاصة كيتحكم بيها وايلاا مشا تدوا تاواحد مكيعارضو لا فدار لا فزنقة لا فأي بلاصة خرا هو قاصح شويا بحكم انو محامي ومعندوش مع دوك التفاهات وداك تخربيق يلاا كان شي موضوع مهم غيهضر معاك فيه مكانش راهو ديما ساكت وانا ولفتو حيت با وكبرت معاه وكنحتارمو بزااف عمرني ماخسرت ليه خاطرو وتاهوا مكيدخلش بزااف فأموري حيت كيشوفني باقي صغير واقيلاا ] مهم دخلات الواليدة وقطعات الصمت حيت ملي دخل الواليد سكتنا ومبقيناش كنهضرو والواليد ماشي من داك نوع ديال يشوفك ساكت يجبد لك موضوع باش تهضرو لا هو تكلس معاه 24 ساعة يمكن مينطقش الاا يلاا كنتي شي صاحبو قديم وكنتو بوحدكم ماعليناش دخلاات الواليدة وحطات طاجين .. مرحبا والف مرحبا بك اخالد مالكم ساكتين خود راحتك دار دارك .. شكرا اخالتي ربي يخليك ! [ اتعطيوني شويا من وقتكم نهضر لكم على اغلى ما أملك فهاد دنيا وهي الحنانة الواليدة ديالي هي اعز ماعندي فهاد الدنيا وهي أم كباقي الأمهات المغربيات كتهتم بولادها وراجلها وباغا ليهم خير كباقي ناس لكتعرف ومعزيزش عليها صداع وصدقوني اطيب ما رأت عيني هي لواليدة ديالي الله يخليها ليا ] مهم قلنا بالسم الله وكيما كيقولو لا سلام على طعام... كلينا غسلنا . هضرت مع خالد سولتو واش باغي نعمرو شي كاس دأتاي .. واتا اشمن اتاي ولا قهوة يالاه نهضرو على البلان لقلت لك يالاه مشينا .. مشينا لواليدة هاني خارج .مشينا ركبت مع خالد وصلنا لواحد البلاصة خاوية شويا ومفيهاش ديور بزاف دخلنا لواحد درب تاهوا خاوي وقلتلو فين غادين اعشيري ؟ متخافش انوريك شي لعيبات ونرجعو .. فواحد اللحظة وقف نزلنا هز شي سوارت من جيبو وانا كنفكر اشغيدير هاد خالد ثاني واش عدهم شي دار هنا وعمرو مادوا ليا عليها ؟ هاد تساؤلات لفدماغي لقيت ليهم اجوبة من بعد ماحل خالد واحد الباب ودخلنا لواحد البيت تم فيها جوج ناموسية وطابلة وفلقنت كتبان ليا شيشة وطابلة عامرة بشي مكسرات (لوز.. حمص .. كركاع...) ضحكت وقلت ليه واش هاد البرتوش ديالك اخالد عمرك ماعاودتي ليا عليه ؟ لا ماشي ديالي ديال واحد صاحبي خلاا ليا سوارت مهم ليوما غنشطو وغندوزو ليلة مقودة اشريكي بلاتي ندخل الموطور ونهضرو .. هي هاديك مشيت كلست هزيت شي حمص بديت كنأكل فيه وكنشوف فديك شيشة وخا عمرني ماجربتها ولكن ديما كنت كنفكر فيها وكنفكر نجربها شي نهار وليوما هو اليوم الموعود واقيلاا.. ماعليناش دخل خالد قاليا حسين شوف عرفتي اشغانديرو ليوما اشريكي غنجيب جوج بنات وغنشطو ونديرو البلبالة هاد ليلة مكاين غا النشاط وزهو وشطيح ورديح و .. قاطعتو كيفاش اخالد اشمن بنات فين كتعرفهم ؟ وا غا عاهرات اصاحبي كنعرفهم هادي شحال ومتخافش را سلعة نقية ماشي داكشي لكتعرف لخنز وليجا يتكونكطا نن هاد جوج دريات خاصك تكون ضروري عندك العاقة وتكون من لكليان ديالهم وهما ماشي ديما كيديرو داكشي مي مرة مرة .. وخا واش كيقراو ولا كبيرات فلعمر ؟ ولاا اصاحبي را كلت لك دريات صغيرات اصاحبي 20 عام تقريبا بحالنا كيقراو فا لافاك ومتخافش اشريكي كولشي غيدوز مزيان وغنشطو ليوما .. مقتانعتش بهادشي لقالو ليا خالد فديك لحظة فكرت فشحال من حاجة اولاا فدوك دريات كيفاش دريات د 19 ولا 20 عام كيمارسو الدعارة وباقين كيقراو مفهمتش هاد نقطة بضبط مبغاتش تحيد ليا من بالي حيت صعيبة شويا درية باقي عندها مستقبل وباقين عندها وليديها وعائلتها تلتجأ لدعارة من أجل لفلوس حيت متأكد ماشي من أجل المتعة ولا داكشي مهم سهيت شويا وبديت كنفكر وبدا خالد كيزعزعني واحسين حسين مالك اصاحبي شوف هاك هاد شيشة شد بيها ستون حتى نرجع شحال دبا فساعة ؟ جبدت طيلي لقيت 17:50 .. اه مزيان شوف حسين كيما قلت لك خود راحتك خود شيشة ولا لعجبك انا انمشي نجيب دريات ونرجع مع ديك 18:30 ولا 19:00 انكون معاك واشوف عارفك معدكش مع هادشي مي حاول اصاحبي تجرب اي حاجة بحال كاع دراري .. زرع فيا خالد شجاعة وخرج وخلاني بوحدي فالبيت شديت طيلي فكرت لواليدة اه بلاتي نتهناو بعدا من بلان مالين دار تاصلت بالواليدة وقلت ليها ميتسناونيش لعشا حيت غنعس مع خالد فدارهم ولواليدة تفهمات وقالت ليا واخا .. تهنيت شعلت شي مزيكا وقربت شيشة وبديت كنتشيش وكنتمزك وكنغني فنفس الوقت على ايقاعات بلال وكنحرك راسي وقلت فنفسي هاد نهار كيما قال ليا خالد انجرب بحال كاع دراري نعيش الحياة ونشط شويا مي ديك الفكرة ديال نزني مدخلاتش ليا لراسي وخا خالد ايحسبني ماشي راجل ايلاا جاب الدرية تالبين يديا ومدرت ليها والو مي ميمكنش نضيع حياتي على قبل نضرة ديال بنادم بقيت كنفكر وكنفكر حتى تاخدت واحد القرر نهائي قلت مع راسي ميمكنش ومغنديرهاش حيت ربي غايحاسبني ومغنخاطرش بديني وأخرتي من أجل رعشة جنسية مدتها لا تتجاوز دقيقة.. لا انا ماشي حيوان يتحكمو فيا شهواتي تأخدت قراري وسكت بقيت كنتشيش حتى سمعت صوت ساروت كيحل الباب فواحد لحظة سمعت خالد عيط عليا حسين .. وي خالد جيتي .. اه اه جيت وجبت معيا واحد جوج بنيتات نأكلهم فالعشا هههه .. مرحبا دخلو .. ههه مالك زربان احسين يالاه البنيتات دخلو . ماعليناش دخلو دريات دخلات لولاا ترمات عليا و سلمات بوجهها بخير هانية الى اخره ومن بعد جات درية لخرا سلمات عليا غا بيدها وصوتها ناقص شويا يعني مزاعماش ومكتهضرش عادي بالعكس حشمانة وصوتها ناقص بزااف بسبب الحشمة يمكن.. مهم سلمت عليها وكلسو دريات وجا خالد .. حسين مهم نعرفك بهاد الحاسنوات غي قالها وهي ضحك درية لولا قهقهقهقههقهقه داك ضحك الباس ديال العاهراة يخ تفووو كرهتها فديك لحظة مهم لا يهم هادي احسين سلوى داكشي ديال لهيه كلشي واقف .. متشرفين .. وهادي لخرا لمياء قلب الحليب كيما سميتها انا وناري اعشيري شوف الفرماج دهولندا ههه .. متشرفين قلت انا ودرية حشمات ومضحكات ماوالو لخرا سلوى لفيها لفارة غي ضاحكة ولابسا الميني وملي دخلاات وهي كتقرب مني وكدير يديها على رجلي فواحد لحظة خدات مني شيشة وبدات كتشيش وخالد مشا طلع لفوق معرفتش علاياش كيقلب انا مرتاحيتش لهاد سلوى بتاتا حيت معزيزش عليا هاد نوع ديال بنادم مهم بدات كتشيش وكتبخ عليا دخان وكضحك انا تجاهلتها وفواحد لحظة عطاتها ل لمياء زعما قالت لها هاكي تشيشي وهي رفضات مبغاتش تشدها... حرت انا فديك لحظة .كيفاش بلان هاد درية ملي دخلات سلمات عليا غا بيدها عكس هاد سلوى تلاحت عليا بالبوسان ودبا تاني مبغاتش تشيش مهم ماشي سوقي الله يخرج هاد ليلة بخير وصاف ماعليناش هبط خالد وجاب معاه 4 دكيسان وجاب بيرات وشي لعبات اخرين ..ليوما انشطو ونشطحو وكلشي مالك احسين كتبان ليا ساهي هههه نشط اصاحبي وورق ليا على طرف لحداك .. مجاوبتوش وكتافيت بالإبتسامة وصاف وديك سلوى دايرا يدها فوق رجلي كتلعب بصباعها فوق رجلي مكرهتش نضرب ديلمها نلصقها مع الحيط.. كيفاش البلان دخالد فالأول غا شيشة ودبا جاب شراب لا هادشي ممسلكنيش كون غي مزربتش ومشيت لدارنا من الأول ماعليناش خالد طلق الموسيقى وعمر الكيسان وخدا ديالو وسلوى خدات ديالها وبداو كيشربو انا مبغيتش نأخد قاليا خالد غا زعم وجرب ولكن مبغيتش والغريب فهادشي كلو حتى لمياء مبغاتش تأخد بزز عليها خالد تأخدو ولكن مشرباتوش غا خلاتو فيدها وصاف مهم خالد وسلوى بداو كيشربو كيشربو كأسو بكاسها كاسو بكاسها حتى ولاو فسما. كنا كنهضرو على شي مواضيع بحال دراسة و العطلة وداك تخربيق كنسولو فبعضيتنا وصاف .ملي شبعو شراب سلوى وخالد ناضو كيشطحو وكيلعبو وسلوى بدات كضرب بلحمها وكتمشي وكتجي وجرات معها لمياء باش تشطح تاهي مي وخا ناضت مكتشطحش من نيتها غا كتمشى وصاف تعجبت من ديك البنت حق الله كيفاش بلانها ياك عارفا علاش جايا وعلاش جابهم خالد مي رغم ذلك متقبلااتش اولاا مبغاتش تندامج مع الواقع مهم وصلات 2:00 وخالد عيا من شطيح وضحك ونشاط جا عندي تكا عليا وفمو خانز بشراب .. حسين تدي سلوى ولا لمياء ؟ قالها ليا فودني مي بجهد سمعاتو لمياء ودارت فيا شي شوفات د شي بنت فعمرها 3 سنين خايفة من باها يضربها بحالاا كتقول ليا عاوني اولاا ختارني انا .. حرت وخا انا تأخدت قراري ومغنتراجعش عليه فكرت شويا وشفت فلمياء للمرة الثانية وقلتلو انأخد لمياء .. ضحك هههه مسخوط نتا احسين مهم شوف انا انطلع لفوق ونتا بقا هنا وفصباح ملي تفيق فيقني معاك يالاا طهلاا ليا فلمياء (قالها وغمزني ) مشا خالد طلع مع سلوى لبيت لفلفوق ولمياء بقات معيا باقا واقفة قلت ليها كلسي .. كلسات وحشمانة مبغاتش تهضر اشغنقول لكم درية كتبان ضريفة وماشي ديال هادشي كتبان درية مثقفة وحشومية كدخل لخاطر وربي عطها حقها من زين معرفتش انا لبلان ديال هاد البنت وكيفاش حتى طاحت فهاد دومين .. ولا هادو غي الااعيب شيطانية ديال البنات حيت زعما عرفات بلي انا مغندير معها والو وقالت ليا قبيلة وخا غا بعينها "ختارني" حيت مفيها ليدير شي حاجة هاد ليلة. ولا هي ديما هكا. ولا كيفاش. مفهمتش انا راسي كيضرني وعينيا بغاو يتسدو ليا مي قلت مع راسي علاش منجبدش لهضرة معها ونشوف سر لمخبيا هاد البنت وكون كانت كدير معيا هاد تحرميات غا بوحدي علاش مزعمش عليها خالد بحال لخرا حيت عمرو ماتقرب منها ولا قاسها بالعكس غي كيهضر معها مرة مرة معرفتش معرفتش حرت دماغي غيتطرطق بتفكير فواحد لحظة زعمت وهضرت معها . انا : لمياء مجاكش نعاس ؟ لمياء : لا مافياش انا: شوفي اشبانلك نهضرو شويا وحيدي دوك الأفكار لفبالك انا اصلاا مغندير معاك والو هاد ليلة غا نساي لمياء : وخا نهضرو انا : شوفي ديريني بحال باك انا را مكنشوفش فك ديك شوفة ولا شي لعبة خرا انا كتباني ليا انا كتباني ليا درية عادية وضريفة ماشي ديال هادشي ديريني بحال باك وعاودي ليا كلشي [فالواقع كنحس براسي فديك اللحظة زربت عليها بهاد السؤال حيث ميمكنش شيواحد سواء بنت ولا دري يالاه تعرفتي عليه يعاود لك قصة ديالو حياتو فالبلاصة ] مهم درية سكتات شويا وفواحد اللحظة هزيت عينيا نشوف فيها لقيتها كتبكي ودموعها كيسيلو قلت ليها مالك ا لمياء واش كلت لك شي حاجة ماشي هي هاديك ؟ سمحي ليا انا بغيت غا نعرف قصتك وصاف حيت دخلتي ليا لخاطري ومبغيتكش تعدبي كثر من هكا .. سكتات شويا ومسحات عينيها ..لا احسين ماكلتي والو غا فكرتيني فلواليد ديالي الله يرحمو وبدات كتبكي ثاني .. انا بقات فيا هاد البنت حق الله معرفتش واش غي دموع تماسيح وبغات ديرها بيا حيت شافتني نية ولا داويا من نيتها ودوك دموع خارجين من قلبها .. مهم بقيت ساهي كنفكر وهي ناضت تنعس وباقا كتبكي واقيلاا فكرتها فباها وفشي حاجة ألمتها فضميرها ماعليناش دازت ديك ليلة وانا نعست غا بزز حيت بقيت كنفكر وكنشوف فلمياء ناعسة كتبان بحال شي ملاك اول مرة نشوف شي وحدة فهاد دومين بحال هكا درية دخلات ليا لخاطري وهكا غنكون اول واحد تعرفتي عليه عجباتو عاهرة بهاد تعبير "اول واحد تعرفتي عليه فحياتك أحب عاهرة " هو انا .. مهم فقت فصباح طلعت فيقت خالد لقيت لبيت فحالة بلاا مندكرها هبطت فيقت لمياء لبسات حوايجها قلتلها طهلاي انا غنمشي .. وخا طهلاا فراسك احسين .. هزيت حوايجي وطيلي ديالي وخرجت كنقلب على شي طاكسي وخليت خالد مع دريات منعرف واش ايوصلهم لدار ولا اشغيدير مكيهمنيش بغيت غا نمشي نرتاح شويا حيت فقت مدردك شديت طاكسي بحكم المسافة بعيدة شويا وصلت لدار لقيت لواليدة موجدة لفطور سلمت عليها قالت ليا كلس تفطر احسين مالك منشطش كيف ديما ياك لباس ؟ لا امي مكاين والو غا البارح منعسناش بكري وصاف مبغيتش نفطر غا صحة انمشي لبيتي .. طلعت لبيتي تكيت وبديت كنفكر فلبلان د ديك درية ثاني مبغاتش تخرج ليا من بالي قلت حتا نفيق ولا تالغدا ونسول خالد هو لغيعرف علها كلشي .. ضربتها بنعسة مفقت تال 14:00 فقت غسلت وجهي سمعت لواليد كيعيط عليا مشيت عندو سولني فين كنت البارح وقلتلو عند خالد نعست معاه انا وشي دراري ..ومالك ناعس تالهاد الوقت ؟ لا غي البارح سهرنا شويا حيت جابو شي افلام جداد وتفرجنا فهم .. لواليد سكت وانا مشيت معرفتش واش شك فيا منعستش عند خالد فدارهم ولا كيفاش مهم مشيت لبيتي كلت نعيط لخالد نتشاوفو ومنها نيت نهضرو على لمياء ويشرح ليا اشواقع ليها مهم تاصلت بيه ولقيتو باقي ناعس وتافقنا نتلاقاو فواحد القهيوة قريبة من دارنا شويا ماعليناش لبست حوايجي وخرجت وصلت قبل منو لقهوة طلبت عاصير وكلست تسنيتو تقريبا واحد 15 دقيقة واخيرا جا سلم عليا كلس . انا : يالاه فقتي اخالد ؟ خالد : اه فيقاتني طيلي ملي بيبيتي عليا انا : اه مزيان تانا نيت يالاه فقت قولي اشدرتي باقي فصباح وصلتي دريات خالد : اه وصلتهم .. شريكي جيب شي قهوة ! انا : وصلتي لمياء تاهيا ياك ؟ خالد : هههه مالك اصاحبي وايلي متقولش ليا عجباتك الخدمة دالبارح انا : والاا صراحة بغيت نسولك شي أسئلة على ديك البنت .. قوليا منين تعرفتي عليها وفين كتسكن و واش كتعرف عائلتها ؟ خالد : اوا ديك البنت مكنعرفش عليها بزاف مهم تعرفت عليها هادي شهرين تقريبا تعرفت على سلوى هي الأولى وعرفاتني بيها من بعد بالنسبة لعائلتهم مكنعرفهمش هي اصلاا ساكنة مع سلوى فواحد دار كاريها .. وقوليا مالك كتسول عليها واش بغيتي نعاودو لداكشي دلبارح شي نهار اخر ؟ انا : والاا اصاحبي ديك درية فشكل منعرف مالها واش مكتبانش لك ضريفة وحشومية ؟ خالد : واييه حشومية ومعندهاش مع الهضرة بزااف وحتى نشاط مهم كتبقا عاهرة راك عارف انا : سكت وبقات ديك لهضرة ديال خالد كتعاود ليا فدماغي " مهم كتبقا عاهرة راك عارف " وفكرت فهضرتو وقلت مع راسي مالي انا فأخر يامي نهتم بعاهرة ونقلب على ماضيها بفف من الأحسن نسى هاد الموضوع ولكن فديك لحظة بضبط طاحت ليا تصويرتها فبالي وهي دايرا فيا دوك شوفات دالبارح وعينيها عامرين أحزان وألم حرت معرفتش اشندير وفواحد لحظة قلت لخالد : عشيري عندك نمرتها ؟ معرفتش علاش وكيفاش حتى قلت هاد الهضرة . خالد : هههههه راك ماعجبنيش ا لعفريت مهم يلاا كنتي غدير شي حاجة علمني نشاركوك نشاط بحال البارح هاك قيد 06.......... قيدت نمرة وهضرنا انا وخالد شويا وضحكنا وخا داك لموضوع شاغل ليا بالي مي حاولت منبينش لخالد بلي كنفكر بزاف فديك لبنت .. مهم وصلات ديك 17:30 تفرقنا ورجعت انا لدرنا وفطريق تلاقيت مع واحد دري كنقرا معاه سميتو "امين " سلم عليا بخير هاني وكدا قاليا على واحد Cd كان عطاه ليا هادي سيمانة فيه شي لعيبات بغيتهم لبيسي كلتليه بلي غنرجعو ليه غدا حيت تمحى ليا من بالي هاد اليومين نسيت كلشي وكنفكر غا فلمياء غا الله يخرج هاد طرح بسلام وصاف وصلت لدار طلعت نيشان لبيتي خرجت تيلفون حطيت صبعي على نمرة د لمياء منعرف منعرف واش نعيط ولا منعيطش والله تانعيط ليبغا يوقع يوقع بدات طيلي كتصوني طيط طيط طيط الو .. الو لمياء . الو شكون معيا ؟ انا حسين .. شكون حسين ؟ . سكت شويا حيت هاد صوت جاني غريب وماشي ديال لمياء خفت تكون لواليدة ديالها ولا شي وحدا من عائلتها وندير لها مشاكيل .. الو الو الو .. قطعت ولحت تيليفون قلت نخليها تا ليل ونعاود نعيط . نضت شعلت بلاي قلت ندوز لوقت شويا ومنها نيت نسا الموضوع بديت كنلعب وفواحد لحظة سمعت طيلي كيصوني وقفت لعب هزيتو لقيت لمياء هي لكتعيط . انا : الو الو حسين قهققهقهقهقه يالاه عرفتك سمح ليا انا : (هاد ضحكة مغريباش عليا) .. واش هادي لمياء ؟ هقهقهقه لا هادي سلوى انا : (سبحنا عالله ) اه وخا سمحي ليا كنت باغي نهضر مع لمياء سلوى : لمياء ناعسة دبا خلي تاتفيق ونقوليها تعاود تصوني علك .. قهههققهقه وخا تقول ليا لاش باغيها ؟ انا : والو والو غا قولي لها تصوني ملي تفيق سلوى : وخا موااااح طهلا انا : طهلاي بقيت كنفكر سبحان الله شوف الفرق بين سلوى ولمياء وخا هي عايشة معها فنفس دار مي هي مفيهاش تنقاز وتبرهيش..والحاجة لمبغاتش دخل ليا لدماغي علاش كاين هاد الفرق شاسع بينها وبين سلوى وهي باقا عايشة معها ومتبعها فطريق الدعارة والتخربيق واش حيت هي باغا نيت هاد طريق ولا غي لعبات ليها بعقلها تاوقعاتها ولا كيفاش.. بديت تاني كنفكر مي مطولتش قلت مع راسي خلي حتى تهضر معيا ونسولها ونحرر هاد الشك وهاد الأفكار لفدماغي .وصل وقت العشا هبطت نتعشا وكيف العادة طابلة ضاير بيها انا ولواليد والواليدة والصمت سيد المكان تاواحد مكيهضر كيف العادة مهم فواحد لحظة قالت ليا الواليدة واش تيليفونك كيصوني ؟ منعرف بلاتي نشوف قلبت جيوبي وتفكرت بلي خليتو فالبيت نضت طلعت لبت وفعلاا لقيتو كيصوني لقيت نمرة ديال لمياء ..ياربي متكونش سلوى ياربي تكون لمياء يا ربي .. قبلت المكالمة والحمد الله سمعت واحد صوت حنين زعزع اوتار دقلبي ولعب بيهم .. الوو حسين . خرجات سميتي من فمها بنكهة العسل وبقوة الصدمة سكت شويا بلعاني باش نعاود نسمع سميتي من فمها .. الوو حسين واش كتسمعني .. الو لمياء اه كنسمعك لمياء : كيداير بخير بعدا كلشي مزيان ؟ انا : بخير حمد الله ونتي صافا ؟ لمياء : بخير .. قالت ليا سلوى نتاصل بك واش باغين فشي حاجة ؟ (قالتها بصوت ماشي هو هداك صوت متردد معرفتش واش خافت نقولها شي حاجة على شي ليلة خرا ولا كيفاش ) انا : لا لا مابغيت والو غا بغيت نهضر معاك وصاف لمياء : ااااه واخا انا : وخا تعطيني 5 دقائق من وقتك ؟ لمياء : مرحبا حسين هاني كنسمعك انا : (معرفتش واش نصارحها بكلشي ولا غي نتدرج معها شويا بشويا مهم زعمت وهضرت ) مهم لمياء منخبي علك والو نتي من اول مرة شفتك دخلتي ليا لخاطري صراحة وحسيت بشي حاجة تجاهك وبغيت نزيد نتعرف علك يلاا كان ممكن ! لمياء : تانا داك نهار فاش شفتك وخا مكانش شي مكان مزيان لي يكون فيه اول لقاء مي تانتا عجبتيني حيت دري ضريف وكتفكر فكلشي ومكتهورش انا : وخا نتلاقاو غدا يلاا عندك شي وقت خاوي بغيت نتلاقاو ونتعرف علك كثر لمياء : منعرف احسين من الأفضل متعرفش على ناس بحالي والله قلب على دراري ودريات يصلاحو لك اما انا راك عارف (قالتها بصوت حزين ) انا : لا لا شوفي انا بغيت نتعرف علك وصراحة دخلتي ليا لخاطري .. شوفي انتلاقاو ف قهوة المسيرة كتعرفيها ؟ لمياء : وخا كنعرفها اشمن وقت ؟ انا : نتلاقاو غدا مع ديك 16:00 مي اجي غا بوحدك لمياء : وخا ان شاء الله قطعات طيلي وانا فرحت متصوروش الفرحة لحسيت بيها حيت واخيرا غنكلس معها وغنهضرو وخا غي يومين باش تعرفت عليها مي شغلاات ليا راسي وحسيت براسي كنعرفها هادي شحال ... بالتأكيد كتفكر دبا كيفاش هاد الأخ كتعجبو عاهرة ؟ كيفاش بلان هاد الأخ واش طاح فشبكة ؟ واش يمكن يكون الحق عند حسين وتكون هاد البنت غي تلاحت لداك دومين بزز عليها ؟ ولا حسين غيتدمر ملي غيعرف بلي لمياء عاهرة وبوراقها ؟ بتأكيد شحال من سؤال دبا كيضور لك فراسك وتانا ديك ليلة كنت بحالك كنفكر واش هاد طريق لأنا فيها صحيحة واش كان عليا نتعرف على هاد لبنت ولا لا واش نمشي غدا ونتلقا بيها ولا نسحاب بهدوء ونسا ديك البنت .. مهم بقيت كنفكر اشغنقول ليها واشغندير غدا ومنعست تا لوقت متأخر فليل .. فالغد فقت وحليت عينيا ولحت يدي كنقلب على طيلي نشوف شحال ساعة هزيت تيليفون لقيت 15:30 ناري وانا داير معها 16:00 فقت بزربة غسلت وجهي ولبست حوايجي بزربة وهبطت لتحت لقيت لواليدة سولتها علاش مفيقاتنيش لفطور قالت ليا بلي كلت ليها مبغيتوش وخلااتني على خاطري وخا انا معقلتش مهم خرجت بزربة وقلت مع راسي مغنوصلش فلوقت يلاا مشيت على رجليا بلاتي نشوف اسامة واش كاين فدارهم يعطيني بيكالتو [ أسامة ولد درب خويا لمولداتوش ليا مي اي حاجة بغيتها كيعطيها ليا بلاا ادنى اعتراض وديما كيحاول يعاوني فأي حاجة وخا هو كبير عليا مي دايرني بحال خوه صغير ] معرفتش
واش انلقاه حيت كانو مسافرين مي واقيلاا ايرجعو .. ماعليناش مشيت دقيت مرة الأولى لمرة الثانية سمعت شكون .. قريب ..طلاات لواليدة ديالو من شرجم .. خالتي كاين اسامة ؟ .. بلاتي نعيط عليه .. تسنيت شويا وهو يطل عليا . حسين بلاتي بلاتي نهبط . هبط سلم عليا كيداير هاني بخير الى غير ذلك ... قلتلو على سلامتك وطلبت منو لبيكالة وخرجها ليا وسلمت عليه ومشيت وملي وصلت حطيت لبكالة فواحد البلاصة حدا القهوة ودخلت كنقلب على لمياء وسط الوجوه كنشوف هنا ولهيه وفواحد لحضة ضرت ولقيتها فواحد لقنت كضرب ليا بيديها فرحت وابتسمت ليها ومقدرتش نحيد فيها عينيا واناري لمياء تزينات وقادات حالتها معرفتش واش زيانت فيومين ولا غي داك نهار كنت مبوق بشيشة وشراب ومشفتهاش مزيان مهم ماعليناش مشيت عندها سلمت عليها وكلست .. انا : لمياء ياكما تعطلت علك ؟ لمياء : لا انا نيت يالاه جيت انا : وخا شكرا حيت جيتي .. اشغتشربي ؟ لمياء : لعجبك احسين انا : طلبت لها عصير وانا شديت قهوة كحلة يالاه فقت نقاد بيها لمزاج .. مهم لمياء عرفتي علاش قلتلك نتلاقاو ؟ لمياء : قلتي ليا بغيتي تعرف عليا كثر انا : اه تماما بغيت نعرف علك شحال من حاجة يلاا سمحتي ليا حيت دخلتي ليا لخاطري والله مهم انا غنعفيكم من ديك المحادثة المملة وغنخرج لكم بخلاصة لداكشي لقالت ليا لمياء .. مهم بقيت كنسول فيها وهي كتجاوب وكالت ليا بلي هي من عائلة فقيرة وباها مات ملي كانت صغيرة تقريبا 15 عام ومها مريضة بمرض خايب مكتقدرش تنوض من بلاصتها وبلي عائلتها كلها تخلااو عليها سواء عمامها ولا خوالها وهي بوحدها معندها لا خوت لا والو ودبا هي عايشة مع سلوى و مها خلاتها فدار العجزة وكتزورها مرة مرة وتشجعت وسولتها علاش خدات ديك طريق ديال الدعارة.. وصراحة داك نهار طاحت دمعة من عينيا ملي كانت كتعاود ليا كانت كتبكي و كتقول ليا .. اشبغيتيني ندير احسين وانا باقا صغيرة وبغيت نكمل قرايتي ونعيش بحالي بحال كاع ناس اشبغيتيني ندير وعائلتي كلها تخلات عليا وليمشيت عندو كيلوحني لزنقة اشبغيتيني ندير ومي مسكينة مريضة وانا لمكلفة بيها وكنشري لها دواء اشبغيتيني ندير وانا بوحدي لهازة ثقل كولو لا حنين لا رحيم يشوف فيا ويعاوني تاواحد معاوني وخا غي بكلمة كلهم تخلااو عليا وبقيت بوحدي مليوحة فزنقة حتى دارنا لكانت غتسترنا داها لينا عمي ولاحنا لزنقة انا ومي . اول مرة فحياتي تبكيني بنت .. سولتها على دار كيفاش تا خداها لهم عمهم وقالت ليا بلي كانو مجموعين فيها يعني جوج عائلات وملي مات بها لاحهوم لزنقة وخدها بوحدو وقلتلها علاش ملتجأتوش لقضاء ولقانون وكالت ليا بلي عمها كيهددها بالقتل يلاا مشات وعودات شي حاجة لمحكمة. اشمن نوع ديال الإنسان هو هاد شخص لتخلاا على بنت خوه ليكان خاصو يرعاها ويكبرها ويوفر لها ضروف باش تقرا وتوصل ويديرها بحال بنتو مي هو لا لاحها لزنقة هي ومامها وخلاهم يعانيو من شحال من حاجة.. داك نهار لمياء خوات داكشي لكانت هزاه فقلبها وبكات شي بكا ديال دراري صغار وبقات كطلب فيا باش منعودش داكشي لتواحد وقالت ليا بلي تا انا دخلت ليها لخاطرها داكشي لاش عاودات ليا كلشي مهم من بعد ما عرفت كلشي كلسنا شويا وانا كنحاول نهدنها وكنقول لها انا معاك ..قالت ليا شكرا على كلشي ومشات حيت قالت ليا غتمشي داك نهار تشوف لواليدة ديالها وتشوف ياكما خاصها شي حاجة مشات تخرج وانا نعيط عليها وجبدت بزضامي وعطيتها واحد 200 درهم كانت عندي وقلت لها تشري بيهم شي حاجة لواليدة ديالها وتسلم عليها فالأول مبغاتش تأخدهم مي بززت عليها وخداتهم ومشات. بقيت كالس فالقهوة مصدوم من كاع داكشي لقالتو ليا لمياء ودبا تأكدت بلي هاد البنت ضريفة وزوينة وغي ضروف وولاد الحرام لخلااوها تمشي فداك طريق باش توفر لراسها لفلوس وتعاون لواليدة ديالها تاهي وتوفر ليها الدوا حيت مريضة من بعد ما تسدو عليها كاع البيبان يمكن تعرفات على ديك سلوى وبدات كتمشي معها لدوك لقصرات وداك تخربيق ماشي مهم الأهم دبا هو أني تعرفت على الماضي ديال هاد البنت وخاصني نعونها ونخرجها من ديك دوامة لداخلاا فيها .شربت قهوتي حطيت الخلاص فوق الطابلة خرجت هزيت بيكالة ورجعت لدار فرحان حيت عرفت الحقيقة ديال لمياء لدخلات ليا لقلبي مهم دازو ليام وبقينا كنهضرو فتيلفون وتعلقت بيها وكنحاول نتقرب منها كثر ومرة مرة كنتلقاو و واحد النهار قلت مع راسي انجبد معها تاني نفس الموضوع ونسولها كيفاش تا تعرفات على سلمى وداكشي لوقع نيت واحد نهار فليل ايكون دازو شي 20 يوم على داك نهار ديال القهوة .. كنت كنهضر معها فتيليقون وسولتها.. لمياء كيفاش تاتعرفتي على سلوى واشكتجيك ؟ . سكتات شويا وانا نقول لها تاني يلاا مبغيتيش تهضري فداك لموضوع صافي بلاش.. لا احسين نتا عزيز وغنصارحك بكلشي سلوى صاحبتي كتقرا معيا وفاش مات لواليد الله يرحمو دازت عامين تقريبا ولاحنا عمي لزنقة انا ولواليدة وسلوى عاودت ليها اشواقع ليا وقتارحات عليا نجي قتارحات عليا نجي نسكن معها فدارهم حيت هي ساكنة بوحدها مع ماماها وباها كيكون فالخارج كيجي مرة فالعام مهم هي عاودات لواليدة ديالها كلشي وستقبلاتني فدارهم مي الواليدة ديالي خلينها فدار العجزة حيت حالتها صعيبة شويا ومكاين ليقبلها وخا مبغيتش نخليها تم مي اشغندير انا خاصني نكمل قرايتي باش نعاونها فالمستقبل .. دوزت معاهم عام ولكن وقع واحد المشكل ثاني هو لقلب ليا حياتي رأسا على عقب سلوى واحد نهار مشات مع واحد دري لدارهم وضحك عليها وضيع ليها مستقبلها البنت فقدات عدريتها مع داك دري حيت على ماعودات ليا ضحك عليها وعطاها شي حاجة فعصير ودار بيها مبغا مهم ملي عرفات لواليدة ديال سلوى خبرات باباها وجا من فرنسا وعطها قتلة ديال العصا وهو مبغاش يتيقها بلي هو لغتصبها بقا كيضرب فيها وكيعايرها وفلخر نكرها وخرجها من حياتو ولاحها لزنقة قالها مانتي بنتي مانا باك وملي لاحها باها تانا لاحو ليا حوايجي ومشينا عند واحد درية خرا كتعرفها سلوى وهنا فين تعرفات سلوى تاهي على شي بنات سوء وخرجوها عا طريق حيت دوك دريات كل وحدا وقصتها وتجمعو وكراو واحد دار وتانا كنت معاهم وكان من ضروري ندير اي حاجة على قبل نعيش ونوفر لراسي لقمة ديال العيش وخا فالأول مبغيتش ندير داكشي لكيديرو مي مع الوقت تفهمت بلي اديك هي طريقة الوحيدة باش نبقا فقرايتي ونبقا فهاد الدنيا واديك هي طريقة الوحيدة باش نوفر لواليدة ديال فلوس د دوا.. غيجيك هادشي لكنقولك غريب احسين مي انا مبغيتش ديك طريق ولكن معندي تا بديل حيت كاع البيبان تسدو فوجهي وحتى سلوى ولاات بحالي باها نكرها وسمح فيها على قبل غلاط ماشي ديالها .. ولواليدة ديالي ملي كنمشي عدها وخا هي مكتهضرش مي انا باقا كنقول ليها عايشة مع سلوى فدارهم غي باش متقلقش وانا ربي لعالم بيا وهوا بوحدوا لعالم اشكاين فقلبي بدات كتبكي ثاني وانا كنهدنها وطلبات مني نسمح ليها حيت اتقطع .. قطعات وخليتها على خاطرها حتى وكان تهدن وتنسا المهم عندي هو نبقا ديما معها ونعاونها من بعد ما عاودات ليا كلشي زاد حبها فقلبي وميمكنش ندوز نهار واحد بلا منهضر معها مهم خالد دوك ليمات مبقاش كيبان وحتى تيليفون طافيه معرفتش واش سافر ولا خدام مهم خليتو على خاطرو اصلاا العطلة قريبة تسالي ودبا يبان ونمشيو نقراو .. ماعليناش دازو ليام ونديكم لواحد نهار بضبط كان نهار ثلات تلاقيت مع لمياء فواحد جردة وهضرنا شويا وقلتلها بلي باغي نشوف لواليدة ديالها ونتعرف عليها مقالتش ليا لا مي قالت ليا واخا مي مغيعجبكش حالها احسين شديتها وعنقتها وقلت ليها دبا حنا بجوج غنديرو يد فيد وغنديرو لفجهدنا باش تبرا ..مشينا شدينا طاكسي ومشينا لدار لعجزة نزلنا وبقيت تابع لمياء ودخلنا وبقيت غي تابعها تاوصلنا لواحد لبيت دخلات ولقينا واحد سيدة ناعسة ففراشها مشات لمياء باست يديها وانا دخلت سلامت عليها وبست يدها وبالطبع هادي لواليدة ديال لمياء.. مرا ايكون عدها ديك 65 عام تقريبا ومريضة بشلال مكتحرك تاجزء من داتها مهم عرفاتني عليها وبدات كتهضر معها هادا حسين امي لكنت ديما كنهضر لك عليه وكدا وكدا مهم بقينا داوين معها وواعتها بلي غندير لفجهدي باش تبرا وهزيت شي بركة درتها فواحد جوا من جيبي وعطيتها لها ولمياء هزاتو ورجعاتو ليا مبغاتش نعطيها لها مي انا قنعتها وخليتو للمياء وقلت لواليدة ديالها .. عمتي ها شي بركة غنخليها عند بنتك باش توفر لك الدوا ولبس وكولشي من اليوم عتابريني بحال ولدك وغنعاونكم فكلشي وكنشوف فعينيها كتبان ليا حزينة بزاف. فصراحة بقات فيا ديك سيدة بزااف وحسيت بيها كتعاني حيت ماشي ساهل تكون متكي فبلاصة وحدا وكتشوف غا فمشهد واحد نهار كامل الله يكون فالعوان والله يشافي الجميع خرجنا انا ولمياء من بعد ما سلمنا على لواليدة ديالها وملي خرجنا بقات لمياء كتشوف وكتشكرني وشدات ليا فيدي وحسيت براحة نفسية حيت لأول مرة فحياتي قدرت نعاون شي واحد ونخرجو من أحزانو ..داك نهار كانت لمياء فرحانة وداكشي كان كافيني باش نكون فرحان تانا ... وصلتها لحدا دار لكرياه مع سلوى ولبنات لخرين وقبل متمشي شديتها من يدها وقلتلها متنسايش داكشي لواعدتيني بيه . بتاسمات وقالت ليا متخافش وعنقاتني بجهد ومشات حسيت براسي فعالم اخر فرحت بزاف حيت قدرت نفرح الإنسانة لكنبغي ولدخلات لقلبي هادي هي لكنت فالأول كنقول عليها عاهرة الله يسمح ليا وصاف .. دبا كتفكر اشمن وعد علاياش داوي انا ياك حيت فالأجزاء لفاتو مدكرتش هاد الوعد .. من بعد ما تعرفت مزيان على لمياء ودوك ليام لكنا كنهضرو فهم طلبت منها تبعد على داك دومين وتبعد من دوك ناس وتخلي لبنات لخرين يديرو لبغاو وانا كل سيمانة غنضبر ليها على المصروف ديالها هي ولواليدة ديالها ووعداتني لمياء بلي غتبعد من داكشي وغتكون ليا بوحدي .. ماعليناش رجعت لدارنا فرحان وتفكرت بلي هملت لواليدة ديالي هاد ليام ومبقيتش كنهضر معها بحكم اني عطيت وقتي كولو للمياء مشيت تغديت فدار وكلست مع لواليدة ديالي شويا وبقينا كلست مع لواليدة ديالي شويا وبقينا كنهضرو قالت ليا مالك اولدي ليوما بنتي ليا فرحان وراشقة لك ؟ معرفتش واش نعاود لواليدة ولا لا فالأول ترددت ولكن قلت مع راسي هادي مي لولداتني وعمرها ماخبات عليا شي حاجة وموفرة ليا كلشي علاش منعاودش ليها .. عاودت ليها كلشي من الأول ولكن ديك ليلة لدوزنها فالبيت مع خالد مدكرتهاش ليها ومقلتش ليها بلي هي كانت كدير داكشي حيت يلاا قلتها ليها مغتخلينيش نكمل معها وغتسخط عليا .. نصحاتني الواليدة وقالت ليا كمل معها اولدي وان شاء الله يكون خير وعاونها وعاون تا لواليدة ديالها والله يشافيها وشي نهار جيب لمياء تغدا معنا باش نتعرف عليها تانا ولكن اولدي دير احطياتاتك راك عارف البنات ديال ليوما .. قلت لها متخافيش ا لواليدة الله يخليك ليا.. مشيت طلعت لبيتي وهضرت مع لمياء وقلت ليها بلي عاودت كلشي لواليدة وبلي خاصها تجي شي نهار باش تعرف عليها وتغدا معنا ..لمياء فرحات بزااف وقالت ليا واخا وأول مرة نحس بيها فرحانة لهاد درجة وتافقت معها بلي نهار الخميس غنجيبها تغدا معنا .. دازو ليام ضغيا و وصل نهار الخميس مشيت عند لمياء جبتها ودخلنا لدار لقيت لواليدة كتسننا عرفتها على الواليدة خليتهم كيهضرو وانا مشيت لكوزينة لقيت لواليدة مصايبة غديوة من داكشي رجعت عند لمياء ودخلنا لبيت ضياف خلتنا الواليدة مشات توجد الغداء وتجيبو وبقينا كنهضرو شويا : لمياء : واااو احسين داركم كبيرة وزوينة وجات فحي زوين وراقي انا : هادي دارنا ا لمياء ان شاء الله ملي غنتزوج غنسكنو هنا وغنعيشو حياة زوينة وغنعوض لك كاع دوك الأعوام لضاعو منك . لمياء : فرحات وبقات كتعنقني واحد شويا جات لواليدة وجابت الغدا وتغدينا وبدينا كنهضرو شويا وفواحد لحظة تيليفون ديال لمياء كيصوني خداتو .. الو .. سكتات وانا كنشوف فيها وتعابير ديال وجهها تبدلو وصفارت . قلت ليها شكون ؟ مجاوباتش قالت فتيليفون : هاني جاية دبا .. وبدات كتبكي انا مفهمت والو ناضت هزات صاكها وهي كتبكي وانا نشدها فيديها .. مالك ا لمياء ؟ مي احسين مي تزاد عليها الحال وراها فلكنينيك دبا .. منين طاح علينا هاد الخير اسيدي ربي كنا ناشطين وفرحانين ودبا كلشي تقلب .. هزيت جاكيطتي وبزظامي وقلت لها بلاتي نمشي معاك .. قالت ليا لا غا بقا معا مك انا نتاصل بك من بعد .. خرجت معها تاوصلتها لشارع شديت لها طاكسي ومخلاتنيش نمشي معها ..مشات وهي كتبكي مشات حيت مها تزاد عليها الحال تصدمت بهاد الخبر ومبقيت فاهم والو تجمدو افكاري ورجعت لدار حيت خليت لواليدة تاهي مافهما والو وصلت لدار قالت ليا لواليدة علاش ممشيتيش معها ؟ متخافيش امي را شديت لها طاكسي ومخلاتنيش نمشي معها .. يالاه نلحقو عليها اولدي ونوقفو جنبها را خاصك تبقا معها وتعاونها فبحال هاد الوقت .. لا امي را ماقالت ليا تا سميت الكنينيك خلي تا تاصل را قالت ليا غنهضر معاك خليها على خاطرها دبا تاصل .. دازت واحد نص ساعة تقريبا وانا كالس فصالون شاد راسي كنفكر خرجت تيليفون عيطت ليها وسولتها اشوقع وقالت ليا بلي مها مريضة بزااف وتزاد عليها الحال سولتها اشوقع لها .. وقالت ليا بلي قالها طبيب انو مها وقع لها انهيار عصبي وهي دبا فغيبوبة وخاصها ضروري دير عملية فأسرع وقت ممكن .انا مبقيت فاهم والو وقالت ليا بلي خاصها 2 دمليون باش دير عملية فأسرع وقت وبقات كتبكي عليا وكطلبني باش نعاونها ومنخليش مها ضيع منها حاولت نهدنها وقلت ليها بلي غنحاول نلقا شي حل قطعت تيلفون وهضرت مع لواليدة ديالي وعاودت ليها اشواقع لأم ديال لمياء وقلتلها بلي خاصينها لفلوس وطلبت منها تعطيني الموافقة باش نسحب لفلوس من كونطها فالبنكة طلبت الواليدة ديالي وترجيتها تعاوني وقلت لها بلي انا خاصني نوقف مع حبيبتي وفلخر عطات ليا الموافقة ومشيت انا وياها لبنكة بزربة شدينا طاكسي ودخلنا لبنكة خرجنا لفلوس بلا علم لواليد ديالي وخا عرفتو غيغوت عليا وغيعاتبني حيت هزيت داك المبلغ كولو بلا منقول ليه والو مي هادي مسألة حياة او موت منقدرش نخلي لمياء كتعاني وكتشوف فمها كتموت قدام عينها مهم رجعت لواليدة لدارنا وانا عيطت على لمياء وعطاتني العنوان ديال لكنينيك [هدا واحد الكنينيك كنعرفو كبير فمدينتنا اكبر واحد كاين فالمدينة ] مشيت عدها لقيتها كالسا برا لكنينيك جرات لعندي وعنقاتني وسولتها على مها وقالت ليا بلي دخلوها لقاعة دالعمليات وبلي كيتسناو لفلوس باش يديرو لها العملية .. طلبت منها ندخل معها نشوفها مي قالت ليا مخلاوهاش تشوفها حيت هي فخطر وميمكنش تشوفها عطيت ليها لفلوس وقالت ليا تسناني نمشي نعمر لوراق ديال العملية ونجي عندك احسين ودموع فوجهها مشات وخلااتني كالس برا شفت فيها تا دخلات وكلست بوحدي كنتسنا دازت نص ساعة باقي مخرجاتش عييت مانتسنا مشيت دخلت بقيت كنقلب عليها فجميع طوابق وملقيتهاش هزيت تيليفون نصوني عليها تيليفون ديالها طافي .كيفاش فين مشات لمياء .. هبطت لتحت مشيت عند ديك المرا لكتقيد المرضى عطيتها سمية ديال مت لمياء وقالت ليا بلي مكيناش ديك سمية عدهم .. كيفاش .. عاودت قلتلها تقلب وقلت ليها بلي عدها عملية ليوما وبلي مريضة بشلل .. قلبات للمرة الثانية مي والو قالت ليا بلي مكيناش ديك سمية عدها فلاليست ومدخلاتش اصلاا ديك سمية عدهم .. تصدمت واستغربت كيفاش مكيناش عدهم سمية .. هزيت تيليفوني صونيت على لمياء لقيت تيليفونها طافي مرة خرا عاودت صونيت شي 5 دلمرات و والو .. بقيت كنفكر وقلت لديك سيدة . واش كاين شي باب اخر من هاد جيهة ؟ اه اسيدي كاينين جوج بيبان كبار واحد من هاد جيهة و واحد اخر من جيهة لخرا .. صافي واقيلاا دبا فهمت يمكن لمياء خرجات باش تشري شي حاجة يمكن خرجت من الباب لاخر وبقيت كنشوف فشارع وكنتعمق فالوجوه مي مبانتش ليا هزيت تيليفون وبقيت كنصوني عليها و والو طيلي طافي قلت مع راسي نمشي لدار العجازة ونسول على لواليدة ديالها واشمن جناح هي فيها هما ليقدرو يعطيوني معلومات.. فدوك لحظات بقيت كنوهم راسي بشي حوايج وقيلاا مكينينش وقلت مع راسي مخصنيش نزرب ونتاخد احكام مسبقة يمكن غي طفا ليها طيلي حيت كمل شارج ولا شي حاجة خرا .. شديت طاكسي وطول طريق وانا كنصوني على تيلفون ديال لمياء مي والو تيلفون طافي وصلت لدار العجزة هبطت دخلت وبقيت كنقلب على البيت لفيه لواليدة ديال لمياء لقيتو ولقيت لباب مسدود ورتاحيت وخا غي بنسبة 0.1% قلت مع راسي مغنلقهاش ملي الباب مسدود مي حليتو وكانت المفجأة لقيت لواليدة ديالها ناعسة فلفراش على نفس الوضعية وصراحة مبقيت فهم والو سلوكة ديال عقلي تبلوكاو كيفاش ياك قالت ليا وقعات ليها شي حاجة وداوها دير عملية ودبا هاهيا هنا ناعسة مابيها والو سديت الباب وعيطت على واحد سيدة خدامة تما سولتها عليها وقلت ليها واش جات بنتها لهنا .. وهنا كانت مفجاءة وحدا خرا. قالت ليا بلي ديك سيدة معندها لا بنت لا ولد وبلي هي فدار العجزة من شحال وهي مريضة بالشلل وطول الفترة لهيا معاهم تاواحد مجا لعدها الاا واحد البنت كانت كتزورها هاد شهور لخرين ولكن هي ماشي بنتها ... طاحت عليا هاد الهضرة بحال شي صاعقة وصافي تجمدت فبلاصتي ..دبا فهمت كلشي. ديك العاهرة ضحكات عليا وخدات الفلوس هادي اول مرة نقول علها عاهرة ومتيقن منها وي اديك عاهرة وبوراقها.. كيفاش تا ضحكات عليا فين كان عقل تادارتها بيا وعلى قبل اش على قبل الفلوس على قبل وسخ دنيا .. كاع دوك الأحلام تحطمو قدامي داك نهار والمستقبل لرسمتو وتخيلتو فمخيلتي شعلاات فيه العافية ديك شيطانة وخلاتو كيحتارق قدامي .. على قبل الفلوس ضحكات عليا ودارت هاد سيدة مسكينة وسيلة باش توصل للهدف ديالها مكيهمهاش تكون مريضة لا هي فصالحها انها مشللة ومكتهضرش باش هكا تستغلها مزيان .. تفكرت داك نهار ملي زرتها تفكرت عينيها لكانو عامرين بدموع وبالحزن كنت كنضن بلي كانت حزينة على قبل المرض ديالها ولكن لا كانت حزينة حيت كتشوف ديك العاهرة كتلعب بيا وكتستغلني وكتستغلها تاهي ..كانت حزينة حيت كتشوف فراسها كتساهم معها فالكدوب ديالها وخا من غير قصد .. كرهت راسي فديك لحظة كيفاش تا قدرات هاد شيطانة ضحك عليا وضحك تاعلى لواليدة ديالي ..دبا عاد عرفت علاش كانت فرحانة ملي قلت لها بلي غتجي عدنا لدارنا حيت كانت عارفا بلي غضحك عليا وحتى على مي .. ديك القصة كولها كانت مخططة لها من البدية باش فلخر تدمرني وتدي لفلوس حيت عارفاني غنعطيها اي حاجة ودارت ليا الألعاب ديالها الشيطانية ولعبات بقلبي حتى بغيتها ولعبات دور ضحية فكل اللقطات مي انا لكنت ضحية كانت كتخيط ليا لكفن وانا كنت كنضحك وعاجبني الحال . درت معها نية وهي غدراتني .. داك نهار تدمرت وراسي كيضرني وبقا فيا الحال ماشي على قبل الفلوس لا ربي حمد الله عطانا الفلوس وكلشي مي على قبل ديك العاهرة لضحكات بمشاعيري وبقلبي .. خرجت من دار العجزة وشديت طاكسي وفطريق تفكرت خالد وكلت نعيط عليه ونمشي عندو نخوي عليه قلبي حيت هو صديق ديالي وغيعاوني فهاد المحنة صونيت عليه ولكن تيليفون ديالو طافيه .. مفهمت والو هادي شهر ونص وهوا غابر فين مشا تاهوا خاصني نمشي لدارهم ونسول فيه باقي عاقل على العنوان ديال دارهم وخا عمرني مشيت لعندو مي كان عطاه ليا قبل ومشيت لدربهم وصلت قلبت على دار ودقت عليهم وتاواحد مجاوبني عاودت دقت ولكن تاواحد مجاوب وبقيت كندق كندق حتى طلات عليا واحد سيدة من دار لخرا قالت ليا علاش كتقلب اولدي ؟ سمحي ليا اخالتي نسولك واش مكينينش مالين هاد دار هنا ؟ لا اولدي مكاينينش هادي شهرين باش نتاقلو جمعو حوايجهم ومشاو .. متعرفيهمش اخالتي فين مشاو ؟ لا اولدي معندي منخبي علك اصلاا دوك ناس تاواحد مكيعرف علهم شي حاجة وخا دوزو هنا عام تقريبا ولكن عمرها مخرجات لعدنا مهم ولا هضرات معنا .. وخا اخالتي سمحي ليا يلاا صدعتك .. ماشي مشكيل اولدي مالك كتبان ليا مريض ووجهك صفر ؟ والو اخالتي غا خليها عالله وصاف .. فدوك لاحضات حبست دموعي غا بزز ولكن مقدرتش نحبسهم ضرت بضهري ومشيت فدوك لاحضات حبست دموعي غا بزز ولكن مقدرتش نحبسهم ضرت بضهري ومشيت وكنبكي دموعي كيسيلو مكنتش كنتوقع هادشي يوقع ليا اشمن دنب درتو باش يجيو هاد جوج ويضحكو عليا دبا فهمت كلشي وصورة توضحات ليا ..دري لدرتو بحال خويا ولا كثر خاني ولعب بيا على قبل الفلوس وتافق مع عاهرة وعرفني عليها على قبل لفلوس كون غي كان معيا راجل ولطلبها نحضرها لو وميديرش معيا هكا .. منقدرش نوصف لكم شعور لكنت كنحس بيه داك نهار وداك الوقت بضبط حسيت براسي مخنوق والعافية شاعلة فصدري بغيت غا نبكي بغيت غا نعس ونفيق نلقا راسي كنت كنحلم .. مقدرتش نفهم كيفاش تا طاحت عليه هاد الفكرة ديال انه يضحك عليا ويسرق ليا لفلوس هادا راه شيطان على هيئة انسان فاش جا فالأول ديال العام ل لافاك وكان يالاه جديد حيت قاليا غي نتاقلو لمدينة كنت معاه راجل وبقيت معاه وعرفتو كلشي على مدينتنا وبقيت معاه فلافاك وعرفتو كلشي وديما كنخلص عليه اي حاجة ودرتو بحال خويا ولكن فالمقابل خلصني وجاب ليا عاهرة تلعب ليا بمشاعري وبقلبي رجعت لدار دخلت طلعت لبيتي منهار عاطفيا عصبيا بدنيا كلشي رجعت بحالاا انا لهاز ثقل دنيا كولو رجعت بهم عارف بيه غي الله جات عندي الواليدة كلسات حديا ومافهمة والو مسكينة بقات كتهضر معيا .. اشوقع اولدي .. حسين اشوقع مالك ناعس ؟ جاوبني قول ليا مالك ؟ واش دارت مت لمياء العملية ؟ اشوقع اولدي جاوبني را شوشتيني علك ؟ ضرت عند مي وعنقتها وبقيت كنردد فجملة وحدا " كلشي كدوب فكدوب امي " كلشي كدوب فكدوب امي .. لواليدة عنقاتني بجهد وحاولات تهدني وطلبات مني نعاود لها كلشي وعاودت ليها كلشي وقالت ليا ميبقاش فك الحال اولدي قدر الله ماشاء فعل الحمد الله ملي دات غي لفلوس اما داك خالد خليه هو لخسرك ماشي نتا لخسرتيه نتا باقين عندك اصدقاء ديالولك وعندك عائلة كتبغيك واعدني بلي غتنسا هادشي وانا مغنعاود والو لباك وهو راك عارفو مكيقلبش اصلاا لكونط ديالي ودوك لفلوس لمشاو دبا يخلفهم ربي دبا واعدني بلي غتنسا كلشي وغتنسا ديك شيطانة بحالاا عمرها مكانت وكمل حياتك اولدي عادي والقراية رها قربات ودبا تعرف على ناس جداد وتعرف على وحدا خرا لتستاهلك ! داز داك نهار بما فيه وانا كنت منهار مي لواليدة ديالي كانت فجنبي وسانداتني ونعست داك نهار وخلاتني لواليدة مفيقاتنيش لعشا وكالت لواليد بلي انا مريض شويا .. فقت لغد ليه بقيت حزين ومحطم حيت غي كنتفكر ديك العاهرة وخالد. كيطيح عليا الحزن ومنقولش لكم شحال كنكرههم كنكره داك شماتة لحسبتو راجل وعطيتو كلشي وتا ديك العاهرة لكتموت غي على لفلوس بغيت ربي يعطيها على قد مادرت بيا .. مهم دازو ليام وبقيت غا فبيتي مكنخرجش ومكنهضر مع تاواحد كندوز نهاري كولو غا فبيتي وكنفكر فداك البلان لوقع وعقدني .. ولكن لواليدة ديالي وقفات معيا وحاولات تخرجني من ديك الوحدة ومرة مرة كيجي عندي ولد جيرانا أسامة وبفظلو وبفظل لواليدة ديالي تخطيت ديك الدوامة وخرجت منها ودبا انا وأسامة ولينا قراب من بعضيتنا بزااف حيت كيقرا فنفس لافاك لكنقرا فيها وعرفني على دراري ودريات جداد وخا كبار عليا مي لقيت معاهم خاطري ونسيت داك لموضوع ديال لمياء حيت قنعت راسي بلي متستاهلش حتى ثانية نضيعها فتفكيري فيها هي عاهرة وكتبقا عاهرة ! الحمد الله تجاوزت ديك الأزمة نفسية وخرجت منها بدعم ديال الواليدة ديالي الله يخليها ليا و خويا لمولداتوش ليا مي أسامة ومن بعد كملت حياتي عادي بحالاا موقع والو وكل نهار فسيمانة كنمشي انا ولواليدة ديالي لدار العجزة باش نزورو ديك سيدة لعرفت بلب سميتها من بعد "رحمة" مهم تجاوزت ديك المرحلة وكملت حياتي عادي ونسيت موضوع ديال العاهرة لمياء... العبرة من القصة هي انو ماشي اي واحد فجنبك را باغي لك الخير يمكن باغي منك غا حاجتو وزمن كيتكفل بإضهار الوجوه الحقيقية .. مابغيتش منكم تشكو فصحابكم وفصحباتكم لا دير نية وربي مغيخيبكش وكون على يقين انو سيدي ربي كيدير غا لفمصلحتك يمكن داك شخص لفقدتيه كان غيأديك كتر منما كتصور وربي بعدو علك ... انا لغلاط لدرتو ومبغيت تاواحد يديرو من بعدي هو أنني تقت ضغيا وتعميت بالحب والكذوب وفلخر خسرت وكنت ضحية ..مزيان لواحد يتيق ولكن يعرف فمن
النهاية