شيبانية فالعشرين

عواطف : نص ساعة وانا كاتسناك تنزلي عندي .. الله يخليها قاعدة فيك

- أحلام : وانت أصاحبتي لي كاتجي عندي وانا يالاه داخلة لطواليط .. و سبحان الله ديما مع الحطة

- يخخ تفو .. مهم كي دوزتي نهار لول فالخدمة ؟

- هههه عاادي جدااا

- العادي عندك هو البطالة .. جراو عليك تاني ؟

- لا ماشي هكاك .. دابا المدير التنفيدي تزعط فيا من شوفة لولى وقاليا سيري أبنت الناس لداركم بلا مانديرو داك تبرهيش ديال المسلسلات ملي نوجد راسي نجي نخبطك

- الله يعطينا وجهك واش ماباغاش ترصاي .. واش بانت ليك الخدمة فالمغرب كتشتت

- أنا اختي ماباغاش نخدم باغا نتزوج .. وداك الخدمة المدير ديالها قد با سيدي وولي العهد ديالو كبر من الواليد بعامين وسبع شهور وربع يام.. وكاع الموظفين لي تما مزوجين وعيالاتهم خدامين معاهم .. واش غاندير ...صباط وماجاش قدي. وأصلا ماشي أنا لي بغيت نخرج هما لي جراو عليا

- حمقة .. كي شفتي لي تزوجو طفروه.. راه قالك 99 فالمائة مل العيالات نادمين حيت ماكملوش قرايتهم وخدمو بيها

- بصاااح و9،99 من الخدامات العانسات كيندبو فحناكهم حيت ماتزوجوش

- ماشي شغلي فيك موتي كاع .. أنا غارقة مشاكل وتزيديني بهبالك

- إينا مشاكل تاني .. ياك خطشيبك ضريف وحنون .. لا تكوني أصكعة حاملة؟؟

- حاملة ؟ واش مريضة؟؟ ..

- ومالكي ضاربة صداق .. أنا بلاصتك كن راني فشهري تاسع وحاملة بربعة ديال توام نغرق جدو مانخليهش يتفلفل .. يدخل جوج يخرج جوج باش يعرفوه كاع ناس مجوج

- مجوج بكلبة ... أحلام اختي داك الجهل ديالك سدي عليه داك درقوش لي فيا يكفيني

- على مالكي أش فيك ماقلتها تا أنا مسيكينة .. بنات عائلتنا كاملين تزوجو وبولادهم .. وانا مزالا كنحسب يامي فداك لافاك ديال الحبس .. خمس سنين وانا فيها باقي لاليسونص ماخديتها .. وانتي بعدا مخطوبة وخطيبك كايبغيك أما أنا عمر شي حد دق بابي .. تخيلي فضاعة الأمر كنكون غادة مع لبنات كنتلاقاو قشلة ديال دراري كيبسبسو على كاع لوان إلى لون لي لابسة هاد صكعة لي قدامك ... وماشي هادي هي قمة النحس .. أودي خليني ساكتة

عينيها تغرغرو بدموع عيات ماتحبس فيهم ولكن الله غالب .. هي تبكي وانا مناااااش هنا عينيا طارو ملي شفت واحد حمارأأغزال دايز -وا لغزال وقف نقول ليك جوج كلمات مالك غادي زربان (منقول)

مشا وكاع مداها فيا ولا عبرني ولد الحرام .. عاد تفكرت لبنت لي حدايا وغارقة فدموعها

-عواطف واصافي صافي .. أنا عارفة حالتي تقطع القلب .. ولكن راني مبتسمة رغم الإعاقة الحظية

-أحلام عمري حسيت براسي يتيمة قد اليوم .. ملي ماتت ماما بصح حسيت بالوحدة ولكن جدة كانت ديما فجنبي الله يرحمها .. وحتى بابا وواخا ملي تزوج تبدل عليا .. ولكن ملي جا يوسف عوضني

-أجي شكون يوسف ؟؟

-خطيبي

-قردة ..عمرك قلتي ليا سميتو .. هادي هي الصحبة ..إحساسي كيقول ليا غايكون يوسفي الجمال .. مم كملي .. وفين كاين المشكل ؟؟

-خوه غادي يتزوج وعرضو عليا دارهم سيمانة قبل لعرس .. بابا ومراتو كاعما بغاو يمشيو معايا .. وانا مابغيتش نمشي بوحدي بحالا مقطوعة من شجرة ومابغيتش نبين ليهم بلي ماعندي حد فهاد الدنيا من لول..بغيت نرفض وجات ناقصة

-لا لا بلاتي بلاتي عندو خوه ومخبياه عليا .. دنوبي وخرجو فيك تستاهلي كتر.. (شفت راسي عيقت) صافي ديني معاك وقوليلهم ختك من رضاعة

-كضحكي عليا .. هما أنا ومحاملينيش .. بالنسبة ليهم خطفت ليهم ولدهم .. عاد نزيدك انتي .. وانا باغا يمشي معايا شي واحد كبير .. يرد عليا الإحترام ..

-إيوا ديري بناقص و قولي ليهم عندي امتحان .. مريضة .. عمتي ماتت .. با طاح عليه سقف.. جدي دازت عليه لاندوشين ..كدبي عطا الله ماتقولي

-ولكن أنا باغا نحضر حيت هوا شاد كونجي وغايدوزو كاملو تما .. وهادي هي الفرصة لي نقدر نتقرب من عائلتو

-مممم حالة ميئوس منها ..أجي علاش ماتكريش شي مرأة .. خلصيها وديها معاك وقولي ليهم بلي هي من عائلتك .. كنعرف واحد سيدة يا عواطف تغلب أجولينا فالتمتيل .. هي لي كنت ديما عاتقاني ملي كيجريو عليا من المدرسة .. كان المدير بشلاغمو كيبكي حتى يتمخصص ملي يسمع قصصها

-أحلام واش كضحكي عليا ؟؟ أنا ندي وحدة مكانعرف ساسها من راسها لعائلة راجلي .. مانعرفها شفارة مانعرفها قتالة مانعرفها إرهابية .. واش كطنزي عليا

-شفتي هاد قلة النية لي فيك هي تخليك جالسة حدايا تضفري شيب و تحسبي يامك

-دابا مكاينش شي حل أخور ولانوض نمشي بحالي ؟

-كن الخوخ يداوي كن داوى راسو ...هممم كاتيقي فيا أعواطف؟؟

-لا .. أبدا .. مستحيل

-(بحماس) مهم تفرجت فواحد الفيديو لبارح ديال واحد اليوتيوبرز عراقية ورات فيه كيفاش ترجعي راسك شارفة غير بالمكياج .. جربتو وليت كي مي حنة .. مي مسكينة ملي شافتني طاح منها نص يسحابها مي حنة لي جات .. أجي علاش مانديروش ونمشي بصفتي حناك .. قسما بالله شي حد مايعيق بينا.. أش قلتي ؟؟

-أحلام باغا تخرجي عليا؟؟ شي حل أخور ؟؟

-من غير هادا مكاينش .. ومالكي جربي أش خسرتي .. ياك ضاربة الكاغيط .. واشوفي بعدا وحكمي

-لا .. واخا المكياج يصدق .. انتي فليفلة ماتكملي تا ساعة بلا مايعيقو بيك

-إيوا ضبري راسك

-أحلااام ؟؟ (بتوسل)

-والله مانحشم بيك غير تيقي بيا

وتاقت مسيكينة فعتيقة ملي وريتها المكياج .. ولي زاد دعمني هو شهادة لي واخدة فالتجميل .. أما التمتيل ختكم إختصاصية فالكدوب والفوحان والبهتان .. كان بقالينا غير الحوايج شريناهم من البال وجوطية .. وكملنا نهار كلو وهي كتوصي فيا وتعاود.. وهادشي كلو بموافقة خطيبها يوسف .. بيني وبينكم من بعد موافقتو تأكدت بلي أخلاقو حمار .. أما بالنسبة لوالديا فماكان عندهم تا إعتراض على الله غير نمشي ما نرجع العرس كان فدار جدهم الأكبر لي فالعروبية وهاد الأخيرة وصلنا ليها فربعة ديال سوايع من مدينتنا .. وفهاد الوقت لي دوزناه فالكار عواطف فيه ماسكتاتش تقول صارطة كاسيطة

-أحلام بدا يتنادم معايا الحال .. كن غير نرجعو حسن ... أحلااام إلى مشاو تاعاقو بينا غانبان كدابة من لول .. وزايدون الحياة لي مبنية على كدوب عمرها قصير .. لا لا نحبسو الكار ونزلو

-واخا نرجعو مكاين باس .. شنو قلتي ليا سميت داك بنت خالتو لي كانت كادور بيه و مو بغات تزوجها ليه .. تاهي غاتكون حاضرة فالعرس لا ؟؟؟

-يمكن

-يمكن ؟؟ يمكن تولي عاجباه ويمكن يسمح فيك ويمكن يتزوجو وعلاش لا يولدو وليدات وبنيتات ويسمي بنتو لولى على سميتك يمكن ماشي بعيد .. راه مغربي ولا نفكرك .. وعموما رجال كلهم غدارة .. إلا ليونانين كيقولو عليهم ولاد الناس حسب ما جاء في روايات أحلام وعبير

-رجال ماشي بحال بحال ويوسف ماشي بحالهم

-(باستنكار) نعام ياختـــــي ؟؟ مانلومكش أصلا كاع المخطوبات كايقولو بحالك ولكن ملي كايتزوجو مكايبان ليهم الحْب من التبن

-ياك ألالة وملي عارفة على رجال هادشي .. علاش عينيك كايحوالو ملي كاتشوفيهم

-هانتي قلتيها عيني ماشي قلبي .. حلمي هو نتزوج .. وباش نتزوج خصني راجل .. مكايهمنيش يكون كداب ولا غدار لي كيهمني هو يسد عليا فوام عباد الله ..

-فم الناس عمرو مايتسد

-يتسد غير من هاد الناحية بعدا .. عييت أعواطف كاع العائلة كتسول .. إيما غاتزوجي ؟ علاش ماتزوجتيش ؟ قدك راه تزوجو ؟ شحال قدك ديال الوقت ونتي مامزوجاش راه العمر كايطير ؟؟ وتقدي ماتولديش ؟ وتقدي ماتفعليش ؟ وتقدي ماتركيش ؟ .. وتقول زواج كايدخل لجنة .. والله تا عييت ومابقيتش قادة .. ودابا المهم عندي هو نلقى راجل .. وعلى العموم رجال كلهم غدارة فلا مانع عندي يكون راجلي بحالهم

-راكي غادة لهاوية فاخبارك ؟؟ مهم باش نكونو متفاهمين والرحلة دوز بسلام خصنا نديرو قواعد

والقاعدة الأولى : تاحد مايسيق الخبار بلي نتي شابة ماشي عجوز من غيري أنا ويوسف طبعا

والقاعدة الثانية : ام يوسف صعيبة ومزاجية لداكشي تفاديها ما أمكن وما ترديش عليها الهضرة

والقاعدة الثالثة : بليييز ماتهضري إلى لسولك شي حد وجاوبي باختصار وبإيجاز .. ومن المستحب تبقاي تجلسي بعيدة على الناس

-مالي فيا جدام ؟

-فيك لهضرة ولسانك مكايستش أ أحلام .. والى داز كلشي مزيان غانشري ليك جلابة لي كتحلمي بها بليل وبنهار .. تافقنا ؟؟

-بصااح ؟ تافقنا ( على جلابة أما دوك القواعد .. مستحيل no way )

وأخيرا وصلنا بالسلامة وحنا نازلين من الكار وهو يبان لينا واحد الراجل جاي .. ومن نظاراتو المليئة بالحب عرفتو بلي هو يوسف .. وعقلتو ملي قلت ليكم تخايلتو يوسفي الجمال .. دابا كنأكد ليكم بلي هو كبوريُّ الجمال .. مسيكين جاي كيجري عند عواطف منفتح الأدرع بغا يعنقها ولكن دوماج عنقنا بصيغة الجمع حيت فرمشة عين جيت وسط منهم .. وصرت أصرخ

-عبزوني .. عبزوني .. الله يقل حياكم

العشاق تقول ضربهم ضو ملي سمعو صوتي وسط منهم .. صدق من قال الحب أعمى .. ولكن بان ليا هادو هما لي معميين .. مهم عرفاتنا عواطف على بعضياتنا

-يوسف : دابا أحلام شنو نبقى نعيط ليك واش مي حنة ولا مي لالة ولا مّامّا

-أنا : يعطيك الغمة .. أولاً شلل فمك بسمن والعسل وعاد تبقى تعيط ليا الحاجة لالّة حليمة

-يوسف :هههههه واخا .. واخا طويلة ماشي مشكل .. والله كن ماقالت ليا عمري أأ قصدت عواطف بلي انت مزالا صغيرة والله مانتيق ... واش وجهك أصلا داير بحال هاكا ؟

-أنا :دار ليك .. وانت واش فمك ديما عوج بحال هاكا ؟؟؟

-عواطف : (من بين سنانها ) أحلاااام

-أنا : قلت شي عيب ؟؟ هو لي مكايعرفش يهضر .. جنس ناقص

بدات تقرص فيا وضحك معاه هو .. دانا لطونوبيلتو هي ركبات لقدام وأنا لاحوني لور كي شي كوربة ديال كرموس .. ياربي سلامة شحال مادخلش ليا الخاطر واقلة غير حيت عارفاه غير صالح لزواج لداكشيوأخيرا وصلنا بالسلامة وحنا نازلين من الكار وهو يبان لينا واحد الراجل جاي .. ومن نظاراتو المليئة بالحب عرفتو بلي هو يوسف .. وعقلتو ملي قلت ليكم تخايلتو يوسفي الجمال .. دابا كنأكد ليكم بلي هو كبوريُّ الجمال .. مسيكين جاي كيجري عند عواطف منفتح الأدرع بغا يعنقها ولكن دوماج عنقنا بصيغة الجمع حيت فرمشة عين جيت وسط منهم .. وصرت أصرخ

-عبزوني .. عبزوني .. الله يقل حياكم

-يوسف : دابا أحلام شنو نبقى نعيط ليك واش مي حنة ولا مي لالة ولا مّامّا

-أنا : يعطيك الغمة .. أولاً شلل فمك بسمن والعسل وعاد تبقى تعيط ليا الحاجة لالّة حليمة

-أنا :دار ليك .. وانت واش فمك ديما عوج بحال هاكا ؟؟؟

-عواطف : (من بين سنانها ) أحلاااام

-أنا : قلت شي عيب ؟؟ هو لي مكايعرفش يهضر .. جنس ناقص

بدات تقرص فيا وضحك معاه هو .. دانا لطونوبيلتو هي ركبات لقدام وأنا لاحوني لور كي شي كوربة ديال كرموس .. ياربي سلامة شحال مادخلش ليا الخاطر واقلة غير حيت عارفاه غير صالح لزواج لداكشي فطريق كانت كطيح شتا خفيفة و الأراضي كلها خضرا.. أصلا فصل الشتاء قرب يسالي .. ماعرفت لاش دايرين العرس فهاد الوقت هناك احتمالان .. الأول ماباغين يحضر حد والتاني باغين يدفااااو هه .. مهم حسبوني ماقلت والو .. وقفات طنوبيل حدا واحد دار وسط ديور .. ولكن لي صدمني هي الحجم ديال داك الدار .. بديت نغز فعواطف

-أنا :عواطف واااا عواطف واش هادي دار ولا بوينتة (بواطة) ديال الوقيد

-عواطف : شششش

-أنا :راه خفت نطلق فيها رجلي يطلو على برا .. فيها الطواليط بعدا يااك ؟

-يوسف :كاااااينة أخالتي حليمة ورا الدار فالهواء الطلق تا حد مايشم الريحة ههههه

-عواطف : هههههه حرام عليك أيوسف

تشادو فاليدين ودخلو .. وخلاوني بحالا مضروبة بتصرفيقة .. أول حاجة فكرت فيها هي المكياج كي ندير ليه .. والوضو كي غاندير نشدو من الفجر تا لعشا فهاد البرد وفهاد العرس .. حيت إلى غسلت وجهي غايطير المكياج راه غي ديال السوق ماشي ماركة عالمية .. يخخخ يسحابني هادشي ساهل غير نمتل وصاف واااع .. حسبي الله ونعم الوكيل .. توكلت على الله دخلت وقوصت ظهري شوية ..وبدات الفراجة لي جا بغا يسلم عليا .. كبير ولا صغير من البعيد كنمد ليه يديا .. صراحة يدي شبعات قُبلات .. إلى أن وصلت لأب يوسف باس ليا يدي خخ مركت ويوسف مبرق فيا عينيه وانا نبوس ليه تأنا يدو ... بحال سلام ديال لعكايزات .. ولكن هاد سلام ماكنتش ناوية نديرو مع مو .. ولكن تاهي طلعات مطيورة باست ليا غير راسي .. مهم بعد السلام وبعض الكلام وراونا لبيت لي نحطو فيه حوايجنا قبل مانجيوا كنت كنظن غايعطيونا بيت بوحدنا بحال داكشي ديال لمسلسلات ساعة حطونا فداك البيت بحال البواط دسردين .. كان فيه عائلة العروسة ولحد ساعة كاين فيه غير لعروسة وجداتها .. من بعد ماتسالمنا عواطف طارت عند زمانها وأنا جلست حدا العروسة وجداتها و بديت فتبرويل ديال شارفات

-العروسة زيييينة تبارك الله ولكن الحاجة غصبتوها مزالا صغيرة .. كن خليتوها تزيد تكبر .. أجي أكبيدتي جلسي حدايا أجي

-نعام

-أويلي على نعام .. الحاجة تي ماعلمتي حفيدتك والو .. أجي لهنا (جلسات حدايا ) نعام أشحيمتي كايشدوها ويسدو عليها ويتقفو بيها العرايسات .. لي عيط ليك ماتقولي ليه لا نعام لا ايه لا واخا .. شعرك إلى مشطتيه ماتخلي زغبة فالمشطة .. وأي حاجة ديالك جمعيها وسورتي عليها .. راه القلم ديال العينين هو لخر الكفارة كيتقفو فيه

-كيفاش كيتقفو فيه ؟

بديت كنشرح ليها والسيدة شفتها نقزات من بلاصتها ملي شافت خوها .. مشات عنقاتوا باينة شحال هادي مشافتو 100% كان فالغربة .. أش غانقوليكم عليه طول فالعرض فالإرتفاع خخخ ..إلى فلتو بلا مانرجع لدارنا غير ندوز نيشان لحبيبة مي .. جا سلم على جداتو .. وجا عندي باس ليا يدي .. ومع ختكم ناقصة حنان .. هزيت يدي وصلتها لحنكي .. كنوصل لقبلة في أمان .. ومع الهزة ديال لراسي كنشوف سيهم يوسف كايشوف فيا وحابس الضحكة ... خخ على متطفل

-الحاجة هذا حفيدك؟

-إيه ولد بنتي

-مزوج ؟ فاش خدام ؟ شحال عندو فالعمر ؟؟

-لا مامزوجش

-رضى .. من ليوم حسبيه مزوج .. عندي ليه واحد البنت يالحاجة اش غانقول ليك عليها .. حفيدتي أحلام الصواب والأداب والشقا والنقا (جمعت صباعي وبستهم زعمة فنننننننة )

-هو :مامزوجش أخالتي ولكن راني مرتبط

-ممم (بديت كندور فمي) كنت عارفاها الحمير ديما خصهم يتربطو

كلشي بدا يشوف فيا من بعد هاد القصف .. أما أنا دورت وجهي وبديت نسبح بيدي .. إلى أن حطو الغدا جيت أنا لولى فالطبلة ..حطو لينا واحد تلاتة ديال بطاطايات مقسومين على طناش كيعومو فالمرقة مع واحد شنتوفة ديال لحم فالوسط .. يا إلهي ..هادشي يالاه يكفيني بوحدي .. ومع من دارنا مادقتو بان ليا هادشي مامسلكش ... ويالاه كلشي بغا يمد يدو .. جمعت فمي وبديت نغوت

-عواااااطف .. شناني فيناهما شناني شيبو ليا شناني

-راهم ففمك أحنة

-(دخلت يدي ففمي وبديت نحسبهم ) إييييه لا يتبتنا على شهادة

وبهاديك ليد نيت قطعت ليهم الخبز ومديت ليهم للحم قلت ليهم نقسمو ليكم .. إيوا لي عديم ضمير فيكم يمد .. ونجحات خطتي وكلشي رجع يدو .. إلى يديا لي كايجمعو بخمسة .. عواطف من بعد هاد شوهة لي درت ليها ماكرهاتش تغزني .. ماعندي كي ندير ليها كرشي قبل كلشي وصلات العشية العروسة كانت محتاجة شي حاجة وطلبات من خوها يديها لمارشي بطنوبيلتو .. هاد الأخير لي طلب من جداتو تمشي معاهم وهاد الأخيرة طلبات نرافقهم .. بغيت نرفض ولكن شميت ريحة الكفتة تمة .. 100% غادي يشري ليهم شي حاجة فيها القص على شوهة لي درت ليهم فالغدا .. هزيت صاكي لي فيه المكياج لايخونوه ليا البعالك وتبعتهم .. عندو واااااحد طنوبيلة بيضة بحال ديال مول الخبز ههه ركبات ختو لقدام وانا وجداتهم لور .. قتلااتني بجماعة .. ليوم حطمت راقم لقياسي فالهضرة فمي ضرني .. هو زوين تكوني عكوزة تسولي على لي بغيتي بلا حشمة بلا حياء .. تسبي وتعايري لي جا قدامك بلا مايرد عليك الهضرة .. ومن الفوق كلشي كايحتارمك وكايبوس ليك يدك وراسك .. صراحة بديت كنستمتع .. وكيفما توقعت مشينا عند واحد مول شواية ..شبعنا كفتة ومونادة .. وشحال عزيز عليا الماكلة ديال زنقة فابور .. مهم من بعد ما سالينا دوران .. شدينا طريق رجعة وشكون قال داك دار عمرنا غارجعو ليها .. فالطريق تلاقينا عمي العريس واقف مع واحد البنت شاد ليها فيديها ومن البوز لي دايرين باااااينة كايناقشو القضية الفلسطينية هه .. إيوا محس براسو تا جاوه جوج بونيات فالعين الواحدة من عند بطلنا العزيز .. رجع لطنوبيل وكسيرا .. هو يسب ويعاير والعروسة تبكي وتندب وجداتهم تولول وتستغفر وأنا مكيمشة ماعرفت باش تبليت .. مهم طريق لي جابتنا ماشي هي لي رداتنا .. وعرفت بلي حنا مراجعينش لدار .. بغيت نقول ليه ينزلني ولكن ظلام طاح .. سكتت وفبلاصتي تكمشت .. وهو واقلة نساني بلي أنا معاهم وزايدون مداها غي فيا همو كبير وموصيبتو كتر .. الحاصول ماوقفات طنوبيل تا طلع الفجر وشرقات شمش ديال نهار جديد .. فقت ونعست وفقت ونعست .. و أخيرا وصلنا .. وقفنا حدا واحد جبل .. ناري كانو غايطيحو ليا الما فركابي كن قالولي دار فوق داك جبل .. ساعة بانت ليا دار قدامنا .. نتفست تنفس الصعداء هما دخلو وانا بقيت برا بغيت نصوني على عواطف نطمنها عليا ونعاود ليها شنو جرا .. ولكن مالقيت تا شرطة ديال ريزو .. بديت كنطلع شوية فداك جبل عالله كنقلب .. كاتبان وحدة يالاه كنبغي نصوني كاتمشي .. بقيت طالعة طالعة طالعة ..وانا حاطة عيني على تليفون .. تا بانو ليا جوج عاد وقفت .. عيطت ليها وهضرت معاها وقلت ليها فأقرب فرصة نجي لعندها وتحلفت عليها لا تمشي لدارهم بلا بيا .. يسيقو ليا واليديا الخبار يقطعو ورقتي من لحالة المدانية .. وأنا مزالا كنبكرك ونهدد وهو يطفى ليا تليفون ديشارجا .. لعجب كان عامر ؟؟.. باتري ديال شينوا أش كانتسنى منو .. المهم داكشي لمهم راه قلتو .. هزيت راسي نشوف فين أنا .. لقيت راسي جبل كلو طلعتو .. لاااا مستحييييل .. وانا باقي كنلوي راسي كي الحنش بانت ليا واحد دار الفوق شوية .. نكمل ليها نطلب ليهم كويس ديال لما ولا نرجع منين جيت ؟؟..بعد أخد ورد ومد وجزر مع راسي قررت نكمل ليها .. وياك أنا غير امرأة شارفة ماعندهم ما يديو مني ... أصلا مكانتش بعيدة دغيا وصلت ليها شهقت وعيني حوالو ورقبتي عواجت ملي بديت نبركك.. وااا شحال كبيرة .. 100 % غاتكون غير ديال شي سياسي بو كرش ولا ديال شي مافية كايخزنو فيها الحشيش

-أخخخخخ كن كانت داري نعمرها دراري .. وشي راجل كيوت لا لا بغيتو حرش ديال زمان مرجل ومايكونش تيتيز يحس بجنابو.. وشي جوج خدامات ولا تلاتة يعاونوني على هاد الخير ...لا بلاش فلوسهم نحطهم فبزطامي .. مافيها باس شوية ديال الغمولية كتقوي المناعة .. لا لا صافي أنا خصني غير لوراق ونمشي لبرشيد .. نمشي بحالي هاد الخير كامل ماشي شريبة

ضرت نمشي بحالي .. وانا نسمع شي صوت من لور قاصدني

-أش حب لخاطر أشريفة ؟؟

-شريبة ديال لما تلقايها فجنة إن شاء الله

-زيدي مرحبا

-لا نتسناك غاهنا

-لا دخلي عليك لامان مكاينش لي يقيسك

-يا بسم الله

كانت بنت تكون قدي فالعمر لابسة سروال دجين وتريكو طويل مرسومة فيه واحد الفراشة مدايراش الفولار .. ووجها مبشور زويونة تگول خارجة من شي فيلم .. مهم هي غادة وأنا تابعاها .. دخلنا لدار جمد فيا دم ملي شفتها من لداخل هادي محالش واش فيها قطرة ديال لما .. واش غانقول ليكم خربة مهجورة تقول دازت فيها الحرب العالمية تالتة الحيوطة مقشرين والأرض مكاتبانش واش بوطون ولا زليج بكترت التراب والغبرة .. تبلوكيت رجلي ماقداتش تزيد .. ولي طيح ليا الما فركابي فاش قالت ليا

-زيدي أ أحلام

مع دار خاوية أحلام تعاودات بصدى شي مائة مرة .. أويلي أش هادشي .. صافي لقيتها

-احم عواطف فيقيني .. راني طولت فنعاس .. فيقيني الله يرحم مك .. أويلي شكون لي جالس حدايا يفيقني هادشي راه مابقاش يعجب

-انت مكاتحلميش هادشي بصح

وتاني بصح بدات تعاود مع صدى .. هنا مابقيتش عاقلة على راسي لي متأكدة منو رجليا مابقاوش هازيني .. يمكن سخفت يمكن غيبت يمكن الله يرحمني ويوسع عليا استعدت وعيي ولم أفتح عيني .. ماقديتش خفت نحلهم على شي عفريت .. ساداهم وأنا كلي أمل ملي نحلهم نلقى راسي فدارنا .. ولكن تجري رياح بما لا تشتهي السفن .. واحد الصوت رجالي صمك ليا ودنيا

-لا لا أنا ولاّ عندي هنا مأوى للمشردين .. أش بان ليك نحلو خيريا ؟؟ ربع يام غبرت فيها على الدار أسي...جيت لقيت هاد شارفة قدامي وشوف نعسة كي دايرة مرتاااااحة تقول فدار باها .. علم الله كن غبرت شهر ولا شهرين كن لقاها جابت ولادها وحفايدها واستعمرو ليا دار ودايرين ليا فيها النقابة

رد عليه واحد صوت ضعيف ديال راجل باينة أقل مرتبة منو.. يقدر يكون خدام عندو

-والله أسيدي إلى لبارح بليل ضرت فدار كاملة مكان فيها حد وبالإمارة فاش خرجت سورت البيبان كاملين

-أهاه ومنين دخلات من سراجم بوبريصة .. هز عليا الزبل ودرك زلافتك عليا انت وياها .. والمرة جايا نلقى شي حاجة فهاد الدار مانخلي فيك غير لي نسيت

لا بلاتي شكون لي قصد بالزبل .. واش أنا ؟؟ هه (باستهزاء) ولات كرامتي فالحضيض .. والله مانسكت ليه واخا يكون جن ولا عفريت .. كفضت على دراعي ونضدت عند جدو

-(بالغوات ديال شارفات) تاااااهااادي دار .. هادي بزاف عليها تا سميت خـ ( شفت فيه جاتني لقوة وبصوت حادر كملت) خربة

وخربة بدات تعاود بصدى .. ناري كي غاندير نوصفو ليكم .. وجهو قمة البشاعة أستغفر الله والشر كيطل من عينيه .. عمرني عرفت وجه الحبس كي داير ولكن دابا كنقسم ليكم تا عرفتو بتفاصيلو .. كنحس بقلبي مابقاش كيضرب ولا كيرجف .. زير على يدو وقابلها مع وجهي وقال بصوت مخيف جدااااا

-غاتخرجها عليا ولا عمرها غايسالي على يدي ليوم

تشوكيت .. ماحسيت غير بداك الخدام كايجرني على برا برفق ... تا شفت سما بعيني عاد تنفست .. بعدنا على دار شوية

-ناري أشريفة عندك الزهر .. لقيتيه يالاه خارج من الحبس مامكمل تا شهرين

-كنت عارفة .. وجهو ديال الحبس مافيهاش

-بغيت غير نسولك كي درتي دخلتي لدار

-حلات ليا واحد البنت (وصفتها ليه)

-هاديك مراتو

-دخلنا عليك بالله ونبي رسول الله هاداك مزوج بهاديك .. مسكينة علم الله كي تكون عايشة معاه

-تي راه صفاها ليها شحااال هادي .. راه عليها كان داخل الحبس حكمو عليه بعشرين دوز خمسطاش وجاتو 5 سنين عفو ملكي

-دابا ماشفتش جنون أنا وليت نشوف الموتى .. أستغفر الله .. أجي كاع ماباين فيه شارف .. يكون كايدير الحديد ؟؟

-لواه كايدير الحشيش راه فعمرو 43

-ممم وعلاش قتلها ؟

-لقاها كتخونو مع صاحبو لي ساكن فداك دار .. (شير ليا لدار لي تحت جبل هي ديال لعروسة وختو وجداتهم)

-خو رجاء (العروسة)

-هو هداك

-وا مسلسل تووووركي عندكم ..و لكن مافيهش تيتيز .. أنا بعدا كن كان عند إبليس وجه كنت غانتخايلو غير بسيفت مول هاد الخربة .. أما ترابي ديال شيطان مافيهاش .. ياااع على بنادم كان يسحابني نقارض بحال هاد نوع

وقف قبالتي وبدا كيشوف فيا شي شوفات غريييبة ... كيهضر ويبعد

-الحاجة .. ماتنسايش تشهدي قبل ما تزهقلك روح

-أويلي شكاتقول .. سير جيب لي صاكي من داخل راه فيه لاكارط ناسيونال

-كنظن شهادة الوفاة مكايطلبوش فيها لاكارط .. أصلا موتك مغايسيق ليها حد الخبار

هاد الجملة جاتني من لور .. وقبل مانستوعب دورني عندو .. مهم بإيجاز نوصف ليكم المشهد حيت كنظن مابقاش ليا بزاف فهاد دنيا .. رجلي مابقاوش فالأرض .. ويدو كي لقاط فعنقي .. وعينيه شر كايطل منهم .. وأنا النفس تقطعات فيا .. صافي هادي هي لخرة ليا

عافاك سمحليها أسي أمين راها مراتي

- أنا و هو : مراتك ؟؟؟

بداو العروقة ديال عينو يحمارو .. و بدا يشوف فيا وفيه باحتقار ... طلقني أو بالأصح رماني جيت على زنافري كن مطاكيت بيدي كن نيفي تشخشخ .. ومشا شنق عليه هو .. ناري بقا فيا داك الخدام الصكع

- الخدام : حشمت نگوليك بلي عاود تزوجت فهاد العمر

- هو : (كيشوف فيا ويشوف فيه ) دابا شنو كضحكو عليا ؟؟

- لا حاشة أسيدي.. راه والله تا كنت ناوي نصيفطها لدار باها حيت عارفك ماكاتحملش تشوف لعيالات

- (بدا كيشوف فيا هاد المرة بوحدي ويبلاني وبصوت كلو احتقار واشمئزاز الله يعطيه الغرق) لا خليها تعاون فشقا ديال دار .. ونيت أنا محتاجها

طلق منو و مشا وخلانا .. أويلي على مزال محتاجني واش أنا بنت ليه لومبلونص ديال صبيطار الحومة .. ياك عاد كان باغي يقتلني دابا محتاجني جلاخة صافي .. نضت أنا عاود شنقت على داك الخدام لي ماعرفت أش سماه الله

- علاش قلتي ليه أنا مراتك أ لمسخوط ؟؟؟

- وراه كان غايقلتك .. أش بيدي ندير

- دار لك انت وياه .. سير جيب ليا الله يرحم باك صاكي نمشي بحالي ولا بلاش منو .. بناااقص

ضرت بحالي شديت طريق رجعة .. ينعل الوقت لي جمعاتني مع هاد زنافر .. أنا غادة وهو تابعني

- واش غادة ؟؟ راه غايقتلني إلى ساق ليا الخبار بلي كدبت عليه

- ومالو يالاه خرج من الحبس أش غايضرو إلى رجع ليه

- وأنا ؟؟

- ماتنساش تشهد ملي تزهق ليك الروح

- واش هاكا كاترجعي لخير .. ولايني راكي شيبة عاصية

- لواه نعناع لاوي تاسيير بحالك

- (بصوت خائف )راه غايقتلني مابقيتش فيك ؟؟

- (ضرت عندو) مغاديش يقتلك ماتخافش

- إلى ماقتلنيش غادي يدكدكني عصا ويجري عليا على اخر يامي

- (بديت ندور فعيني) هادي يديــــرها ويقد بيها

- گلسي غا سيمانة على ما نحل هاد الوحلة الله يخليك لولادك ويخليلك ماعزيز عليك

بقيت كنشوف فيه بشفقة .. هو بصح عتقني من داك وجه الحبس ولكن راهو سباب هو لي جر ليا لساني تا بديت نبرول وسمعني داك الحرام الكحل..ممم عمر شي راجل كبير فالسن ماحزرني .. يخ على قلب عندي شحال هشيش ..هو لي وصلني لهنا .. ماقلت ليه لا أه لا لا .. تقلبت لدار ورجعت ليها ... إيوا ولعشية كاملة وحنا كانجمعو فيها يالاه بدا يبان شوية ديال زليج ..كانجمعو وكانتجمعو صراحة هاد سي مصطفى (الخدام) كوميك ديال ضحك خلاها كبور .. ما حبسنا تا بدأت شمش تغرب و بدات عصافير بطني تزقزق .. قاليا يمشي يجيب ليا باش نعمي جوع .. على ما يجيب داك المصيبة شي حاجة من المدينة .. من لعشية وهو غابر ومخلينا حنا كندمرو .. بقيت بوحدي كنكمل على ما يجي سي مصطفى .. شوية وهي تيجيني واحد تبوريشة خلاتني نترعد .. ومع الهزة ديال راسي وانا نشوف ماعرفت أش غانسميها .. هاديك لبنت لي حلات ليا الباب كتشووووف فيا .. حسيت بالدم جمد فيا .. كانقول هاهي غاتجي تقتلني هاهي غاتجي تصفيها ليا .. وهي ولا تحركات .. وانا لخلعة كتحفر فيا

- انا معاك بالله ووبشرع ألالة.. أنا مزاااااوكة ماتأدينيش .. ها حجر العافية انا راه غير ولية و قلبي بيض .. بغيت غير نتزوج ماعرفت أنا علاش كايطرا ليا هادشي كامل

بدات كتقرب ليا .. وبحالا فرجليها روايض كاعما كاتمشى ..هي كتقرب وانا قلبي كيضرب كيضرب كيضرب .. ويالاه بغات تهضر .. وأنا نسمع شي هضرة من لور

- جايبك تخدمي ولا تشوفي ليا فالحيوطة

ضرت عندو لقيتو هداك وجه الحبس كانت معاه واحد البنت وموراهم سي مصطفى لي تم جاي عندي

- مصطفى : مال وجهك صفر أحليمة

- أنا : واش .. واش مكاتشوفوهاش؟؟ هاهي كتشوف فيكم ( كنشير ليها )

- البنت : (بوجه مخلوع) شكون هي ؟

- وجه الحبس: شرفت وهترت .. تكون غير الموت لي كاتشوف .. على الله ديها وتهنينا منها

شاف فيا تاني بنظرات الإستحقار و مشا وخلانا بتلاتة

- أنا : واش مكاتشوفهاش؟

- بجوج : لا مكانشوفو والو

- أنا : واقلة تشيرت .. ( عاد رديت لبال لبنت لي جات مع هداك وجه الويل كانت حاملة ) شكون انت ؟

- مصطفى : بنت سي أمين .. حسناء .. حاملة فشهرها سابع .. ولدها ماعندوش باه .. وجابها سي أمين تسكن معانا و ..

البنت حشمات وحنات راسها وسي مصطفى عاد مزايد فيه داير كي العكايزات .. أصلا هو فعمرو 72 عام

- سي مصطفى رجوع الله گول وقيس .. راه البنت معانا .. داكشي كايتقلقل من بعد راك ماخدامش فالجزيرة ..(تلفت ليها) مرحبا وألف مرحبا أبنتي

- شكرا (ومشات لحقات على باها وانا قربت لسي مصطفى كنسولو )

- خويا باقي شي شخصية فهاد القصة مابانتش .. أنا راه فظرف 48 ساعة عرفت لي يتحرق مايتم

- كنظن هادشي لي كاين ( وحرك راسو دليل على التأكد)

وصل ليل سي مصطفى وهداك أمين ( مجاتش معاه .. خصو يتسمى رُعَيْب .. خُوَيْف أما الأمن الأمان بزاف عليه) صاوبو الفراش لي جاب داك الأخير وأنا طيبت ليهم العشا .. مهم تعشينا كاملين فطبلة وحدة .. وصقيل دبانة ما كادورش .. كلشي حادر راسو على ماكلتو .. تاسمعنا شي حاجة ضربات فالكوزينة .. وبفعل لا إرادي عنقت سي مصطفى .. خفت أش غادير .. ماطلقت تا سمعت تعليقات الساخرة ديال وجه الدص

-هو : احم تاشاب عاد علقولو حجاب

-حسناء :أش هادشي لي ضرب ؟

-هو : والو كولي وسكتي

يخخخخ على زمر .. راه قد با سيدي .. تفو على عقل شحال موسخ .. من بعد ما سالينا نضنا أنا وسي مصطفى كنجمعو طبلة .. وهو قال لبنتو تنوض تنعس .. كانت باينة خايفة تنعس بوحدها لداكشي قاليا ننعس حداها ومع أنا خايفة كتااار منها

-نعس حداها انت لي باها .. وزايدون أنا وسي مصطفى ناوين نديرو تريكة والزرع والزريعة (شفت عينو الحمرا بدات تخرج ويدو بدات تزير) لا بلاش عطا الله ليام .. يالاه أبنتي .. تشبت غريق بغريق .. أش غانديرو

إيوا فرشنا بحال شينوا لعدم توفر الأتات صالح لنوم .. وبدينا نتعاودو .. عاودات ليا كي دارت حملات وهاد القصة بحال كاع البنات .. بغاتو وضحك عليها ومشا وخلاها .. وبدينا كانتعاودو على باها

-مكانحملوش هو سباب فهادشي كلو لي جرا ليا .. وكن كان عندي شي بلاصة نمشي ليها كن عمري نقبل نجي معاه لهنا .. و عمري نسمح ليه على داكشي لي دار فماما الله يرحمها

-وماماك تسمحي ليها ؟

-فلول لا .. ولكن من بعد ما بغيت ومن بعد ماحملت اه سمحت ليها وحسيت بيها

-واخا .. وهاد راجل لي كنتي كاتبغي من بعد ماخلاك مافكرتيش تقتليه ؟؟

-اه فكرت ولكن عمرني نقدر نديرها

-وإلى شفتيه مع شي مرأة واخرى كانت صاحبتك .. وغر بيك شيطان؟؟ (بقات ساكتة ) شوفي هادي قاعدة خوديها ولا خليها .. إلى ظلمك شي حد .. ديري راسك فبلاتصو .. مع كاع ظروف وحسبي حساب لشيطان تاهو .. إلى قديتي ديري داكشي لي دار سمحي ليه .. وإن الله غفور رحيم .. ماقديتش وبان ليك داكشي مستحيل ديريه .. ماتسمحيليهش وإن الله شديد العقاب .. حيت تا انت إنسان ماشي كاس ديال لميكة وتا نتي عندكي قيمة .. وبيني وبينك كاع الناس كيغلطو .. وإلى ماسمحتيش غاتبقاي معدبة فحياتك .. كل مرة غاتبكي فيها واخاعلى حاجة بسيطة تيقني غا تبكي تا على هاد جرحة

-ماعرفتش

-ماتزربيش .. ليام غاتوريك

نعسات وانا بقيت كنفكر .. هي مابغاتش تسمح ليه حيت بالنسبة ليها قتليها مها (نبع الحنان) .. وهو حاقد عليها حيت كتفكرو فمها ( فوجه وفتصاروفات حملات من واحد غير حيت كاتبغيه ) .. وأنا ؟؟ وانا أعباد الله أش حرك شطاطتي .. بديت كنعاود فالأحدات على الله نفهم شي وزة .. كنت فدارنا واكلة شاربة الحمد لله .. جاتني خدمة مالقيت فيها تاراجل مسكد جراو عليا من نهار لول .. وأنا مزالا فحالة يأس وهادشي لي خلاني نتمسك بنقطة ضو لي شفتها .. ومشيت مع صاحبتي عواطف لعرس لوسها على أساس حناها .. تصاحبت مع عائلة العروسة وخرجت معاهم كندور .. فرجعة شفنا العريس مع وحدة واخرى .. قلبنا طريق ورجعنا لدار لعروسة كاعيين .. هاد دار لي مكانت فيها تا شرطة د ريزو وكان قدامها جبل .. بديت كنطلع فيه كنقلب على ريزو تا وصلت لواحد دار فوق جبل .. واااع هادشي بزاف .. مهم هاد دار لي فيها قصة تاهي وعائلة مفرتكة .. وهاد الأحدات كلهم فظرف يومين هادشي بزاف على صدفة .. يومين أنا كنت كاندير فيهم غير القيلولة .. مافهمتش المقصود من هادشي كااامل وتحت قناع عجوز شنو المقصود ؟؟ .. ولي زاد لخل على خلول .. جنية عارفاني بلا قناع وعارفة بلي سميتي أحلام ماشي حليمة و مكانشوفها غيـــر أنا بوحدي

-حيت لي فعداد الأموات كايشوفو شي حوايج مكايشفوهمش الأحياء

جاتني هاد الجملة بحال البرد حدا ودني .. خلاتني نتبورش .. سديت عيني وغطيت راسي وبديت نقرا القرآن تا داني نعاس

فقت مع 6 ديال صباح ماشي حداكة مني ولكن حيت وجه الحاجة حليمة تطراسا فالوسادة .. هزيت صاكي وخرجت برا دار كنتسلت .. تخبيت فواحد القنيتة وبديت كنقاد وجبدت تصويرة جدة كنقل منها لا نزگل شي تكميشة وهادشي كلو على انغام ??عطيني صاكي باغا نماكي باغا نبان ليوم عگوزة ?? من بعد ماساليت رجعت وأنا نشوف وجه البغريرة واقف حدا الباب وكايخنزر فيا صبحنا على الله وماصبحنا على على عبدو

-(بغضب) فين كنتي ؟؟؟

-(بسخرية) كنت فجيبووووتي .. مشيت نقضي حاجتي ياعلى سؤال .. قجني عليها تاهيا .. هاااااه (بصوت الباتول)

دزت فيه ودخلت .. عارفاه دابا محتاجني ومايقدر يدير ليا والو .. تلاقيت مع سي مصطفى كان كايقلب عليا

-حليمة فين كنتي تخلعت ملي مالقيتكش.. بتي ماصبحتي ؟؟

-(بدلع) يتخلع عدوك لي مايبغيك .. علاش كاتقلب عليا أسي مصطفى يكما تكون تكركبتي فيا

-واخفت لا يكون جنون كركبوك من هاد جبل ... بغيتك تمشي مع سي أمين لسوق .. بغا يشري شي حويجات ومويعنات لدار وشي حاجة لحسنى

-ممم واخا .. ولكن إلى تعطت علم جدارمية .. لا يمشي يصفيها لي فشي قنت .. راه لا تقة فعتيقة

خرجت لقيتو كيتسناني فطونوبيل .. نوصفها ليكم ؟؟ بحال والو جاهدات فالحرب العالمية التانية .. بعدا لاندوشين دااااايزة عليها مايحيدهاش ليها طبيب .. تواضعت وركبت معاه فالقدام .. على اخر ايامك أأحلام وليتي تركبي مع واحد عندو سوابق .. كن يسيق ليك باك الخبار يشير بيك لگوانتانمو ديال كوكب زمردة .. وأنا كنفكر فنفسي ماحسيت براسي تا وليت كنفكر بجهد

-خمسطاشرعام وانت فلبنيقة وباقي عاقل تسوگ (عقت براسي ) احم تبارك الله عليك خمسة وخمامس والحرمل فالكمامس راك كبابل أ؟؟ .. ممم دابا كن مجاكش العفو الملكي كن راك باقي مكسل فعكاشة ياك ؟؟؟ گالوليا كانو الخميس يعطيوكم العدس بصح ؟؟ كانو يدير...

-غاتسكتي ولا غاتحسبي سنانك

-غاميكة أش فيهم مايتحسب .. تبقى توزن كلامك راني قد مك لالاك .. عمر شي حد قلل عليا الإحترام .. كلشي يبوس ليا يدي وراسي ويترجاو رضايا .. إلا انت.. زريعة كحلة الله يستر

-واش دابا كتقلبي عليا؟؟؟

-نقلب عليك ؟؟ مصطفى الأغا ؟؟ .. عرفتي بير جريلز ومافيهش هاد نفخة لي فيك .. على من زيناتو ويفطر غابلبخاخش

هنا شفتو زير على يدو و بغا يفراني .. وانا نضربها بسقلة .. وقلبتها تسبيح واستغفار تا داني نعاس .. ما حليت عيني تا حسيت بيديه كاتحركني

-خليني آ مي نعس غير شوية عافاااك (توگضت لقيتو محول فيا عينيه ) شكون انت ؟؟ (أي نسيت مابدلتش صوت) احم اححححح احم .. مال صوتي واقلة تشيرت .. بحال والو تكون سكناتني عيشة

كاع مجاوبني ونزل من طنوبيل وتبعتو

-هو : شنو خصنا نشريو لدار ؟؟

-واقول شنو كاين فدار باش مانشريوهش .. راه تاحاجة مكاينة .. تا غاوجد فلوسك وزيد تبعني

كان سوق كبييير .. وصوت ديال لبياعا وشرايا واصل لسما .. كان موالين لمواعن فقنت وموالين الخضرة فقنت والمفضل عندي"" البال "" فقنت أخووور وكبييير .. أخخخخ كن كانت معايا عطيطيف "عواطف" كن فليناه بياسة ببياسة.. علم الله فين شاداها دابا .. ولكن تا دابا مكاين باس

-أنا : زييييد نمشيو لهيه

-أش غانديرو تما راه كاينة غاجوطية

-أم أم هداك بال كاين فرق بين جوطية والبال .. جوطية كاتباع فيها الملابس المستعملة المغربية .. والبال الملابس المستعملة الخارجية .. ركز على داك الخارجية تلبسو وانت مرتاح .. أما جوطية تلبسو وانت خايف تكون كاتهضر مع مولاه .. على أنا ما قلتلكش شنو طرا ليا ملي تلاقيت مع مولات الحوايج لي كنت لابسة من جوطية .. ضرباتها ليا بواحد مولاتي تريشة شعري بكترة لحفاري لي وسطو تقول فيه تونية .. سيمانة نحك فتومة ..(مشا وخلاني كي الهبلة وانا تابعاه كنكمل ليه ) طلعو حوايج مشفورين .. وااازيد بنتك ما عندها ماتلبس

قنعتو بالجملة لخرة ومشا معايا كيهرنن إيوا وبدينا " هادي تجي قدها .. هادي تجيــني مع لون وجهي .. هادي تقول مفصلة عليا سبحان الله .. هادي محالش تعجبها ولكن أنا حمقاتني نديها ليا .. هااااادي تجي معاها .. ولكن عندها الكرش خليها ليا أنا "

-أجي شفتك كاتخدي غاليك ؟؟

-(هزيت واحد البياسة ختاريتها ليها) لا هادي ليها

-( هز بياساااااات هما) وهادو ليك

-احم (شفت واحد البالة ديال دراري صغار وتلفتو بيها) أيگووووو شحال زوينين .. حسنى باش حاملة ببنت ولا ولد ؟؟

-ماعرفتش

-تاخصك الإعدام ماشي غا الحبس .. كاين شي أب مكايعرفش بنتو باش حاملة ؟؟ من كرشها لمفرقة باينة عندها بنت

وبديت كنعزل ونتخير .. شحال كان حلمي نجي لحويجات دراري صغار أنا و شي راجل ونبداو نتعزلو ونتخيرو .. ومن بعد يخلص هو.. ولكن مع راجل يكون حلالي ماشي عندو سوابق مهم نقضيو بهادشي لي عطا الله .. زهري راه غادي في تحسن ملحوظ .. إيواسالينا البال وكملنا شرا و دوران... تا تلاقينا بمروان خو العروسة البوگوص المرتبط

-مروان : الحاجة حليمة أش كاديري هنا ؟؟ شحال وحنا نقلبو عليك البارح ؟؟؟

-أمين : الحاجة حليمة فين كاتعرفي هدا ؟؟؟

-مروان : الحاجة حليمة اش كاديري مع هدا ؟؟؟

-أمين : الحاجة حليمة اش بينك وبين هذا ؟؟؟

كانو معصبين ومقابلين مع بعضياتهم بحال شي تيار كهربائي .. وأنا فجنبهم قلبي كيفرفر بالسعادة .. أول مرة نشوف جوج رجال طولا وعرضا كيدابزو عليا .. إحساس زوين حسيت براسي أنا هي المرأة القوية دو بونغ سون .. ولكن فرحتي ماطولاتش ملي بدات شتا تصب مجهدة وهما مزال كايدابزو على الحاجة حليمة .. أما الحاجة حليمة إختفت مع المطر

اختفت الحاجة حليمة وظهر الحاج عبد الحليم الملثم .. مكانش عندي شي حل من غير نغطي وجهي كي عروسة شتا قبل مايرضوني كفتة .. هما مجاو يتلفتو عندي تا لقاوني كلي ملتمة كايبان غاعويناتي كيدورو

-مروان : الحاجة مالكي دايرة فراسك هاد الحالة ؟؟

-أنا : عندي الحساسية من شتا.. مكاتشوفش شتا يعطيك العما ( بداو كايشوفو فيها شي شوفات ماهوماش) احم تحصرت امم زعمة تزيرت كاينة شي بيت لما فهاد سوق

-بجوج : أ؟؟؟

-أنا : كابينة ..مرحاض.. طواليط .. بيت الماء .. بيت الخلاء .. توما عتقوني .. قبل لا طلقتها ليكم هنا تسرح

بدا يشوف شي فشي ماعرفو باش تبلاو .. كارتة متنقلة ..لي كيجي يبغي يعتارض كنبدا نشد فكرشي ونغوت .. شوهتهم تما ... مهم داوني لواحد طواليط ديال القصاريات .. يالاه جيت ندخل وهو يوقف عليا واحد بولحية .. مادخلي تا تحطي درهم .. أشغانقوليكم الله يسمح ليا منو وخلاص جففت بيه القصارية بسبان والمعيور .. واش أنا حياتي على المحك وهو فدرهم يعطيه الهم .. تا تدخلوا لتنائي العدائي عاد دخلت .. إيوا ملي دخلت أش غانقوليكم .. سيد ماخصوش تعطاه غير درهم .. خصو لحبس زائد الغرامة والإعدام وقف التنفيد .. بلا منعيف ليكم خاطركم .. درت مكياجي وخرجت كنشهد .. كانت شتا وقفات ولكن المشكل لكبير ولا أمين ومروان كيبانو ليا منهم ربعة لواحد .. شوف بدا يمشي ليا وشداتني دوخة كن ماشدوش فيا كن طحت الأرض .. ماعرفت شكون لي هزني فيهم خخخ كانت ضبابة فعينيا.. كانو مشاعري معطلة أما كن وصفت ليكم الإحساس.. مهم حطوني فطونوبيل وبداو ينيشو عليا ..ملي استعدت وعيي كاملا كان أمين كيسوق .. وأنا ومروان راكبين لور وحاطة ليه راسي على كتفو .. ريشبوند يا سلام

-أنا : مروان باقي أوليدي مرتبط ؟؟ احم هادي الموت مافيهااااش ..أنا أوليداتي قربت نودع .. وباقي ماشفت ما تشوفت ( بديت نبكي بصح ماشي كدوب مانعرف علاش)

-مروان : غايكون غير طانسيو لي طلع ليك ألحاجة .. ماعندكي مناش تخافي

-أنا : بصح ؟؟ مغانموتش ياك ؟؟

-مروان :الأعمار بيد الله ألحاجة ..الموت علينا حق ..وفعمرك ماخصكيش تخافي من الموت .. زعمة راك عشتي وشفتي .. وعندك خبررررة هههههه (فهمتو أش كيقصد ولد حرام ) .. الحاجة خصكي تمشي معايا لدار ماخصكيش تبقاي مع هاد المجرم القتال

-أنا : ( حيدت راسي من على كتفو) ونمشي معاك انت يا الغديدير ؟؟؟ لي غدرتي صاحبك مع مرتو ؟؟

-مروان :أنا ماغدرتوش .. وعمري فكرت فيها

-أنا : شوف وكان ؟؟؟

-مروان :هو كان ديما مشغول .. وكايجمع فلفلوس وكيخلي مراتو ديما بوحدها فداك دار المسكونة ..وحيت حنا كنا جيرانها كانت ديما كاتجي عندنا .. ماشي دنبي إلا ولات تبغيني ومابقاتش تبغيه .. بصح كانت كاتعجبني ولكن راه والله مكان بيني وبينها شي حاجة

-أنا : هاي هاي على يوزارسيف .. أنا كنتيق فرجال ديال المغرب .. تيقتك

-مروان : الحاجة واش معايا ولا معاه ؟؟ راه كان صاحبي .. ومانقدرش نغدرو

-أنا : دااك ساعة قولها ليه ؟؟

-مروان : راه داكشي لي خفت منو هو لي طرا ... شحال من مرة قلت ليها إلى مدارتش حد بيني وبينها غانقولها ليه .. ولكن راه ماقديتش .. تاجا داك نهار لي كنت خايف منو

-أنا : وعلاش مافكرتيش ترحل من داك دار وتسد عليك هاد البيبان ديال النحس

-مروان : كان الواليد يالاه مات وهو عارف .. وماصلاحش لينا رحلو وحنا لي غارقين كريديات .. ومجاتش نخلي الواليدة الله يرحمها واختي بوحدهم داك الوقت

-أنا : ممم فهادي غلبتيني

-مروان :ولكن مكانش من حقو يقتلها.. المجرم

-أنا : لا لا فهادي بلاتي ...سكت انت (أمين كان بغا يهضر) ول لبارح نسيتي أسي مروان أش درتي فاش شنقتي على راجل ختك فاش لقيتيه مع وحدة وخرى كن مافكيناكش كن راه مسكين كايكلو عليه كسكسو ... وتخيل كن لقيتيه مع هاديك لي مرتبط بيها انت .. تخيل أنا بعدا مانقدرش نتصور بشاعة المنظر (سكت ومالقى مايقول ) صافي سكتتي جاتك لقوى العسرية ... تفو أنا حالتي صحية مزرية ودايرة فيكم راسي (رديت راسي على كتفو هادي فرصة ماخصنيش نزكلها وبديت نهرنن) .. تقاتلو كاع .. باش يجيو جدارمية يديونا لكوميسارية .. على الله نلقى شي بوليسي بويگيص نزوجو لحفيدتي أحلام

وصلنا لحدا دار مروان ونزلنا من طنوبيل

-مروان : متأكدة ألحاجة حليمة بلي غاتمشي معاه .. إلى ماكنتيش باغا قوليها ماعندكي مناش تخافي ( حركت راسي زعمة متأكدة) لي بغيتي على خاضرك (ضار بغا يمشي بحالو)

-أجي بوس خالتو عاد سير

-(ضار عندي دورة طوبيس) أ؟؟؟؟

-غير ضحكت معاك .. بغيت نقولك عطيني تليفونك نعيط لحفيدتي عواطف

تنفس تنفس صعداء خلعتو مسكين .. ومالو كن يشوف وجهي لحقيقي يحصل ليه شرف هه..عطا ليا تليفونو وبقا واقف مع أمين .. وأنا بعدت عليهم .. ريزو عندو كامل ولد حرام فاش بغيتو داك نهار كاع مكان .. عيطت لعواطف هي لولى .. كانت عندهم مرونة تما قالت ليا بلي المعروضين باقي كايجيو ومع بعاد واخا العرس تلغى خصهم يرتاحو عاد يرجعو .. من بعد عيط لميمتي سولت فيها ببريفي لا تعاود تعيط لمروان نتفرش من جوج جيهات

-أحلام ياك لباس عليك إمتى غاترجعي ؟؟

-الحمد لله لباس سيمانة جايا إن شاء الله .. راه العرس يالاه غايبدا .. داكشي مضخم أميمتي طايح كتر من نايض و نايض دايخ

-واخا ياك كتشربي دواك بعدا .. خصكي ترجعي بكري راه عندك رونيدفو مع طبيب ؟

-اه ضروري .. راه هنا مكاينش ريزو وكنعيط ليك غير من تليفون العريس .. بلا ماتشوشي عليا بسلامة واخا واخا بوسي ليا با هه بسلامة موااح

يخ تفو نسيت دوا فصاك لي فيه الحوايج مع عواطف .. أصلا ماشي مهم مكايفيد بوالو .. الله يسمح ليا كنكدب عليها .. ولكن راه هادشي كلو كانديرو باش تشوفني عروسة وتشوف حفايدها

وصلنا لدار أنا وأمين ( هاد الأخير مابقاش معنكك بحال لول) ..جا سي مصطفى يهز داكشي لي جبنا وانا هزيت لحويج ومشيت كنوريهم لحسنى

-شوفي شنو شرينا ليك ؟؟ تااااراااان

-(هزات واحد لكسيوة ديال لينتات صغار) وااااو هادي شحال زوينة ؟؟

-هاديك اختارها ليك عديم الدوق ديال باك

-بصح ؟؟ (حطاتها بعيد)

-أجي باش حاملة بعدا ؟؟ ببنت ياك ؟؟

-ماعرفتش حيت مامتبعاش

-أويلي على ماعرفتش .. واش كاضحكي على الوقت .. سبع شهور راه الناس ولدو وانت مزال مامتبعاش (جاتني دوخة .. شديت فراسي) انتوما غاطيحو ليا سكر مافيهاش (نضت وبديت كنقلب على سي مصطفى) سي مصطفى سي مصطفى واااا سي مصطفى أجي نحلي بيك عويناتي

لقيت أمين باها واقف ليا فالعتبة .. دزت من حداه كنصفر كي الكوكوط ومعصبة ومخنزرة عاقداها صافي

-مالكي تاني ؟؟

-على انتوما تخليو شي حد مهندن .. بنتك أسيدي عندها شهر سابع وعمرها دوزات

-أشنو؟؟؟

-هاهو داير راسو كاع مافخبارو .. ديها شوية فبنتك وانت دايها غافراسك

مشيت وخليتو جنس ناقص .. تفو على عائلة كلها مشاكل .. مائة فالمائة درت شي حاجة فحياتي .. مايمكنش ربي غايجي ويحطني وسط منهم هكاك ... مشيت عند سي مصطفى عطاني مانهروْش .. هو لواحيد لي كايحن عليا فهاد دار .. كليت ومشيت نعست باش يتهدن ليا راسي لي كان غايطرطق عليا.. ماحليت عيني تاودنات لمغرب.. كانت دار خاوية .. نضت توضيت وصليت وقاديت المكياج وبديت نتسارى فالدار حسن مانبقى جالسة .. شوية وانا نسمع شي حاجة كتخرشش من واحد البيت جا فطاج لفوقاني كان يسحابني سي مصطفى لي فيه مشيت كنطل وإذا بيها صدمة العمر .. كانت فيه داك البنت لي حلات ليا الباب نهار لول واقفة فالبالكون .. مترددة وخايفة ومن بعد بضع تواني تلاحت .. قلبي كان غادي يسكت وبديت نغوت لربي لخلقني .. تا جاسي مصطفى لعندي نزلني لتحت وعطاني كاس ديال لما عاد بديت نتهدن .. صافي حواسي فشلو عليا وليت كنهضر غابزز

-سي مصطفى بغيت نسولك ... كي دار أمين قتل مرتو ؟؟

-والله ماعرفت ماكنتش داك ساعة فدار .. ولكن ملي جيت لقيتها مقتولة حدا الباب كانت مضروبة فراسها وسي أمين كان حداها

-وباش عرفتوها ماتت مقتولة ؟؟ وهو لي قتلها ؟

-هو عتارف ..أصلا كان عصبي وكانو ديما كيدابزو .. وبالخصوص ملي عرفها كاتبغي واحد أخور

بقيت ساكتة وكانفكر كيفاش عتارف وهو ماقتلهاش .. فيلم هندي هذا ..شاروخان ومايديرهاش واااع راسي غايتفركع .. وانا باقا كنفكر جات حسنى هي وأمين .. كان باينة عليها فرحانة .. علم الله فين كانو .. ولكن ملي وراتني تصاور ديال ليكو?غافي عرفت

-عندي بنيتة ألحاجة ؟؟ باش عرفتيها ؟

-مبروك على سلامتك إيوا هاكا نبغيك .. على أنا ماقلتلكش حملت بطناش لكرش .. جوج طاحو ليا ربعة ماتو وحظاش ولدتهم صحاح فصاح

-وكي درتي ليها ألحاجة ؟؟

-ولدت بتوام .. نوضي من حدايا يعطيك توام

ناضت مشات تبدل حوايجها وسي مصطفى خرج مشا يشوف الكلب مالو ينبح .. وبقينا غا أنا وأمين

-احم احمممم

-مالكي تاني ؟؟

-بغيت نقول شي حاجة وحشمت

-انت تحشمي إيوا الله ينعل لي مايحشم

-نقول ولي ليها ليها .. جبد واحد جوج حامضات وقطعهم ليا رونديلات وديرهم ليهم زيف حياتي .. يعطيك رضى راه راسي كيطبخ

-شفتك ضسرتي ومابقيتيش تخافي

-ومناش ماتقولش ليا منك ؟؟ شوفني بديت نترعد .. قطع قطع راه راسي غايتفركع .. أنا راه قد مك خصك تبقى تحتارمني وتسهر على راحتي .. ولا راني غانسخط عليك

مجاوبنيش هز الحامض وبدا يقطعو ليا .. ولا كيبان ليا حنيــن واقلة طلعات ليا سخانة .. حطو ليا فطبسيل

-وضبري دابا على زيف حياتك (يالاه ضار بغا يخرج وانا نوقفو بهضرتي)

-بغيت نسولك .. علاش قلتي ليهم قتلتي مراتك وهي نتاحرات ؟؟

-باش عرفتيها ؟

-لي كيقطع لحامض رونديلات لمرا شارفة .. مكايقتلش

-كتهترتي .. يمكن أنا ماقتلتهاش داك النهار ولكن قبل قتلتها مائة ألف مرة

قال جملتو وخرج باينة كايحس بتأنيب الضمير .. بغا يعاقب راسو بالإعتراف ديالو ولكن فالحقيقة عاقب بنتو لي عاشت بلا أب وأم فأهم فترة من حياتها-سي مصطفى بغيت نسولك ... كي دار أمين قتل مرتو ؟؟

-وباش عرفتوها ماتت مقتولة ؟؟ وهو لي قتلها ؟

-هو عتارف ..أصلا كان عصبي وكانو ديما كيدابزو .. وبالخصوص ملي عرفها كاتبغي واحد أخور

-عندي بنيتة ألحاجة ؟؟ باش عرفتيها ؟

-وكي درتي ليها ألحاجة ؟؟

-ولدت بتوام .. نوضي من حدايا يعطيك توام

ناضت مشات تبدل حوايجها وسي مصطفى خرج مشا يشوف الكلب مالو ينبح .. وبقينا غا أنا وأمين

-احم احمممم

-مالكي تاني ؟؟

-بغيت نقول شي حاجة وحشمت

-انت تحشمي إيوا الله ينعل لي مايحشم

-شفتك ضسرتي ومابقيتيش تخافي

مجاوبنيش هز الحامض وبدا يقطعو ليا .. ولا كيبان ليا حنيــن واقلة طلعات ليا سخانة .. حطو ليا فطبسيل

-وضبري دابا على زيف حياتك (يالاه ضار بغا يخرج وانا نوقفو بهضرتي)

-بغيت نسولك .. علاش قلتي ليهم قتلتي مراتك وهي نتاحرات ؟؟

-باش عرفتيها ؟

-لي كيقطع لحامض رونديلات لمرا شارفة .. مكايقتلش

-كتهترتي .. يمكن أنا ماقتلتهاش داك النهار ولكن قبل قتلتها مائة ألف مرة

قال جملتو وخرج باينة كايحس بتأنيب الضمير .. بغا يعاقب راسو بالإعتراف ديالو ولكن فالحقيقة عاقب بنتو لي عاشت بلا أب وأم فأهم فترة من حياتها

دازت سيمانة على فاش جيت لهنا لدار سي مصطفى وأمين وحسنى .. سيمانة دازت واعرة واعرة واعرة .. واخا كنت فيها مريضة شوية ولكن تقاتلت فيها .. أصلا هاكا كايكونو الع?ايز واخا عارفين يامهم معدودة ولكن كايعيشوها باش ماعطا الله ... أصلا إحساس تكوني عجوز إحساس زوين .. كتحسي براسك كبيرة مابقى عندكي ماتخسري فهاد دنيا كلشي لي قدامك صغير عليك وصغير فعينيك .. مكاتحتارمي حد لي فقلبك تخرجيه على لسانك .. باختصار ضاربة دنيا بركلة هه .. مهم غانقوليكم على هاد سيمانة كيدازت بالمختصر باش مانطولش عليكم ودعيوا فيا .. بالنسبة لجو كان فصل الربيع مابقى ليه والو يدخل .. مع العروبية دنيا كلها مخضرة .. شبعنا أنا وحسنى دوران .. مرة مرة كنت كنزل عند عائلة مروان .. كنخضّْر عويناتي بيه وكنتجمع مع جداه وكنعطي دروس لختو في إختيار الزوج المناسب وبعض النصائح للأرنبات وداكشي هه ... أما بالنسبة لسي أمين أنا وياه فالعذاب .. عمري ننسا داك نهار لي كنت فيه كنعوم فالواد بوحدي وعلى شوية مايحصلني للكافر .. باقا عاقلة بديت كنبقبق تاكانت غاتزهق ليا الروح ...أنا وياه دايرين كي المش والفار...أهم حاجة ولات علاقتو بحسنى كاتقاد وبالخصوص ملي بديت كنلمح ليها بلي ماقتلش مها .. أما سي مصطفى داك سيد سكر مخلط بعسل كان ديما كايعواد لينا القصص بليل قبل مايبداو يدقو علينا جنون نوضو نركدو .. وهاكدا دازت سيمانة طارت دغيا فرمشة عين .. ليوم الأحد وعارضاني جدة مروان أنا وحسنى ..أمين ماعتارضش كنظن الحقد لي هازو من جيهتم بدا يختفي .. إيوا مشينا وجلسنا معاهم تال داك 4 .. وهو يجي أمين وسي مصطفى وياريتهم ماجاو بدا يكلاكسونيوا علينا حدا الباب .. خرجنا عندو كاملين بدينا نتسالمو مع الحاجة وحفيدتها ومروان باش نمشيو .. يالاه بغينا نطلعو فطنوبيل .. وحنا نشوفو واحد طنوبيل جايا فرمشة عين عرفتها .. ديال يوسف وكانت معاه عواطف .. لااااا مامتيقياااااش وااااع .. وصلو ونزلات عواطف عنقاتني .. وقدام كاع الحاضرين بدات كتهضر

-أحلاااام .. الحمدلله لي لقيتك كنت غانموت بالخلعة .. قالي باك بلي مع 6 ديال صباح غايتسنانا فالمحطة .. ناري كن مالقيتكش .. أحلاااااااام علاش باقا دايرة راسك شارفة ؟؟ ياك العرس ماكملش .. أيييي (عاد شافت العروسة وعائلتها) رجااااء ختي بقا فيا الحال على داكشي لي طرا .. فيها خير ودابا يجيب ليك الله ما حسن .. الحاجة سمحوليا ماكنتش باغا نكدب عليكم بلي أحلام صاحبتي ماشي جدة .. وبلي دايرة غير المكياج وهو لي مبينها كبيرة .. درنا هاد الحيلة غير باش تمشي معايا لعائلة راجلي ومانمشيش بوحدي بحالا مقطوعة من الشجرة ..ماكناش قاصدين نكدبو عليكم .... سمحووووليا ( هي كتهضر وأنا راسي كيدور تمنيت الأرض تشق وتبلعني .. بغيت غير نقوليها سكتي وماقديتش .. تبلوكيت .. وماعرفتش كي غاندير نوصف داكشي لي كنحس بيه بحالا تأنا يالاه كنعرف الحقيقة معاهم .. بحالا كنت فأرض الأحلام وتخبطت فأرض الواقع... جراتني لطنوبيل ) يااالاه أحلام يالاه نوصلو ماعندناش الوقت

ركبنا فطنوبيل وأنا ماعندي لا وقت لا وجه لا كلمات باش نعتادر .. داك تسنطيح لي كان فيا ماعرفتش فين مشا عطيتها غير لبكا ومزادت طنوبيل تا كان قلبي غايسكت .. بديت نبكي نبكي نبكي عواطف ماعرفات باش تبلات وهي لي عمرها شافتني كنبكي .. عيات ماتسول فيا علاش ؟؟ ولكن أنا براسي معارفاش علاش .. واش حيت تحصلت بلي كنكدب ؟؟ ولاحيت ولفت العيشة معاهم وغانتفراق معهم ؟؟ ولا حيت دور الحاجة حليمة هنا سالا ؟؟ ولا شي حاجة واخرى أنا معارفاهاش .. تفارقنا مع يوسف .. وركبنا أنا وعواطف فالكار بحال كي جينا نهار لول ... صراحة لا ماشي بحال ؟؟ بزاف ديال الحوايج تبدلو واخا غير فسيمانة .. رحلة العودة كاملة بديت كانعاود لعواطف أش طرا ليا مرة نبكي مرة نضحك ومرة نسكت تا تقوليا كملي

-واااو هادشي كلو طرا .. وماطلعتيش ساهلة أعفريتة.. وماخفتيش من هداك أمين .. جاب الله زربت عليك ودخلتك لطونوبيل .. أما كن حفر ليك قبرك فبلاصتك

-لا مايديرهاش واخا هكاك حنين وقلبو هشيش .. غير مكايبينش

-أمممم ياكما طحتي فيه وجيتي على زنافرك أمسخوطة .. تكون هادي هي أسعد سيمانة فحياتك جوج رجال واحد ينسيك فلاخور

-خخخخ ماشفتيهمش أعواطف فاش كانو كيدابزو عليا ... قلبي قاليا حيدي عليا بغيت نخرج .. خخخ كن كملت معاهم شهر ياعواطف يوليوا يتخاطفو عليا هههه كن غير ماجيتيش يا عدوة الحب

-قالك الحب .. شوفو شكون كايهضر عليه .. راه كن مانوصلك ليوم عند باك غايوصلني أنا عندي مي للقبر .. أجي قاليا عندك شي رونديفو ديالاش؟؟

-داكشي غا تبرهيش

-أحلااام .. سمحي ليا إلى قلت ليك باك أكبر زقرام عرفتو فالبلاد .. يديك دوزي عند طبيب على تبرهيش؟؟؟ وانت لي كنتي قلتي ليا دوا خصكم دومونديوا عليه عام وتا يجي مول الفرماسيان يشنق عليه عاد يخلص .. اه لقيت شي دوا ديالك فصاك ديالاش ؟؟؟

-(حطيت راسي على كتفها) عواطف أنا غانموت توحشت مروان .. رجعيني عند أمين .. أحح حكا ماقلتليكش كانو عندو الغمازات .. غير هو مكانش كيضحك باش يبانو .. كانو غايبانو فعرسنا كن ماجيتيش فالتوقيت الغلط

-(حيدات ليا راسي من فوق كتفها) أحلام داك تنوعير ديالك ودخول والخروج فالهضرة حفظتو .. ديالاش داك دوا ؟؟ وديالاش هاد رونديفو لي عندك غدا ؟؟

-ماكنتش باغا نقوليك .. ولكن غاتعرفي غاتعرفي .. عائلتنا عندها واحد المرض وراتي فكل جيل كايتصاب فرد على الأقل وهو عبارة عن ورم فالدماغ .. ومن سعدي مجا غافيا .. غدا غاندير سكانير باش نشوف طريقة العلاج لي غانبدا بيها هاد إلى كان علاج .. أصلا كاع لي مرضو بيه فعائلتنا كلهم ودعو

-واش بصح ؟؟ كاضحكي عليا أأحلام ياك ههه ؟؟

-ياريت .. واحد نهار فداك دار المسكونة كنت يالاه بغيت نعس وبديت كنفكر علاش كيطرا ليا هادشي وعلاش أنا بوحدي لي كنشوف هاديك لمرأة لي ماكاتبان لتا واحد غيري جاني واحد صوت فودني كايقول : لي فعداد الأموات كايشوفو شي حوايج مكايشفوهمش الأحياء

-هاديك غير وساوس شيطان

-كنتمنى .. كنت باغا نتزوج وندير وليدات .. على الأقل نخلي شي أتر فهاد دنيا .. ونلقى شكون لي يدعي ليا .. ماشي بحالا عمري كنت .. (بالمزاح ) ولكن انت يا عديمة الإحساس وقفتي ليا فسعدي أما كانو عندي جووووج فرص .. كن خليتيني نزيد شوية كن ولدت منهم بجوج

-ياك ألمنحطة .. والله إلى خلاوها ناس زمان سيوانة كتموت وعينها فالفلوس

-تتت فلااااالس ... فلاااااااالس لا هادوك الديك رومية

مهم كملنا الرحلة بمرة بكا مرة ضحك تا وصلنا منين جينا

دازت شهرين على داك المغامرة .. شهرين دازت طويلة تقول أعوام على داك سيمانة لي دازت بحال نهار .. أصلا هاد شهرين دوزتها كاملة سبيطارات وتحاليل وتجرجير وتمرميد .. وحالتي عاد مكاتزيد للأسوء .. شيميوا لي تقرر ليا كعلاج تبين بعد المعانات بلي مكايوصلش للخلايا السرطانية بسبب حاجز الدم .. بعد المرات كنتمنى كن غير قتلني أمين ويغبرني ولا هاد العذاب .. ولكن مابغيتش ليه الحبس خخخ ... على ذكرو عيط ليهم واحد النهار .. غاتقولو منين جبت النمرة .. هذا هو فائدة الحووب خخ .. لقيت راسي حافظة نمرت مروان عن ظهر قلب .. عيطت وعتادرت ليه وشرحت ليه الظروف .. تقبل إعتذاري بصدر رحب وقاليا مسخوط بضحك بلي كن كان عارف بلي أنا مزالا صغيرة كن كنت حلالو ومت ولادو واخا عندي خبررررة خخ .. والله تا جلاخة داك سيد عييت مانحلف ليه بيه غير ?روب ديال العيالات مخشية فيه كنديرفيه الدعم والتقوية أما أنا بريئة براءة الذئب من دم يوسف .. مهم قلبناها ضحك واعتادرت تا من جداه وختو تاهما سمحو ليا دغيا .. أما العائلة تانية العنيدة واااع .. حسنى دغيا سمحات ليا وشكراتني كاع .. أما سي مصطفى خخ الله يسمح ليه دار ليا فيها روميو والحاجة حليمة جولييت وأنا لي فارقتهم .. مرمدني جرجرني كرفصني وشبع فيا سبان وفلخر قاليا غير كنضحك معاك...ضحك ليك المووووت وتجيبك لعندها أسي مصطفى خرجتيها مني .. صراحة كنت خايفة عليه فاش ساق أمين لخبار بلي أنا ماشي مراتو غير كدب عليه .. ساعة قال ليا مقاليه والو .. هنا زعمت وقلتيه يدوزو ليا نهضر معاه .. ساعة لمعفر لاخور مابغاش تقول طاح فيا على راسو الله يمسخو .. إيوا ملي كملات هاد شهرين وصلني لخبار بلي حسنى ولدات .. الدار ماخلاونيش نمشي بحجة المرض والعلاج .. ولكن أنا كنحس بلي مابقى ليا والو .. يا غانشوفهم هاد المرة يا عمري غانشوفهم ...و إلى كنت غانموت قبل خصني نعيش.. وهاكا قنعتهم ومشينا أنا وعواطف ... ماتخيلوش باش حسيت ملي شفت الوجوه لي كانو غاكيشوفو الحاجة حليمة كايضحكو ليوم كيشوفو أحلام المريضة بشفقة وحزن .. دموعي عييت مانحبس فيهم ولكن غلبوني لغالب الله .. وانا لي عمرني بكيت قدام شي حد .. وديما قالباها ضحك وتقشاب ... وشحال ما ظاهرت بالقوة ليوم قدام الناس ليكنبغي كنعترف تهزمت .. مهم زوين فهادشي كلو .. ولي ضروري مايكون وسط ظلام نور ... ماقديتش نطلع فجبل باش نوصل لدار حسنى ..ومروان تكلف بهاد المهمة وهزني بحال شي رابعة ديال لحم خخخ

-مروان خويا باقي مرتبط هههه

-ت العقدة بدات تحل .. طلبات ليا جوج جوج من الحاجة وانا مقادش .. تقبلي بيا انت نخليها ؟؟

-جوج جوج من الحاجة ماقديتيش عليها؟؟؟ وانا لي كنت ناوية نطلب ربعة وتور و بقرة .. زيد زيد ياخيبة عمري

وصلنا لدار .. تلاقينا سي مصطفى عند الباب ... كان موجد ليا المعيار ولكن من بعد ماشاف حالتي جاتو لقوة ... دخلنا لداخل عند حسنى كانت متكية وبنتها فيدها .. من بعد ماباركت ليها ومن بعد شوية ديال البكا والعزا لي درنا .. شديت بنتها فيديا .. كانت زويونة بحال مها ولكن أنا بغيت نشد فيها

-عواطف أجي شوفي مكاتشبهش هاد الغزويلة للحاجة حليمة ههه

وكلشي وافقني فالرأي وقلبناها ضحك ... سولت سي مصطفى على أمين قاليا راه يالاه جا وكيقطع شي خشب برا .. وقررت نزعم نمشي عندو لقيتو حدا نيت برا

-(بتبعكيك) سي أمين ؟؟

-شكون انت ؟؟

-أ ؟؟ أنا حفيدة داك المرأة لي شنقتي عليها لهيه (شيرت ليه فين شنق عليا أول مرة)

-آآآه داك شارفة .. كن نعاود نلقاها قدامي هاد المرة نحفر ليها قبرها ماشي غير نشنق عليها

-هيييي علاش مسكينة ؟؟؟

-كدبات علينا ومن بعد ماولفناها مشات بلا تعطينا تبرير ... عاوناتنا ولكن هي فاش مرضات ماخلاتناش نعاونوها .. ومن بعد جايانا صفرة كاتسامح معانا زعمة

-(كنحبس فدموعي) علاش مجاوبتش فاش بغيت نهضر معاك ؟؟

-حيت عارف غاطلبي مني غير سماحة .. ومن بعد ماعمرنا نعاودو نشوفوك

-واخا ... هانا جيت برجلي .. واش غاتسمح ليا ؟؟

-لا

-(هاد المرة ماحبستش دموعي ) واخا ... أنا مريضة وغانموت واش غاتسمحش لمريضة على فراش الموت ؟؟

-لا

-واخا كنتمنى تسمح لميتة فقبرها من بعد

-لا

-قلبك قاصح .. عاودها لراسك .. كاع لا تسمح

-هااا الحاجة حليمة بانت هههه

-والله تا عندك الغمازات ...زيد ضحك هههه

-هههه حمقة .. ماعندي علاش نسمح ليك .. أنا لي سمحي ليا ..كنت عارفك ماشي شارفة .. ولكن كنت غادي معاك فتمتيلك باش نعرفك شكون انت

-وكي درتي ليها ؟؟

-إلى كنتي انت مكلخة ماشي كاع الناس مكلخين .. داك نهار فاش شنقت عليك لهيه .. بانو ليا تجاعيد غا مرسومين ماشي طبيعين ولي زاد أكد ليا هو لصق ليا شوية فيدي .. واش ماقديتيش تشري شي مكياج غلا من هذاك شوية .. وشفتك تا داك نهار فالواد هههه ضحكتيني ساليتي معايا ... أما فاش طاحت عليك شتا فالسوق ووليتي كيعمر المختار .. راه قسما تانعست وأنا شاد كرشي ههه

-ياك أعديم الشرف .. والله على هادشي لا سمحت ليك .. أصلا أنا محتاجة الحسنات .. الله لقيتهم باردين

-هههه أجي واش بصح غاتموتي؟ .. شاري واحد البقعة بغيت نبني فيها جامع .. إلى كنتي غاتموتي نديرو على سميتك

-دار ليك .. أول واحد نشوفو فرحان بموتي .. هههه ضحكتيني واش بصح انت هو أمين لي كيشبه لإبليس

-(زير على يدو) هو بشحمو ولحمو أش بان ليك نصفيها ليك دابا

-لا غربلها ليا حسن .. عندك زهر كايفرتت لحجر أما كن راك باقي فعكاشة .. وكاع مايحصل ليك الشرف وتشوف الحاجة حليمة .. لي القلة النادرة لي شافوها فهاد دنيا

-(بجدية) أحلام واش كتقصحي ؟؟

-هههه حشومة تسول مصاب بسرطان هاد سؤال ..ولكن إلى كان عندك الفضول نجاوبك .. اه كتقصح بالمرض .. وكتقصح بالدوا .. وكتقصح ملي كاتشوف ناس لي قرابين ليك كيتألمو بسبابك وبسباب ماعندهم مايديرو ليك .. اه كتقصح ملي كتشوف ناس بصحتهم وانت لا و ملي كتفكر بلي تاانت كانت عندك صحتك ولكن ماحسيتيش بهاد النعمة ومادرتي بيها والو .. كتقصح ملي كاتشوف شعرك كايطيح ولونك كايبهات وعينيك كايدبالو .. كتقصح ملي كاتشوف يامك معدودة .. والموت لي كايخاف منها كلشي هي راحة ديالك .. أنا بعدا محظوظة جربت إحساس ديال عجوز كلشي كيحتارمها ويطلب رضاها وهي عنيدة وسليطة لسان .. شكرااا حيت خليتيني نحس هاد الإحساس ومافرشتينيش وماجريتيش عليا ملي عقتي بيا

-(نزلو من عينو جوج دمعات) واش مكايناش شي علاج تقدري تبراي بيه ؟

-علاش غاتزوج بيا إلى بريت .. وليتي جد مغانقبلش بيك ههه...بقات ليا غير العملية .. هاد الأخيرة لي نسبة نجاحها ضئيلة .. بيني وبينك مكنظنش غاتنجح .. والموت مكاتقصحش كلنا غانموتو لي كايقصح بصح هو الدور (ترتيب)

-زعمة مخايفاش ؟؟

-خفت ولا ماخفتش غانموت غانموت لاش غانضيع بقية أيامي فالخوف .. كنت كنتمنى تكون نهاية قصتي بحال كاع ناس .. حب و زواج وولاد .. ولكن لا هادو ماشي نهاية .. يقدر الحب مايدومش وزواج ماينجحش و والولاد يقدرو يطلعو مساخط .. وكاتبقى الموت هي النهاية لي عند كلشي .. الكبير وصغير .. الغني والفقير .. وحتى الموت نهاية غير الإختبار .. أما نهاية الحقيقية هي فاش كتحاسب وتاخد جزائك .. أمين نقولك واحد سر هه .. هاد ليامات وليت كنحلم راسي بزاف عروسة ههه .. كنت عارفاها والله تا كنت عارفاها مكاينش راجل لي غايستاحقني فهاد الدنيا .. لداكشي ربي خلاه ليا للأخرة هههه

(بعد خمس سنوات ... (عواطف تحكي) )

-سي مصطفى : أحلااااام .. حسنى .. سي أميــــن .. أجي تشوفو شكون جا

-عواطف : سي مصطفى سمح ليا الحااااج مصطفى على سلامتك ملي جيتي من الحج .. حج مقبول إن شاء الله

-سي مصطفى : لهلا يخطيك أبنتي .. دخلي مرحبا ... سيدي يوسف وليدي مروان بنتي رجاء لالة الحاجة زيدو دخلو

وحنا داخلين ماتجي غير داك العفيريتة ديال أحلام كاتجري عند مروان .. والله ماكدبات أحلام فاش شافتها أول مرة قالت بلي غير الحاجة حليمة ماخلات منها قشعة .. ولي زاد لخل على الحامض سماها جدها على سميتها ... الله يرحمك أ أحلام متي وخليفتك مزالا كادور .. تقولي مزالا نشوفوك بعينينا .. دخلنا لداخل رحبات بينا حسنى وسي أمين لي تاهو بدا يبان فيه الشرف .. جلسنا مع حسنى ورجاء والحاجة ومرت مروان كنتجمعو ورجال مشاو ينفخو نفاخات ديال عيد ميلاد أحلام الخامس دغيا ليام كاطير

-حسنى : إيمتى أعواطف غاتولدي ؟؟

-عواطف : شهر جاي ..غير سكتي راه قاليا طبيب بلي عندي توام الله يفك جرتي على خير وصاف

-حسنى : آمين .. الله يفك وحايلك بيخير

-عواطف :آمين .. دعاوي أحلام خرجو فيا .. كانت الله يرحمها فينما نعصبها دعي ليا بتوام هه

-الحاجة : الله يرحمها كانت بنت مزيانة فينما نصلي ندعي معاها مسيكينة

-عواطف : بصح كانت عفيريتة .. عرفتي كن كانت دابا معانا .. تقوليك هداك باك أحسنى ماتزوجيهش ؟؟

-رجاء : عندي ليه حفيدتي أحلام هههه

-الحاجة : شقا ونقا فنة صافي هههه

-مرات مروان : شوقتوني نتعرف على هاد أحلام .. تا مروان كايعاود ليا عليها

-عواطف :مانصحكش .. كان كايعجبها مروان ولكن فاش عرفاتو مرتبط هه حطات لعين على سي أمين واخا كان صعيب ولكن كانت تعشق التحدي ههه الله يرحمها

بدلنا الموضوع وبدينا كنهضرو على أشغال الحياة .. أما أحلام غاتبقى ديييما فقلوبنا محفوظة .. واخا كان المرض غالبها و الألم قاتلها .. ولكن تقاتلات وتشبتات بالحياة تا لأخر لحظة فحياتها .. الله يرحمها .. حلمتها واحد نهار عروسة كانت لابسة البيض وفرحاااانة .. وإن شاء الله يكون هذاك هو حالها لهيه فرحانة والجنة مثواها إن شاء الله .. وهادي هي قصة عجوز فالعشرين .. بنت فالعشرين دارت راسها عجوز .. باش تختابر شعور كانت عارفة عمرها غاتعيشو .. وتعيش لي بقا ليها من حياتها بقلب في العشربن وبمرح في التسعين

تمت بحمد الله

النهاية

شيبانية فالعشرين

آخر المشاركات

قصص مغربية بالدارجة