غادي لليسي فطوبيس بحال ديما صبااااح بكري فجيبي 10 دراهم ,بكترة ما كنطلع فهاد طوبيس حفظت بنادم منين تيطلعو وفين تينزلو ولأغلبية دراري ديال ليسي لي تنقرى فيه متندوي مع حتى واحد فيهم أنا غير تنحضي من بعيد وكلعادة تيوقف فنفس لبلاكة وكتطلع واحد لبنت كتقطع ورقة ديما دايرا لكيت ومكتدوي مع حتى واحد بحال لهيت ديالي ولكن هيا مقودة عليا وكتمشي فطوبيس غير حيت راشقة ليها على طوبيس وصافي حيت تقد تاخد طاكسي بقل من ثمن ورقة طوبيس من ديك لبلاصة لي كتطلع منها حيت قريبة لليسي معرفتش علاش كتطلع فطوبيس وحتى فليسي كتباليا بوحدها مكتحيدش ليزيات أنا عزيز عليا نحظي من بعيد بحال شي قناص دبا بقيت تنشرح ومقلتش ليكم شكون أنا لمهم سميتي مهدي لعاصمة لإقتصادية ابب عندي عائلة صغير بحال كاع ناس منبع لحنان ربة بيت عندها أنا هو لكبير لقراية وكورة ولبحر وكين لبرهوش خويا صغير لقراية ولعقل ديالو هيا زنقة وصداع عندو 11 عام صغر مني ب 8 سنين ولكن شيطااان أه كنت غننسى لعبد لي أنا ولدو تنعيط ليه بسميتو حميد عندو طاكسي صراحة ماشي عندو هو غير شيفور طاكسي ديال واحد سيد أخر ولواليد كان خدام بيه مني تنعقل على راسي وهو خدام بيه ماشي شي خدمة ولكن عايشين بيخير لواليد ولواليدة من أطيب خلق الله منعرف شيطان ديال خويا لمن خارج وليت تنشك فلواليدة حيت دري زايد نغزة مكينش لي منوضش معاه صداع وطالع قبيح وصحيح هادشي غير 11 عام أنا مول 19 تنخاف منو زاعم ومتيحشمش لعكس ديالي أنا ولد لعبد دار تيليفون قبل مني فاش تصاحب هو أنا باقي معارفش شنو هو لحب(لبغو) جيل مقود ونهار لمقود نهار تلقاني نبع الحنان حاط يدي عليه روح ديالها وعينيها بحالا أنا غير مربياني لمهم خلينا من لعائلة ديالي حتى نرجعو ليهم من بعد أسيدي عندي لباك وخوكم وخا معاود سيزيام مجبتش فيها مزيان ضارب فلجهوي 6 ومقديتش نعاود لعام زوج مرات سو كملت من لبدية ديال لعام قلت غادي نجمع راسي شويا نعوض ولكن كيفاش غتجمع راسك وتقرى ونتا عائلتك على قد لحال قليل لي تيكون عندو هاد دماغ أنا عطيني غي ماتشات مع دراري شي series أفلام ولا شي أنيم خطيني من لقراية ولكن فنفس لوقت كتبالك لقراية هي لي تقدر تهزك من بعد عائلة كتشوفك نتا باغياك تخدم وتهزهم شي نهار لمهم فحال ديما طوبيس ليسي دراري لي تندوي معاهم تندويو على كورة من غير هادشي لعشران والو قليل بلأخص فلقسم أنا داك ساط لي تيبرك لوور خاصني لابدة نحط ظهري على لحيط سقطت لعام لول ديال لباك لواليد مبقاش تيدوي معايا سيمانة على قدها محملش راسو بالأخص حتى لبرهوش ديال خويا منجحش بزوجنا فنفس لعام ومع جاراتنا بنات ناس راكم عارفين لأحياء شعبية وتيبقاو على لواليدة أنا ولدي جاب أنا بنتي نبع لحنان كتبقى تعاودلي داكشي بلحرف باش تدير فيا نفس ونقرى وأنا عدويا هاد لهضرة وصراحة كنت عارف راسي مغاديش ننجح بديك 6 ديال لجهوي بدا لعام تاني طلبت إستعطاف غير على ود والديا أما أنا مبقيتش حامل داك ليسي بدا لعام وقبلوني انا راه وخا زليلة فلقراية ولكن ضريف معندي حتى مشكل مع لأساتذة بدا لعام لواليد مدلي ألف درهم قاليا تقدالك شي حاجة وركب وقلب ليك على شي مدرسة دوز فيها سوايع غندير معاك جهدي إلا منجحتيش هاد لعام غتخرج تقلبلك على حرفة بغيتك تطلع شي لعبة فهاد لبلاد ولكن نتا مباغيش دبا عندك أخر فرصة هاد لكريطينة غير ساروت غادي يحل ليك شحال من با... لقيت فين نزيد سوايع ديك 1000 درهم راحت غير فوراق ليسي وسوايع بقات عندي 90 درهم قلت مع راسي هانية أصلا باقين عندي حوايج خاصني غير باش نبدل شي صباط ولا سبرديلة ولكن 90 درهم أش غتجيبلك غادي راجع للدار نجقر لواليد تاني يزيدني شي حاجة ودايز من حدا جوطية تيباليا واحد خونا مشرماال حاط واحد صباط قدامو وحاطو غير بوحدو وصباط مقااود باينا ساوي ولكن معنديش معاش نلبسو مغاديش يجي مع ستيل ديالي ولكن عجبني بقيت تنشوف فيه قاليا خودو قيصو أعشير قلت ليه وخا درتو فرجلي جا هو هداك قلت ليه بشحال وهو يصدمي قاليا 300 درهم هو يستاهلها ولكن معنديش هاد لفلوس قلت ليه لله يسهل قاليا شحال جهدك قلت ليه عندي 90 درهم فجيبي دبا ولكن شي نهار تنزل لدرب مورا لقيصارية قول ليهم مهدي ولد مول طاكسي مرحبا وهو يضرب صباط فبلاستيكة ومدوليا قاليا بصحة غادي راجع لدار 0 درهم وهانية موالف بهادشي دخلت للدار باش داخل للدار قاليا لواليد عندك صرف؟ قلت ليه بلي مبقى عندي حتى درهم لفلوس لي بقات عندي خديت بيها هدا من طريق قاليا وخا أرا نشوفلك كيداير شدو بقى تيدور فيه قاليا هدا ب 90 واش كتضحك عليا لمهم خليه ليا هاد سيمانة أصلا مغاديش يجي معاك سير حتى تمشي معايا تتقدى ليك شي حاجة على قدك ركعني فصباط ههههه تلقاكم تتقولو مال هاد ساط تسطى حكر بزااف على صباط راه قصتو قصة دبا ركعني لواليد فيه من بعد تجي وقتو ونرجعو ليه حتى هو لمهم أول مرة نطلع فطوبيس هاد لعام غادي وكنتسنى ختنى تطلع من لبلاكة ديال ديما ولكن مطلعاتش وييع يمكن بدلات ليسي ولا بدلات لمدينة كاع أححح لحب لأول راح فداكشي وخا من طرف واحد مشيت عاصر حدا ليسي باقي محلوش لباب وهيا توقف حدايا واحد رونج ديك ساعة مكتشوفش رونج بزاااف وهيا تنزل ديك لبنت لي فرونج جاب دورة وداز من حدايا خونا تقريبا قدي وفسر صراحة تقال غنديو غا شبر داخل لليسي وتنقول راه خوها ولا شي لعبة أصلا أنا عارفهم لاباس عليهم بقيت تندوي مع شي دراري تيجقرو فيا باش نلعب معاهم وأنا مباغيش هاد لعام غنقص من كورة شويا بقاو مشادين معايا دخلت معطل للقسم غادي لبلاصة ديال لعام لي فات لور وهيا تباليا ختنى باركة فيها بوحدها صدمة فحالا صرفقتيني صافي هادي علامة إلاهية لبنت تبقى تقرى فنفس ليسي وتجي معايا فنفس لقسم وتبرك فلكوان ديالي من لفوق مشيت للكرسي حداها وبركت وهيا تهز صاكها وتحولات حتاقراتني بواحد لقطة مقودة مع مع وهيا تدوي معايا لأستادة شكيت فيها شافت ختنى شنو دارت حيت فديك لحظة قالت ليا مهدي نفس لبلاصة أولدي فحال ديما خاصك تبدل راسك إلا بغيتي تنجح قلت ليها أه شكرآ غادي نحاول ولكن لبلاصة منبدلهاش بقات كتضحك وبدات كتشرح وأنا عرقت فديك ساعة مرڭت كون ما حشمت كون سبيتها متديرش هاد رد لفعل لمبرهش قدام بنادم وخا تكون فيا سيدا ومدواتش كاع بقيت بارك تنشوف فواحد ستيلو قدامي وتنفكر فباش كنت نقدر نجاوبها(متقولش ليا عمرك درتي هادي) خارجين مع ل10 وحاقد قلت مع راسي غتقولي سمحلي غندور فيها بنت لعبد محاشاتهاش ليا كاع غادي راجع فطوبيس وتنقول مع راسي ساط مالك واش خيب؟ لا مبياش واش موسخ؟ لا لواليدة دايرا ليا بحال داكشي ديال لحبس بزز مني ندوش 3 لمرات فسيمانة , لبلان ماشي فزين ولا شي لعبة لبلان فرونج لفلوس لحبة كون كنت ضارب شي حطة مقودة يمكن مكانتش ديك ساعة غادي تبدل لبلاصة دخلت للدار شاعل ولقيت لبرهوش ديال لخوادري منوضها مع لواليدة على لمدرسة تيقوليها باغي نخرج معنديش دماغ دلقراية وتيغوت عليها أنا خاصني غير منين ندوز ليه تيحساب ليه غلبنا شديتو عطيتو شي عصى معمرو كلى بحالها يمكن حيت أنا أصلا كنت معصب وخاصني فيمن نخرج داكشي لواليدة كتجر فيا ولكن معامن أنا جلطيطة(خو جلوطة😂منعرف منين تيجيو هاد لمصطلحات) واحد ساعة وهو يدفعني حل لباب وخرج لواليدة باغيا تبعو حبستها ريحي نتي لي خرجتي عليه فين عندو ميمشي دبا تضربو شمس ويرجع.. دازت ساعة لولا تانية تالتة رابعة لخامسة لواليدة صافي عيطات على لواليد ومنوضاها معايا خرجتيه نوض قلب عليه لبرهوش غبر تنسول عليه فدرب والو مكينش لوحيد لي شافو قاليا راه باليا غادي جهة لبحر مشيت لتما ملقيتوش رجعت لدار لوالد نفس لقصة ماقيناهش فحتى بلاصة رونا دنيا عليه لبوليس راكم عارفين إلا مكانش دم ميخرجوش ضلام لحال كان مزال عندي أمل يرجع ولكن فاش ضربات 11 وهو مزال مرجعش مخلينا حتى بلاصة مبقى عندنا فين نقلبو بركنا فدار كنتسناوه يرجع ولا نسمعو شي خبر عليه والو ولمشكل منقدرش قاتلني نعاس ومنقدرش ننعس تشرالي صداع معمري تخايلتو مع والديا شي سبان معمري حلمت نسمعهم تيقولوه ليا لدرجة وليت شاك بلي أنا مربيني وهو لي ولدهملبرهوش مرجعش ضربات 2 ديال ليل صافي تخلعت عليه حتى أنا لبرهوش دارها هو ديما مرجل عليا وخا صغير أنا منقدرش نخرج فهاد لوقت معرفناهش فين مشا ولمشكل أنه فعينين والديا أنا لي خرجتو مخلاونيش ننعس حتى واحد منعس ودار عامرا بجيرانا تيبكيو ملي سمعو راه مشى للبحر تيقولو راه يمكن غرق.. بقاو محكرين عليا بزااف وبالأخص لواليد شعلني ديال بصح قلت ليه شوف أنا مدرتلو والو غير ضربتو حيت كان تيغوت راه خرج غير حيت كان باغي غتبدل لموضوع ولا خليني نخرج حتى أنا وهو يفهم راسو شويا نهار لول تاني سيمانة لبرهوش مرجعش هاد سيمانة متنعسو متناكلو بحال ناس غير لبكا وصداع وتقلاب ندمت حتى حطيت يدي عليه لبرهوش نفسو حارة دبا الله أعلم فين مشى, أنا مبقيتش تنمشي لليسي ديك سيمانة ولكن مشكل تاني إلا مبقيتش تنمشي غيتخلق ليا مشكل وأنا راجع غير بستعطاف ومنها غير نبعد على جو دار ولبكى وصدااعهم والديا بحالا مبقاوش حامليني تنكون بارك حتى كنبدا ندمع زهر ديال ليهود وعائلة كيف دايرا وبنادم وبلاد كيفاش دايرا تفو وخا نكون من نسل أبو لهب..رجعت لليسي قلت للمدير شنو كان واقعلي محتاج دوك نقاط ديال لمواظبة وسلوك رجعت لليسي لواليد مبقاش تيعطيني ريال تنمشي لليسي غير سالت ولا تنضربها على رجليا هنا قلت ساط ما حياة ما تا لعبة هادي ليدين لي ميصوفيونيش نقطعهم غير متقلين عليا خاصك تقلب على خدمة لقراية ماشي ديالك راجع من ليسي على رجليا وتنقلب على شي خدمة وقفت على واحد خونا تبارك الله واقف عند لباب فواحد لبار دويت معاه قاليا دخل عند لبنت لي شادا لاكيص دوي معاها قلت ليه وخا شكرآ دخلت عند ختنى مشرملااا ديال بصح بديت داوي معاها قالت ليا واش فايتلك خدمتي فهادشي؟ قلت ليها لا قالتلي خرج عند مولشي راه يمكن واقف عند لباب قلت ليها واش مول تيشيرت لكحل قالت ليا اه هو هداك خرجت عندو تاني لقيتو باقي غادي مع لغادي وجاي مع لماجي قلت ليه حتى هيا صيفطاتني عندك بقى تيضحك قاليا شحال عندك من عام؟ قريب ل20 كتقرى؟ أه ولكن موحال واش غنكمل شي مشاكل خونا بدا تيسول فيا أشمن مشاكل معندو ميدار حتى هو باغي غير معامن يشد لهضرة عاودتليه لبلان لي وقع ليا سيمانة قبل بتفاصيل قاليا نخدمك ولكن بشرط تبقى تمشي تقرا وتنجح تقدر تجي هنا على حساب لوقت لخاوي عندك حتال ليل ولكن غتصبر حيت فليل غادي تعطل ديال بصح قلت ليه نيت يلاه نبعد على دار شويا حتى ينساو لمشكل ديال خويا سلمت عليه شكرآ وتحركت لدار قاليا غدا أجي دخلت للدار كالعادة لواليدة مكتدويش معايا حتى أنا مبقيتش باغي ندوي معاهم أنا مالي درتلو داكشي بلعاني ضربتو وهو برهوش خرج هوما لي ضسروه كتر من لقياس دبا لقيت خدمة غادي نصوفي راسي ونبعد عليهم حتى يتوحشوني ويوليو هوما يقلبو عليا أحسن حاجة نقدر نديرها هاد لعام أنني ننجح يمكن كلشي يتقاد إلا نجحت لغد ليه غادي لليسي مكين لا كورة لا والو واقف عند باب لقسم تحل دخلت بركت لقدام بقيت تنشوف فلأستاد حتى سالات لحصة وخرجت غادي للخدمة بكري دخلت عند ختنى قلت ليها راه قاليا سيد غدا أجي قالتلي راه وصاني علك وهيا تعيط على واحد لبنت أخرى ماشي بنت ميمة فصراحة تكون عندها شي 40 ولكن تتبان صغيرة قالت ليها وريه فين غادي يخدم وسرابس ديك لميمة وهيا تدير فيا واحد تبسيمة سنانها بيضيييين أساط عينيا ضروني كنت غنقوليها أحمباك سدي فمك أخالتي وهيا تقولي تبعني دخلاتني لواحد صطوك تتوري فيا غادي سميتها وهادي شنو سميتها قالتلي هادشي لي كين برك هنا لي جاك فسربايا عطيه شنو باغي بشويا بشويا غتعلم واش كتقرى؟ شحال فعمرك؟ وبقييييت تنعاود ليها لبلان حتى هيا ودوك لميمات تيكونو حنان قالت ليا متديرش فبالك أولدي دبا كلشي يتقاد مع لوقت.. بقيت بارك كل مرة وتيجي عندي شي واحد فسربايا تيبقى طالقها عليا نهار لول داير بلاصتي معاهم وصل ليل وهو يدخل عندي ساط مولشي مديتلو كرسي علاش بارك بقى طالقها عليا حتى هو أنا كنت وكنت.. ودبا.. ولبارح خسرت.. هاد لقرعة ساويا وهادي ساويا.. سيد ضريف حق الله وباغي غير معامن يشد لهضرة وعزيزا عليه كورة قاليا من شحاال هادي ملعبتها قلت ليه مرحبا دير غير نتا وقت كين تيران ودراري قاليا صافي غدا فلعشيا نلعبو ونجيو لهنا من تما.. غادي خارج فليل مع ديك ل1 وهيا تقوليا لبنت لي عند لاكيص مهدي بلاتي مداتلي 150 وقالتلي غدا جيب فوطوكوبي ديال لكارط معاك إلا بغيتي قلت ليها وخا شكرآ غادي راجع للدار تيليفون طافي لا مزيكا لا والو وصلت للدار لقيت لواليدة باركا عند لباب هادشي مع ل1 ونص دليل قالت ليا أش هاد لوقت فين كنتي؟ باك خارج تيقلب علك؟ قلت ليها كنت خدام خليتها ودخلت لبيتي حتى جا حميد عاد بدا تيدق فباب لبيت حل بدا تيغوت فين كنتي.. قلت ليه كنت خدام كتعطيني باش نركب باش ندير شي لعبة بحالا نسيتيني حتى أنا قاد براسي من هنا لفوق.. بقى تيقرى عليا ومرة مرة تيلوح ليا خوك غير الله لي عالم بيه قلت ليه لواليد راه قلت ليك شنو كاين أنا لقيت خدمة رتاح من جهتي دبا قلب على ولدك أنا خليني داير بالي مع قرايتي بغيت ننجح هاد لعام.. قاليا لله يرضي عليك وخرج مزادش كلمة لواليدة قالتلي لعشا قلت ليها مفياش غير بصحة نيشان لمخدة نعااس لغد ليه فايق بكري خاصني نمشي لليسي طوبيس فحال ديما مقطع ورقة وشاد بلاصتي لور فين كين لحنان ديال طوبيس دوك لكراسي لي حدا لموطور أححح وصل لبلاكة لي كتطلع منها ديك خيتي مبقيتش تنحمل نشوفها من داك نهار هيا سبابي طوبيس ضرب وااحد لفران وهيا تطلع وقفات لوسط درت راسي متنشوفش فيها وأنا جاري معاها ل10 شافت فيا وهيا تجي للبلاصة لي حدايا قالت ليا وخا نبرك شفت فيها خودي راحتك بركات مداتلي يدها سلمت عليها يلاه غتدوي وأنا ندير لكيت وطلقت لمزيكا شعندها متقولي تمشي عند مها هيا سباب لمشاكل دخلنا للقسم لقيتها باركة فطاولة لي تحولت ليها أنا لقدام بركت حداها هادي مالها تاني صعرات عليا مرة تنوض مرة تلصق حدايا مدويناش لحصة كاملا خرجنا مع ل10 لموت ديال جوع فجيبي 145 درهم ديال لبارح خرجت عند واحد سيدة كتصرع لمسمن حدا ليسي تنضرب تنضرب خليت عندها شي 20 درهم كنت حاكر كرشي طلعات فران وقاد بحومة رجعت لدار نبرك معاهم شويا وهيا تمدلي لواليدة سوارت ديال دار قالتلي هاك إلا جيتي معطل ولقيتينا ناعسين وباستني لواليدة معمرها باستني حتال داك نهار قلت ليها شنو واقع؟ شي عيد ليوم؟ قالت ليا لا مالك كبرتي عليها.. ولاو حنان معايا غادي خارج مع لوحدة قاليا لواليد هاك باش تركب؟ قلت ليه غير رتاح عندي وراه غنتعطل فليل كتر من لبارح حيت غنمشي للسوايع وغندخل معطل للخدمة قالتلي لواليدة لله يعاونك وخرجت واااع واش هادو واليديا ولا كدبت؟ دخلت واحد ساعة ديال لفلسفة وجريت معايا دراري باش نلعبو ماتش ضد خونا وعشرانو تلاقينا وحتى هو جايب غير لكيليميني وبنادم شبعااان بليات سوفل حازق ضربناهم ب8 وغير تكايسنا عليهم رجعت دوشت ومشيت لسوايع شويا عاد للخدمة هاد لخدمة قاداتلي وقتي وكلشي كان خاصني نخدم من شحال هادي يمكن بارك فداك صطوك تنقرى فدوك لأسماء لعجيبة وهيا تبدا تصب شتا واصلا كين لبرد فلبلاصة طاحلي لخوادري فراسي وأنا نبورش فبلاصتي هاد لبرهوش منعرف فين مشا زعما تكون تضرب فيه هاد شتا زعما يعاود يرجع غادي راجع من ليلة تانية ليا فلخدمة كانت شتا وهو يوصلني ساط مولشي عندو حدييدة ولد ناس بقينا داوين طريق كامل على كورة لقراية وداكشي خونا عزيز عليه يبقى يعاود على حياتو دخلت لدار لقيتهم ناعسين يلاه بدلت حوايجي وقصيت باش ننعس كل نهار وحلاوتو تاني وبلاناتو تنقاد حجاباتي وداكشي لي غندخل معايا وأنحفظ من لول ديال لعام أه ختنى بقات مرة مرة كتدير شي بلان باش ندوي معاها ديما كتبرك حدايا فطوبيس ولا فلقسم مبقيتش تنشوف داك مول رونج موصلها حتى أنا كنتبعصص عليهم مرة مرة بشي حطة ولا سيد لي خدام معاه تيوصلني ليسي من لخدمة هاد سيد عاشر ديال بصح حتى بنادم لي خدام معاه عاشرتهم دوك سوايع ديال لخدمة تيدوزو غير ضحك وتطلاع أول مرة غادي ندوي مع ختنى من بعد داك لبلان لي دارتلي فلقسم لاعبين رياضة كالعادة كورة عيت وأنا نبرك فوق واحد لكراسي بركات حدايا قالتلي سلام وعليكم سلام قالتلي مهدي ياك؟ بقات كتدي وتجيب معايا فلهضرة سمحلي على داكشي لي درت داك نهار فلقسم راه باليا عادي نبدل لبلاصة ومفكرتش غادي تنويها فشكل ولا تقلق.. قلت ليها لبلان لي وقعلي بسباب داكشي لي دارتو داك نهار قالتلي واش مرجعش؟ قلبتو؟ خليتها باركة وتحركت لسوايع معرفتش مالها مرة تقمعك مرة تبدا هي تدوي معاك حال وعقل تمالنا حنا غير محطوطين لوقتما بغاونا لواحد هو لي يدير لعز لراسو شويا.. لمدرسة لي تزيد فيها سوايع فشكاال تاني تيقراو معايا غير بنادم مكلمن داك نوع لي تيدوي غير ب عافاك.. شوف شوف.. حشوما علييك.. ومواضيعهم كلها كتمحور على لقراية تيفهمو بعضياتهم أنا بعيييد عليهم فاش تنكونو نتسناو داك لأستاذ لي تيدوز لينا سوايع تنخليهم داوين تنجبد تيلي نشوف شي series ولا شي أنيم حتى تيدخل خونا وتنجمع تنبغي نسمعو شنو تيقول خاسر صرف ديال بصح باش ندخل نفهم وبصح شحال من لعبة درتها فدماغي من عندو.. حتى سالات دورة لولا ضارب 16,75 على بات بات مهم لواليد متيقش كان غيبدا يدمع لخوادري ديك لمدة ديال 3 شهر مسمعنا عليه فيها والو حتى لبوليس مقدو يعرفو عليه والو بحالا نيسنا صافي مبقيناش تندويو عليه فدار بدات دورة تانية خاص تشوفو لواليد كيفاش ولا كيتعامل معايا بحال شي عشيرو وفاش تيكون مسالي تيوصلني هو لليسي ختنى ولات ديما كتوقف معايا بالأخص فاش تنمشيو فنفس طوبيس وبحال هيتي ديال لمزيكا بشويا بشويا نسيت بلي تقريبا هيا سباب حتى مشى لخوادري بغيت نعرفو غير شنو دار وفين مشى حتى إلا كان مات بعدا نترحمو عليه مكانش خاصني نضربو داك نهار.. واحد نهار غادي فصباح فطوبيس ختنى مطلعاتش منين موالفا قلت راه يمكن مغاديش تجي ليوم وقفت قدام ليسي وهو يوقف عليا سيد لي خدام عندو مفهمت والو قاليا راه كان دايز من هنا وقال يدوز عندي قاليا بلي باغيني نقاد شي سلعة فلمحل ونحسبها هو مغيكونش مدلي واحد لورقة فيها شنو غيوصل ومشى غير تحرك هو وقف ساط مول رونج وهيا تنزل منها ختنى وااع حسيت بالخيانة وخا معارفش شنو تيجيها ومبيني وبينها والو.. غير نزلات وهيا تقصدني وقفات معايا خونا جاب دورة و وقف حدانا تاني قاليها أجي ومشات عندو تاني منعرف شنو قاليها وهيا تدخل نيشان لليسي طلع وهبط فيا بواحد لقطة مقااود قلت مع راسي غيكون خوها واقيلا خليه.. دخلت لقسم لقيتها باركا حدايا لقدام وأنا نرجع لور رجعات حدايا وأنا نغيرها لقدام تاني بحال لمش ولفار بنادم تيقرى معانا مفهم والو وايلي مالنا حنى ماشي رجال خرجت مع ل10 غادي خارج خاصني نمشي نيشان للخدمة وهيا تشدني من يدي مفهمت والو
_قالت ليا مهدي أنا مخطوبة_وأنا مالي؟
_وصافي نتا عارف وأنا عارفة بلي تنعجبك
معرفتش علاش قالت ليا هاد أنا مخطوبة ولاش لاصقاني فطالعة ونازلا ملي مخطوبة خليتها ومشيت للخدمة لقيت داك لكاميون واقف كيتسنى سلمت عليه قلت ليه بلي خونا مشغول و وريتو لورقة قاليا واخا بداو تيدخلو داكشي حسبتو ومشى بقيت تنقاد فيهم حتال لعشيا دخل مول لمحل وهو يجي عندي حسبنا داكشي تاني قاليا صافي غير سير باراكة عليك غادي خارج وهو يقوليا مهدي مهدي سمع غنمشي لفرانسا سيمانة جايا ولبنت لي عند لاكيص غتمشي معايا بغيتك نتا تكلف بيها غير حتى نرجعو.. قلت ليه وخا إلا كانت غير شي سيمانة ولا زوج هانية قبل لإمتحانات قاليا أه غنرجعو بزربا سيمانة بالحساب غادي خارج وهيا تشدني ختنى وراتني شنو خدمتها.. رجعت لدار باش حليت تيليفون تنلقا ختنى من لمدرسة مصيفطالي مساج c meriem معنديش نمرتها قلت ليها شنو؟ حرفية نيشان ومن بعد مفهمتكش والله مرة تقمعي بنادم مرة تبقاي لاصقاه فطالعة ونازلا ونتي مخطوبة كيفاش قديتك؟ قالت ليا مهدي راه كتعجبني ولد ضريف وتقريبا فوطوكوبي ديالي.. ومن بعد راك دويتي قبيلا نتي مخطوبة؟ ولكن إلا كنت تتحس بشي حاجة من جهتي غندير معاك لمستحيل ونتا.. وأنا.. ملي ختنى بقات كتقوليا ديك لهضرة ديال لحب وكتمدح فيا أول مرة فحياتي دبت أنا وليت زبدة قلت ليها غدا وندويو لغد ليه تلاقينا نفس لهضرة كنت عارف راسي زوين غير ضايع أصلا كلشي على لأخلاق مدخلناش بزوج داك صباح غادي نحطبها غياب هاد شهر ولكن من بعد أنجمع راسي داوي أنا وختنى لهضرة لحلوة لي معنديش معاها أنا لواليدة ومعمري قلت ليها تنبغيك بقا غير هيا ولكن غادي معاها فلخط كتعجبني حتى نتي.. بدات داويا ليا على ساط مول رونج لي خاطبها وبلي ولد خالتها ختنى هيا لي عند مها باها مات فاش كانت صغيرة..كملنا ديك سيمانة غير تسركيل سيد مشا لفرانسا مع ختنى وأنا لي كان خاصني نقابل لاكيص وبحالا مخليني مقابل كلشي لي تيبغي يدخل ولا يخرج تيقولها ليا فليل داوي مع ختنى فمساجات وهيا عارفاني خدام وفاش وبلي مقاااودة عليا.. فليل بقيت حتال شي 4 دليل قتلني نعاس لفلوس معرفتش شنو ندير ليها لمجر عامر وكاميرا عند راسي غنهز شي حاجة غادي نخرج على خدمتي وسيد داير فيا تقة وخا ماشي بزااف باش عرفني عطاني سوارتو كاع لي خدامين معاه مفاهمين والو علاش مشا هكذا وعلاش دا معاه ديك لبنت لغد ليه فصباح عيطليا قاليا دي لفلوس معاك لداركم وغيجي سيد لي تيجيب سلعة خود داكشي لي مبقاش وخلصو لمهم ديك سيمانة دازت بحالا كينين هوما وهاد ساط تيطلع فلوس ديال بصح ليلة لعياانة تيدخل شي زوج دلمليون وليت خايف غير لواليد يشوف لفلوس ويمشي بالو بعيد وخا مكنتش تنعس بزااف فيها ومبقيتش تلاقيت بختنى مريم وممشيتش فيها لليسي ولكن هانية رجع خونا وهو يصدمنا سيد مشا تزوج بختنى تما.. غادي معايا لدار باش نعطيه فلوسو وتيعاود ليا كيفاش تزوجو وبلي ختنى مشرملا ورجولة داك نوع لي كتفيقك ب"واي وتا فيق" وصلنا للدار قلت ليه ولله حتى تدخل معايا تحسبهم لداخل قاليا واخا دقيت فلباب حلات لواليدة سلم عليها قلت ليها هدا هو سيد لي خدام معاه ودخلنا للبيت تيحسب فوق لبيرو فوق كتوبتي وأنا بارك فوق سرير تنعاود ليه على لخدمة وعلى ختنى لي مخطوبة وشنو قالتلي خونا تيحسب بيديه وداوي قاليا عادي ياك كتعجبك لبنت زوينة؟ جبدت ليه تصاور وريتهم ليه قاليا هادي وخا تكون مزوجة دير معاها حل وخا تعرف تهرب معاها شوف لبنت كي دايرا إلا خليتيها تزوجات عرف راسك بغل.. خونا بقا تيحسب وتيعاود وريتو لبونات ديال سلعة وداكشي لي تباع درهم مناقصاش قلت ليه كمال خويا راه مخديتش شي ريال هاد سيمانة وهو يدير بحالا مسمعنيش قاليا سير قابل قرايتك شويا نشوفك فليل.. تنقول هدا مالو واش هرب ليه معطاني والو جمعت كتوبتي من فوق لبيرو ضربتهم فشكارة ومشيت لليسي موجد ليهم شهادة طبية شحاال هادي دخلت للقسم وهيا تجي تبرك حدايا تاني ديك لهضرة ديال توحشتك.. دخلات لأستادة جبدت واحد دفتر تتباليا شي حاجة وسطو حليتو كنلقا فلوس غير زرقات تفكرت خونا كان تيحسب فوق لكتوبا ختنى مفهمات والو قالتلي أش هادشي منين جاوك قلت ليها غير عشيري كان تيحسب فوق كتوبتي يمكن طاحو ليه خرجت وأنا نعيط عليه سلام سلام راه طاحولك شي فلوس وسط كتوبتي قاليا لا مطاحوش أنا درتهم تما دياولك هادوك فليل وندويو وقطع مشيان لحمام سديت عليا وتنحسب شي 5 الاف درهم متيقتش عاد فهمت خونا دار ديك لعيبة ديال حجة وزيارة منها يخلصني ومنها يشوف واش غنشدهم نخبيهم ونسكت ولا غنسول لا يكونو طاحو ليه..غير ضربتهم فجيبي مبقاتش راشقا ليا على لقراية لأستاذ مغاديش يطلع 5 الاف درهم فسيمانة خرجت أنا وختنى جبنا تسركيلا وبقات كتسول على دوك لفلوس حتى عاودتليها لبلان ديالهم بقينا حتال لعشيا قالتلي بلي غتقول لماماها بلي مباغياش تبقى مع داك خونا قلت ليها شوفي أنا معاك لي بغيتيها نديرها معاك.. تتولي gentlemen فاش تيكون جيبك عامر رجعت لدار وأنا نمد للواليدة واحد 400 درهم قالتلي خلي فلوسك عندك دبا تحتاجهم من بعد درتهم فديك لمخدة لي تنعس عليها كاع رزقي فيها تمشي شي نهار غيوقع ليا بحال خونا ديال كبووطي♿ خونا دار واحد لحفلة بمناسبة زواج ديالو ختنى تزوجات ولات كتباليا زويينة😂 شيطان ينعل بات بات مو.. فديك ليلة غادي خارج فلييل قاليا بقى معانا شويا ونوصلك تنشوفو شبعااان شراب قلت ليه لا غنتمشى لدار باغي ندوي مع ختنى فتيلي قاليا وخا غدا أجي بصباح باغي ندوي معاك, سكران ولكن عارقل على راسو خارج مع ديك 2 دليل تنتمشى فجنب شارع وفودنيا لمزيكا تندور شفت ورايا تتباليا واحد لمرسيديس جايا طياارة صوتها سمعتو وخا داير ليزيات تنقول هدا مالو باغي يطير؟ تيباليا قاصدني بعدت فوق طريطوار وهو يضورها طلعات فوق طريطوار عرفتي مع لبرد وفيا لموت ديال نعاس مفيا لي يجري محسيت بوالو ضربني تلاحيت فوق طوموبيل طحت وهو يتم راجع ليا مقديتش نتحرك معرفتش واش ضربة ولا لخلعت سمعت صوت ديال سيد لي خدام عندو تيغوت بسميتي ديك طوموبيل وهيا تعلق تنقوليه عاوني نوقف وهو تيدفع فيا للأرض تيقوليا متحركش غير خرج بنادم لي كان معروض تجمعو عليا هادي أخر حاجة عقلت عليها حال عينيا فكلينيك فبيت مفيه حتى واحد ورجلي معلقا وفيها لكبص يدي نفس ديكور شويا عاد تفكرت علاش أنا تما وشنو وقع ليا معلقين ليا صيروم وداكشي تنشوفو غير فتلفازا دخلات عندي واحد لفرملية شافتني فايق تصدمات باش خرجت هيا كتجري دخل لواليد ولواليدة وكمال وحتى مراتو لواليدة كتبوس فيا داوين معايا بحال شي واحد مبقالو والو ويموت دخل طبيب بقى تيسول فيا باش كتحس قلت ليه عادي محاس بوالو قاليا متحاولش تحرك بزااف وغادي تخرج بزربا على سلامتك خرج وهوما يدخلو دار تاني واحد 3 دقايق عاد حسيت بلي ولاد ناس ملبسيني ليكوش وااع تنسولهم شحال وأنا ناعس هنا قاليا كمال 9 ايام درتي فيها 3 لعمليات يدك ورجلك وراسك بقيت تنشوف فيهم 9 أيام بحالا غير قبيلا تضربت لواليدة غير كتبوس فيا داك لبوسان لي مدارتوش ليا فحياتها طان خاصني نتضرب شحال هادي.. سولتهم على خونا لي ضربني هدا كان باغي يقتلني من غير أنه تبعني سيد راه كان راجع مارشريان باش يتأكد بلي مت كونما كمال خرج فديك ساعة كاع غادي يقتل ديلمي جاو لبوليس شكون لي يقدر يديرلك هادشي قلت ليه مغاديش نشري صداع مع شي واحد عندو ديك طوموبيل راه حدييدة بقاو تيسولو قاليا إلا تفكرتي لبلاكا ديال طوموبيل ولا شي حاجة أخرى علمنا وخرجو.. تنبغي نتحرك عاد تنلعقها بحالا عندي جاج فلحمي باقي كنتسنى لواليدة تفيقني صباح ويطلع هادشي غير تنحلم دخل عندي غير كمال ومراتو هاد لمرة قاليا خلعتينا علك فخبارك بعدا بلي قالو لينا غادي تموت وبلي غير غنضيعو فلوس على والو أطول 9 أيام غندوزها فحياتي البرهوش تخلعت علك ديال بصح نوض بزربا راه باغي نمشي نسافر فصيف ونخلي ليك كلشي تاني هاد صيف تطلع مصيريف ديال طوموبيل تسركل ليا نتا وساطة راه جات سولات فيك وجابتلك لورد, قلت ليه بصح راك داوي دبا ولا كتضحك قالت ليا مراتو وحق الله واحد لبنت زوينة سولات عليك وجابت لورد.. خرجوا دخلات لواليدة ولواليد قلت ليهم بغيت نمشي للدار معجبنيش لحال هنا قاليا لواليد رتاح أولدي رتاح راه مبقاتش شي عضمة صحيحة. مدلي مرايا ولاد لعبد حلو ليا راسي بحال شي بواطة ديال طون غيكون هرب ليا لفريخ فاش حلو عليه بقيت ناعس تما تراه نموت ومنديرش شي حاجة فديك ليكوشة نهار كامل وأنا مقاتل مع ديك لفرملية قلت ليها وخا نبقى حابس لبولة شهر مهبوبة هادي😂 إلا شرف إلا الكرامة يا أعداء الله كل نهار تيجيو عندي وديك لماكلا ديالهم كتخليني نتمنى كون غير مت ديال بصح كنت نقد نمشي للجنة نضرب لقوصوص ديال بصح كلشي ممكن إن رحمة الله واسعة.. قاليك شهر ديال نعاس تما عاد نقدر نخرج يعني هاد لعام راح فداكشي واقيلا لواليد بقى عليا غادي ندويو معاهم ونشوفو كيفاش دير تدوز لإمتحانات لي فاتوك.. لعام لي درت مجهود شوف شنو وقع ليا فيه , تيليفون مانعينو عليا بغيت ندوي غير مع ختنى نشوف فين وصلات واش دوات مع دارهم واش دوزو شي إمتحانات.. واحد طبيب داوي معايا قاليا بلاما تعاود تفكر تلعب كورة ولا شي رياضة إلا تمشيتي فحال ناس حمد الله عرفها راه معجزة.. وييع قالك كورة راحت فداكشي هاد سيد متيعرفنيش , دوزت هاد شهر غير تلفازا ونعاس وترويض وحفاظة لواليدة لله يسمح ليا منها شادالي بيديها وكلشي مكتفرقش عليا كملت شهر فداك صبيطار وليت بحال شي عود ضعافيت ديال بصح مبقيتش حامل ريحتي ولا ريحة داك صبيطار عرفتي بعدا واحد لحاجة ولله إلا أكبر نعمة عطاهالك الله هيا صحة تنوض تخرج تدخل لحمام بوحدك شي حاجة كانت كتجيني عادية دبا عاد عرفت بقيمتها حتى كتفقدها ولا كتوقع ليك شي حاجة تخليك تجرب حياتك بلا ديك نعمة مخرجيني على كرسي مهرس من يدي ليسرى ورجلي ليمنى وما خفي أعظم غنبقى نزور صبيطار كل سيمانة حياتي كاملا يمكن.. داوني لدار بعض لمرات كنقول كون غير قتلني وهناني من هاد لعداب بازليهم دوك لمشلولين شهر واحد كنت غادي نتسطى فيه , رجعت لدرب تاني قلت لدار مباغي نشوف حتى واحد محاملش راسي وغيزيدو عليا بديك لهضرة حتى دراري ولبنات لي تيقراو معايا مبغيتش نشوفهم سيمانة فدار عاد داني لواليد لليسي فوق لكرسي لواليد لله يسمحلي من جهتو طلب ورغب باش خلاوني ندوز داكشي لي فاتني من قسم لقسم دوزت لإمتحانات لي فاتوني كان عندي وقت نحفظ أصلا مكان عندي ميدار وداكشي ديجا قريتو لعام لي فات حتى كمال سيد لي كنت خدام معاه مخلاش من جهدو مرة مرة تيجي تيخرجني نبدل لجو ولا تيديني لترويض ختنى مبانتش ليا فليسي نهار مشيت.. لواليد مبقاش لاقي لوقت يخدم بطاكسي ومع ديال مولاه وهو يرجعلو سوارتو من نهار عقلت عليه وهو تيسوق داك طاكسي منقدرش منعاونوش عيطت عليه دخل لعندي لبيت مديتلو ديك لمخدة لعجيبة قاليا مال هادي؟ قلت ليه وسطها شي فلوس خودهم حتى نوقف على رجليا وغادي نعاونك كلشي غادي يتبدل دبا حتى أنا.. وبصح واحد لوقت كنت بحالا حقدت على والديا على شي بلانات ولكن بعد داكشي لي داروه على ودي عرفت شنو أنا بنسبة لهاد ولاد ناس أنا لي بقيت ليهم. لواليد سمعني تندوي هكذاك بحالا صرفقتيه معرف باش يجاوب لاح ليا لمخدة قاليا رتاح اولدي وخرج.. كنت عارفو مغاديش يشد من عندي فلوس وخا هكداك خاصني نعاونو سولت كمال على لخدمة لي قاليا ديال صيف قاليا أه غير دير بالك مع صحتك وقرايتك غتنجح وغادي نخليك تكلف بكلشي شفتي ديك لمرة غي سيمانة شحال خديتي فيها دبا بغيتك تقابل لمحل شي 3 شهر تقريبا لمهم ماشي وقتها دبا حفظ كول ليا لكتوبا بغيتي شي واحد يراجع معاك مرحبا عيط ليا.. أول إمتحان غندوزو مع قسمي تاني كاع لي دوزت درتهم غير بوحدي حيت كانو فاتوني لمهم كنت عارف غنشوف ختنى داك نهار منعرف كيفاش وعلاش بلوكات نمرتي ومسولات موالو من غير نهار قالولي بلي جات كتسول عليا فصبيطار لمهم مدخلني لواليد حتال لقسم واحد لولد عاوني بركت فوق طاولة لي لور فحال ديما غير دبا بركت تما باش نحط ضهري على لحيط يلاه شديت كواني لواليد حطلي ستيلواتي فوق طابلة وخرج لولاد ولبنات لي تيقراو معايا دارو بيا على سلامتك داوي معاهم حتى كتدخل ختنى بركات حدايا مدواتش حتى دخل لأستاذ قاليا على سلامتك وحط لينا لوراق درت داكشي لي حافظ وداكشي لي محافظش كاتبو فورقة وضاربو تحت لكبص ههههه وعسى أن تكرهوا شيئًا وهو خيرٌ لكم وعسى أن تحبوا شيئًا وهو شر لكم والله يعلم وأنتم لا تعلمون ديك لورقة ديال لإمتحان تقبتها لأستاذ متيشوفش فيا كاع ختنى مدواتش كاع كملت فنص ساعة قلت ليه تقدر تعيط على لوالد يخرجني قاليا أه خدا لورقة وعيط على لواليد دخل ختنى وهيا تدفعلي واحد لورقة دلوساخ مكتوب فيها تسناني برى لواليد عاوني طلعت فلكرسي خرجنا قلت ليه خليني هنا غادي نلحق علك دبا غنتسنى عشيري غيخرجني قاليا واخا بارك حدا لقسم وهيا تخرج ختنى قلت ليها أولا شكرآ على لورد ولكن لعطبمك حيت مسولتيش خرجت من شحال هادي ونمرتك بدلتيها ولا كيفاش؟ قالتي ورد؟ لا ماشي أنا؟ وهيا توريني لخاتم قالت ليا مهدي أنا غنتزوج هاد فصيف سمحلي.. بنت نااس لبارح كانت كي لصقة شنو تبدل دبا غتكون قالت مع راسها سيد كامل بياس من دوي الإحتياجات الخاصة(أول مرة نستخدم هاد لمصطلح) قلت ليها صافي قودي! كيفاش قودي مبغيتكش تقلق مني.. واحد لولد خرج من لقسم عيطتلو خويا خرجني معاك وهو يشدني مخرجني بصح وليت فحال شي أمانة شي مدخلني شي مخرجني(ميمشيش بالكم بعيد تاني) خرجني عند لواليد كتسنى فيا عند لباب وهو يباليا ساط مول رونج واقف كيتسنى فيها عند لباب دار فيا واحد شوفات فشكاال ديال شي واحد باغيها فك قلت للواليد ديني لكوميسارية قاليا علاش؟ قلت ليه راه عرفت لي ضربني تحركنا لكوميسارية قلت لواحد لبوليسي بلي شاك فخونا متيحملنيش نعتليه دار مريم حيت معارف سميت خونا ولا فين ساكن خليت ليهم نمرتي ورجعت لدار عيطت على كمال قلت ليه واش ختنى لي جابت لورد هيا لي وريتك فتصاور؟ قاليا أنا مشفتهاش لمدام لي خداتهم من عندهت قالتلي بلي جابتهم بنت زوينة قلت مع راسي راه غتكون غير ختنى واش ماشي هيا لي جابتهم؟ لا ماشي هيا يمكن صافي هيا غتزوج وفخبارك خونا لي غتزوج بيه يمكن هو لي ضربني يلاه رجعنا من عند لبوليس.. بعد شي يامات كنت كملت شهر باش خرجت من صبيطار حيدت لكبص من يدي تنتمشى شويا بلعكاز وصلات سيمانة ديال لوطني قبل يوماين تيعيطلي لبوليسي قاليا راه لقينا بحال طوموبيل لي عطيتينا وصفتي ولي ضرباتك عند سيد لي بلغتي عليه فلغراج ديال دارو فبوسكورة وشديناه.. كنت متأكد بلي هو ولكن على ود درية تفو على بنادم كي داير هاد نوع لمكلمن تيكون عقلهم صغير وشاابع أفلام كورية , لغد ليه جاو زوج ميمات غير شافتهم لواليدة فدرب قالتلي هادو 100% عائلتو باغينك تحيد شكوى ضدو قلت ليها خليهم يدخلو نشوفو شنو غيقولو وبصح دخلناهم رحبنا بيهم فحالا مكين والو باركين فصالون أنا فوق لكرسي وحدا منهم وهيا تنطق قالتلي ولدي جيت نشوف إلا كان ما يتصلح راه ولدي لي فلحبس وعندي غير هو وهادي ختي وبنتها مرات ولدي إن شاء الله عوالين نديرو لعرس فهاد صيف ولدي أنا متأكدة مدارش هادشي بلعاني وهو مبقالو والو ويتزوج نتا مغادي تربح والو إلا دخل هو للحبس قول شي تمن يقد يعوضك على شنو وقعلك وهكذا بزوجكم غادي تربحو.. لواليدة بدات كتسب فيها وحتى لواليد قاليها فلوس دنيا مكانتش غتعوضني على ودني , أنا لوحيد لي ضورها فدماغو شنو غادي نربح إلا دخل للحبس شي شهر وخرج ولعفو لملكي تدار غير للي بحالو يمكن يخرج بزربا أنا محتاج فلوس لواليد محتاج فلوس هادي هيا لفرصة نشوف ليه باش يخدم فشي حاجة ديالو قلت ليها 20 قالتلي ماشي بزاف؟ قلت للواليد خرج هاد ناش مبقى ميتقال وهيا تقوليا صافي صافي غدا غادي نجيبهم ليك وبصح لغد ليه صباح بكريي جابتهم 20 بريكة كاش منعرف شحال عاطيا لكوميسير شد ديك لورقة وهو يقطعها صافي بحالا كعما عارف شكون لي ضربني.. رجعنا لدار لواليد تيقوليا مكانش خاصك تاخد فلوس لكرامة.. قلت ليه رتاح شنو غنربح أنا إلا دخل هو للحبس وخرج هادشي وقعلي قبل لوطني بنهار غادي للإمتحان وأنا مرفوع حطولي لورقة وأنا نخوي دماغي خاص ننجح هاد لعام كلشي غيتقاد لحجابات خدامين ديك 3 أيام دوزتها غير بضحك تنخرج أنا لول خارج من لقسم بلعكاز كالعادة ديالي تنوقف فشي بلاصة بوحدي لمزيكا وتنروى مع حياتي شنو خاصني ندير كتنقلب على حد متنسول فحد ولكن بغيت غير نعرف شكون هاد خيتي لي جابتلي لورد لصبيطار وأنا مكندوي مع حد كملت لإمتحانات وقفت شويا ورجعت لدارنا معندي معامن ندوي ومبغيت نشوف حتى واحد بلأخص مريم بعد ما شديت دوك لفلوس.. رجعت للدار هزيت دوك لفلوس مديتهم للواليد خودلك شي طاكسي خدم بيه وهو يحلف ما ياخدهم من عندي قاليا دياولك هادو ومحملتكش تاخدهم داك نهار بحالا بعتي كرامتك وصحتك بفلوس واش نتا كامل ساوي 20 مليون؟ محبستكش حيت نتا تعرف مصلحتك فين كينا هاد لفلوس خليهم عندك دبا تحتاجهم أنا دويت مع واحد سيد وغادي نخدم بطاكسي ديالو هكذا حسن. مبغاش ياخدهم من عندي وأنا ماشي من داك نوع لي يحط فلوسو فلبنك ضربتهم فديك لمخدة لعجيبة شي نهار غادي يديها شي واحد ويهنيني منها يوقعلي بحال كبوطيي غير أنا مخدتييي.. كنت عارف راسي ناجح ولكن بغيت شي نقطة مزياانة باش نشوف شنو ندير مورا لباك لواليد من صغري وهو باغيني ندفع للبوليس وخا مداخلاش ليا هاد لخدمة لراسي ولكن كنت تنقول يمكن ندفع ليهم على ودو ولكن بعد هادشي لي وقع وهاد لعمليات ميمكنش يقبلوني مشيت حيدت لكبص من رجلي وخا مزال لحال شويا ولكن مرضني متقل عليا بغيت نتحرك نخرج , مشيت عند كمال قاليا بلي مبقالو والو ويمشي هو ومراتو لمشرملااا لبرى تاني وغيبقى صيف كامل تما أنا من ديك ساعة بديت خدام تاني مكين ميدار منقدرش نلعب كورة وعييت من نعاس ودار فاش كيبغي يسد تيوصلني حتال باب لدار حتى أنا بديت تندوز لبيرمي مكين ميدار حطو نتائج ضربتلهم لباك ب 13,50 صدمتهم مزال غير ضيعوني فتصحيح ولكن هانية كريم مشا هو ومراتو بقيت أنا لي مقابل ليه تاني لمحل ديالو وبنادم لي خدام خاص نجمع مصيريف نزيدو فجيبي للعام جاي مكينا لا خدمة لا والو خاصني ندير بالي مع قرايتي وننعس بحال ناس.. كل سيمانة تنضرب 5 الاف درهم فجيبي وتنصيفط ليه داكشي لي بقا قاليا بلي محتاج فلوس تما خديت داك لبيرمي من لمرة لولا صيف دايز طووب ديال بصح حتال واحد نهار قاليا مهدي صيفطليا كاع داكشي لي تما قلت ليه واش حتى لفلوس باش تندخلو سلعة جديدة؟ قاليا أه درت داكشي لي قاليا وخا معارفش أش شنو باغي يصنع يمكن يصيفط فلوس من بعد لغد ليه حتى تيباليا داخل للمحل وفنص ديال صيف كان قايلي بلي مغادي يرجع حتال لخر ديال صيف دخل مدواش بقى تيشرب تيشرب مقديتش نخليه وخا معارفش شنو وقع ليه خديت ليه سوارتو و وصلتو لدارو طلعتو لبيتو بزز صحة راحت فداكشي ومقديتش نخليه بوحدو ومراتو مكيناش تنصوني ليها تيقولو ليا بلي نمرة مخداماش بقيت بارك عندو حتال ديك 12 ديال صباح معارفش شنو واقع ولكن 100% خونا مخاصم هو وهيا وجدت فطور دوش وتنفيق فيه معارفش فين هو سيد شرب داكشي لي باقي فلمحل بوحدو وممخليش حتى باش نشريو شي حاجة تاني.. قلت ليه دوش وأجي عاود ليا مالك؟ خونا دخل لدوش شي نص ساعة تنسمعو تيبكي فلوس غلبات عليا ضحكة ولكن فاش بقى تيدمع قطعلي فقلبي بلأخص هو رجولة ومغاديش يبكي على أي حاجة خرج بارك تيفطر تنسول فيه مالك؟ شنو واقع فيناهيا لمدام؟ نوضتوها؟ قاليا متعاودش تجبد قدامي ديك خيتي وبدا تيعاود ليا ختنى دارتلو أكبر صبع فتاريخ لمغرب داتلو كاع فلوسو لسويسرا مخلاتش ليه حتى باش يخلص لوطيل فين كانو باركين عطاهم شي حوايج ديالو وفلوس باش خلاوه يخرج اوا هادي تخويرة عابرة للقارات دير خير ميطرا باس سيد رجع على لحديد قاليا بلي كان تيقاد فمحل أخر فنيس دبا معندو لا باش يكمل هداك ولا يخلص ضرائب ديال هدا وحتى فلوس سلعة باغي يبيع دارو وطوموبيل ولمحال ولكن عندو مشكل قديم ديال ضرائب غادي تحيد ليه دولة كتر من نص وغادي يولي لا دار لا والو ديك ساعة.. بقى فيا دوك لمشرملات تيكونو رجولة لدرجة كبييرة لقلب تيقصاح😂 خيبة شويا درية مبيناتنا والو غير لهضرة ومداتش من عندي حتى باش تنقي سنانها وبقى فيا لحال عاد زيد هدا لي داتلو مراتو خدمة حياتو منقدرش منعاونوش قلت ليه صبر أخويا أنا غنشوف باش نقدر نعاونك خرجت ديك ساعة للدار هزيت دوك لفلوس لي جامع عندي حتى ديك ل20 مخليتش شي حاجة ديتهم للمحل وعيطت على سيد لي موالف تيجيب ليه ديك سلعة مادلو لفلوس وبقاو فيا كنت باغي ندير بيهم شي حاجة زوينة وهانا واخد بيهم شراب.. فليل خدامين عادي كلشي موجود أنا غير بارك قدام لاكيص وتنحسب مغاديش يرجعولي فلوسي غادي نمشي نقتل مو وهو يدخل خونا شاف لقدية محركة وهو يتصدم قاليا منين جاتك فلوس؟ عاودت ليه لبلان ديال ل20 مليون ولفلوس لي بقاو كنت كنجمعهم معندي فاش نخسرهم خونا وهو يبدا يدمع تاني هههه سيد محطم خاصو غير علاش يدمع قلت ليه إوا أصاحبي راه صيف هدا لخدمة بضوبل وبنادم كاع تبلا بشراب راه لاموض دبا إلا مدرناش شي حاجة دبا وتسد لمحل معمرك ترجع كي كنتي و غتبقى دمع قدامي حياتك كاملا.. ساط وهو يعنقني وليت تنشك فيه ولا منهم دبصح لبكى وتعناق ولكن بصح ترجلت معاه ديك لوقت ولهضرة لي قلت ليه هيا لي كانت داك صيف داز زاهي خونا عندو عشران مغنين كل مرة وشكون تيجيب فسيمانة رجع ليا فلوسي تيقسم معايا داكشي لي تيطلع بنص فلول كان تيحسابلي بلي غير غيكمل ليا داكشي لي عطيتو وغيحبس ولكن لا قاليا كون خليتيني ديك لوقت كون راه مبقى عندي لا هاد لمحل لا دار لا..والو نص ديالك نتا مخدامش عندي نتا خدام معايا.. عرفتي ولا تيطلع لعاقة ديال بصح كمل لمحل لي داير ف فرنسا مع لبدية ديال لعام جمع حوايجو قاليا بلي غادي لتما باغي يقلب على ختنى وباغي يقابل لمحل ديالو تما وأنا لي غنتكلف بهذا من هنا للفوق صدمني ديال بصح أصلا أنا مبقيتش مهدي ديال شحال هادي وحتى عائلتي مبقاوش ناس دراوش دياش شحال هادي لواليد مبقاش محتاج يخدم ولا عاطيها غير لراحة وسياحة هو ولمدام بغيت نقول لواليدة.. كمال مشى لفرنسا وبقيت أنا مداخلاش ليا لدماغي نبقى خدام فهادشي حياتي كاملا بنادم غيبقى داوي تمد غير لشي برهوش 5 دراهم فزنقا تسمع مو كتقوليه رجع ليه فلوسو لمغاربة مقوديين تيحرمو ويحللو غير لي بغاو نفس سيدة كتخلي راجلها يخرج للخدمة وكتدخل سيكيريتي تيلعبو دار .لمهم دويت مع لواليد قاليا بنادم يمشي عند مو مكينش فيهم لي يعطيك درهم خدم على راسك وفنفس لوقت لقراية وهادشي لي درت لفاك ينادي على لأقل نحط فيه لباك ديالي لواليد شافلي واحد طوموبيل على قد لحال قالك باش متضربكش لعين وتطلق فيها يديك مزيان.. نهار لول فديك لجامعة بارك تنعمر شي وراق فواحد لونفي وهيا تباليا مريم باركا لقدام كتعمر نفس لوراق لي عندي وااع واش هاد خيتي تديرها بلعاني تيحسابلي غتدير شي معهد ولا غتكمل قرايتها برى تبعاتني لهنا تاني يا ربي غير تكون دايرا شي حاجة من غير لي متبع أنا على لأقل منجيوش فنفس لensemble غادي نغيرها أنا إلا جات معايا أصلا غتكون تزوجات دبا تسنيتها حتى كملات وخرجات عاد مشيت حطيت وراقيا خرجت لبرى لقيتها واقفة عند طوموبيل كتسنى فيا خرجت على برى كتباليا ختنى واقفة عند طوموبيل لي مزال مكملاتش عندي سيمانة كيفاش عرفاتها الله أعلم.. قالت ليا سلام مجاوبتهاش طلعت لطوموبيل يلاه غادي نتحرك وهيا تطلع حتى هيا..
_شنو؟
_وصلني معاك
_علاش خونا تعطل علك
_أه تعطل عليا هادشي لي باغي تعرف دبا وصلني معاك بغيت ندوي معاك
_تزوجتو؟
_أه شهر دبا
_وشنو باغا من عندي دبا؟
_والو غير توحشتك وبغيت ندويو شويا شنو كتدير كيفاش بقيتي...
معندي مندير ليها وصلتها معايا غادين قلت ليها منقدرش نحطك حدا داركم عندي خدمة خاص نمشي ليها سولاتني فين خدام سيدة بدات كتشري معايا لمعرفة تاني معطيتهاش راس لخيط خليتها داويا بوحدها دبا مزوجة وراجلها معندش مو لعقل لمرة جايا يقتلني قربت للخدمة ونزلتها مشيت للمحل شفت شنو طاري كلشي مزيان عاد رجعت لدار لوالد ولواليدة فحال ديما تيكونو داوين على لخوادري كيسمعوني دخلت تيبدلو لموضوع يمكن خاصنا نتحولو من هاد دار محدنا فيها معمرهم غادين ينساو داكشي لي وقع دري غيكون مات وشبع موت دبا وهوما مزالين تيقلبو عليه.. حتى أنا بصراحة مرة مرة كنسمع دقان تيحسابلي غير هو رجع تنطل من شرجم كتباليا غير شي جارة معندها ميدار جايا ترقب ناب مع لواليدة.. ومن فوق هاد لبلان كنفكر بزاااف فشكون هاد لبنت لي جابتلي لورد فاش كنت مريض وزوينة من لفوق أنا لبنت زوينة لوحيدة لي تنعرف ولمشكل لوحيدة لي شافت ديك لبنت لي جات لورد هيا مرات كمال لي داتلو فلوسو وهربات موحال واش تعاود ترجع لهنا.. رجعت لكورة فحال شحال هادي ولكن لمسة راحت فداكشي ورجلي ولات كتعطيني صداع ديال بصح انا كامل مبقيتش كيفاش كنت بزربا تنعيا نشاط راح راح زعما تعدا عليا خونا ديال بصح كنت أنا لي تنضحك على بنادم فكورة دبا مبقاوش باغين يعيطولي كيف خلاها بلال صحة إلا مشااات مشااا مولاهاااا لوكااان تكسب باانكة ومتخلفهااش تحية للي قراها بلحن أنا وكتبتها بلحن😂 رجعت لترويض ودوايات كنت قطعتهم شحال هادي هادشي علاش باقي مريض يمكن وليت راد بالي لصحتي تنفيق صباح تنجري شويا وليت تنغسل سناني كاع.. بدات لقراية وأنا نلصق لواليد باش نتحولو من ديك دار طبعا مقلتش ليه بلي باغي ندير هادشي باش ينساو لخوادري قلت ليه نتحولو لشي بلاصة قريبة للفاك ولخدمة مقدرش يقوليا لا دوينا مع واحد سمسار قالينا موجودة دار لي كتقلبو عليها دانا لواحد دار مبيهاش حسن من لي كنا فيها بدرجات ونقدر نخلصها دبا عادي.. هادشي لي درنا خليت لواليد يتكلف مبغاش يديرها فسميتو وحتى لواليدة قالك ديالك خودها حولنا ليها فراشنا وقاديناها تحولنا ليها بزز لواليدة غاديا بدموع.. بدات لقراية وداكشي لي خفت منو طحت فيه باش داخل لAmphi كتباليا ختنى باركة وحداها صحاباتها رجعت للور شاد تيليفون وممزكش ليها خرجت أنا لول نيشان للإدارة بغيت نبدل لensemble وباليا زبل عاامر بنادم غنبقى مصدع راسي مالي على حالتي غنبقى فنفس لغروب و مغندويش معاها رجعت للدار غير على رجليا قريبة لتما فلعشيا لقيت ختنى واقفة عند لباب تاني هيا وشي بنت غير قربت لباب وهيا تقول ليها شي حاجة لبنت لي كانت معاها دخلات لداخل بغيت ندير راسي مشفتهاش وندخل وهيا تعيط ليا مفهمتش مالها باغيا شي لعبة شنو هيا الله أعلم بغيت نقول أعود بالله من الشيطان الرجيم.. وقفت معاها قالت ليا فين هيا طوموبيل واش ماشي ديالك؟ قلت ليها لا ديالي غير دبا تحولنا قريب ممحتاجهاش قالتلي مزيان داخلين تنقلب فين داخلين وهيا تقوليا مهدي فكرني فنمرتك راه مشاتلي؟ قلت ليها معنديش ودخلنا بركت بركات حدايا وليني لصقة هادي حالة خاصة تزوجات عاد مبقاتش كتقشر جبدت تيليفون قدامها كنسركل وداوي مع كمال تيوري فيا لمحل لي فتح وهيا تدخل ديك لبنت لي كانت واقفة معاها عند لباب ختنى وهيا تعيط عليها شيماء شيماء أجي هنا تجمعو كاملين دوك لكليكة ديال لبنات حدايا درت تيليفون فجيبي وعاصر متبع مع داك لProf خونا طالقها بلفرونسي وأنا سطل فيها مزال لونغلي شويا.. حدايا ديك لبنت لي كانت واقفة مع مريم عند لباب سميتها شيماء مرة مرة كتدير راسها باغيا تشوف فمريم كتطلع وتهبط فيا أنا راه حشومي وخا هكذاك كملت ديك لحصة غير بزز وسطهم خرجنا غادي نتغدا وهيا تلحق عليا مريم قالتلي أجي تغدا معانا أنا راه وخا تكون قاتل ليا مي فاش تقول ليا أجي تاكل نجي ناكل ولكن دورتها فدماغي بلاتي بلاتي هادي يهودية مكتعرفش بينها وبين الله 100% غتدير ليا شي حاجة فهاد لغدا قلت ليها لا شكرآ دار قريبة غنمشي نتغدا تما وتحركت للدار باش خرجت تيباليا راجلها حبيبي فشيبي ساط مول رونج داخل تيدور عينيه تيقلب عليها كون مشيت معاها كون ناض شي صداع تاني.. نهار على نهار ختنى كتزيد تزعم عليا فحال لول أنا وهداك مزوجين غير فلوراق.. غنتطلقو.. مزال كنشوفك بحال لول.. نديرو وقت نحفظو؟ بنت ناس مزال مبديناش لقراية وكتقوليا نحفظو ختنى مقطرة مكانش يحسابلي هكدا فلول فطوبيس كانت كتبان ضريفة لحمد لله ملي دار سبب وسالينا.. واحد صباح مشيت بكري للمحل شفت شي سلعة دخلات حسبتها مشيت ضربة طلة على دار لقديمة شفتها راجع نيشان للفاك كتباليا ديك شيماء لي كتعمر مع مريم واقفة فطريق قدام ديك لبلاصة لي ساكنة فيها مريم غادي وتنقول نوقف منوقفش حتى فتها عاد وقفت رجعت عندها قلت ليها إلا كنتي غاديا لفاك نوصلك معايا وهيا تطلع لور مع لعلم لبلاصة لقدام خاوية غادين مسمعتش صوتها ختنى فسراا وكتبان رطييطبة وعينيها فالأرض لعكس ديال مريم تنضرب عليها من لمراية حتى كنت غنقلب مها ديك طوموبيل قربنا لفاك قلت ليها سمحيلي أختي نقدر نسولك قالتلي خود راحتك؟ واش كتجيك مريم شي حاجة؟ أه بنت خالتي ومرات خويا وأنا دبا مونسا خالتي حيت بقات بوحدها.. يلاه غادي نقوليها نزلي تقودي عليا وهو يباليا لبرهوش ديال خويا تصدمة طالع فوق ستانت غادي بجنب طوموبيل ديالي بقيت تنشوف فيه ممتيقش واش هو ولا كيشبه ليه ولا شبح ديالو ولا أنا هربلي لفريخ ممتيقش عينيا واش هدا هو ولا غير جابلي الله بقيت تنشوف فيه حتى تنضرب فواحد مول طاكسي واقف درية كانت باركة لور ولا راسها حدا رجليا نزلت من طوموبيل مبقاش تيباليا لا هو لا موطور مول داك طاكسي تيغوت فين كانو عينيك تنضرب على لبنت شيماء نزلات وغادا مكملا على رجليها وهاد مول طاكسي يهودي قلت ليه نعطيك باش تقاد داكشي لي تهرس راه ماشي شي حاجة ولكن معامن يهودي ديلمو جاو لبوليس صورو داكشي مشينا لكوميسارية.. هادشي كامل ومشيت نقرا عادي تبكي على مها وليت غادي فطريق وتندور فراسي لا يباليا تاني متأكد بلي هو هداك لي كان فوق لموطور منقدرش نقولها للواليد ولواليدة غيبداو يقلبو تاني وأنا بزز باش خليتهم نساو شويا.. أه فاش دخلت لفاك تلقات ليا مريم شنو وقعلك؟ ياك بيخير؟ ديك بنت خالتها قالتها ليها موقع والو لبنت موقع ليها والو؟ قالتلي لا بيخير. هادشي فشكل ديك لبنت كتشوف مرات خوها كتزلل على لكراش ديالها وعادي هاد لعائلة فشكل فعقلها غنبقى تابعهم غادي نلقا راسي داير قهوة مع فرعون وأبو لهب فجهنم.. تحولت لensemble أخر لقراية وداكشي متنعمر مع حتى والو حتى مريم مبقاتش كتدوي معايا يمكن فهمات راسها فاش تحولت نهار تندوزو فلفاك وفدار وفليل تنبقى فلخدمة كون ما هاد لخدمة يمكن مكنتش غادي ننجح ومزال عايشين كيف كنا ولا قل.. لبرهوش ديال لخوادري لي مزال ضارني فراسي بزاااف متأكد بلي شفتو ولكن علاش مرجعش لدار ومنين جاه داك لموطور.. بارك فلخدمة بحال ديما فلييل وهو يوصلني مساج c meriem bghit ndwi m3ak أنا مفهمت والو حتى قلت فهمات راسها قلت ليها ختي مريم راه كبرنا زعما ونتي تزوجتي ديري عقلك وهيا تصدمني قالتلي راه تطلقنا وقلت بلي خاصك تعرف.. وأنا مالي تزوجو تطلقو أنا خليني بعيد على هادشي نتي عارفا شنو وقعلي بسبابو لمرة أولا مزال تنوقف صباح غير بزز غتشريلي شي صداع معاه تاني غادي ندير فيه شيحاجة.. مهدي سمع سمع دبا ختو مشات لدارهم وصافي ماما وخالتي مبقاوش تيدويو مع بعضياتهم وأنا غادي نتحول نقرى معاك كلشي غادي يرجع كيف كان فلول.. دورتها فدماغي مزياان أصلا معندي ما نخسر بالعكس منها داكشي وفنفس لوقت نمرض خونا شويا تشوفني ختو مع مريم وتوصلها ليه قلت ليها صافي غدا نهزك من طريق شارع لي قدام داركم قالتلي واخا وبصح لغد ليه مشيتلها طلعات وهيا تلوح حنكها أنا مي ومكتبوسنيش صدمة غادين وداير ليها خاطرها كنعاود ليها على لخدمة قالت ليا هيا غتعرض عليا نشرب شي حاجة عندك.. ميحسابش ليا كتشرب ونعمة تربية قلت ليها واخا فلعشيا وبصح دخلنا بزوج لنفس لونفي تغدينا بزوج فلعشيا مشات معايا لدار بقات فطوموبيل طبعا حتى طلعت بدلت ومشينا عيطات على مها قالت ليها غنبات مع صاحبتي وأنا نضرب عليها بنص عين وايلي واش هادي معولا تبات دخلنا للمحل بركات فواحد طابلة قالت ليا Jacques Daniel وييع أغلى قرعة عندي شي ألف و300 درهم ولكن قلت هانية دبا نخرجها منها بتاني ولمتني جبت ليها شنو باغيا وهيا تبدا كاس مور كاس كملت خدمتي كلشي ناضي بنادم عاارف شنو غيدير ممحتاجينيش نوريهم شنو يديرو دخلت لصطوك تنحسب شي حوايج باش نمشي صافي نوصل هاد خيتي لدارهم غادي تعاشرني غادي تدير ليا سيزي طلعت لقيت واحد لكليان بارك معاها ختنى شاربة كان غيديها قلت ليه يهديك الله هيا قد بنتك وشاربة شافني وهو يغيرها خرجت ختنى غادين وهيا تقوليا متدينيش لدارنا لواليدة غادي تقتلني إلا دخلت عندها هكذا تنشوف فيها هادي ضربات داكشي كامل و مزال عاقلا على راسها فين غنديها لدارنا لقديمة غادي لدار ومعول علاش معول عيطت على لواليد قلت ليه راه مغنجيش هاد ليلة ودخلنا لدار نيشان لبيت مزال فيه ناموسية وأنا نسمع نشيد ديال ماهر زين فودني يا نبي سلام عليك ههههه معرفتش واش شي واحد فجيران طالقو ولا هادي علامة على شكل نشيد وأنا ندير يخ/بناقص طلع البدر علينا اعود بالله من الشيطان الرجيم حطيت ليها سوارت دار حداها باش تجيبهم معاها فصباح وغادي خارج مزال تنسمع يا نبي سلام عليك يا رسول سلااام عليك تنشوف فسقف صافي راه فهمت هانا نعلت شيطان و غادي راجع لدارنا خرجت يلاه طلعت لطوموبيل غنتحرك شعلت راديو شكون طالقين نفس سيد تيقول ما شاء الله ههههه زهر ديال لكلاب معجزة هادي غنكون من لمبشرين بالجنة غادي لدار وشيطان جعر عليا أنا وصلت لباب دار جديدة وهو مزال تيقوليا رجع أصاحبي رجع أخويا تا مخلي سيدة بوحدها ودار مفيهاش مانطة أااو راه لبرد.. طلعت لبيت صيفطتلها مساج بنت ناس غدا فاش تفيقي سورتي دار وجيبي ليا سوارت معاك , نعست وأنا فرحان أححح لجنة تنادي لغد ليه داخلين مع 8 ونص مجاتش حتال 10 بسيف لبنت عندها برميل ماشي كرش واقفين وهيا تمدلي سوارتي قالتلي واش مكتشربش؟ قلت ليها لا ومغاديش تعاودي تشربي لمهم عندي أنا فلمحل ديالي لا بقينا داوين وهيا تدوز ديك شيماء من قدامنا سلمات عليا و مدواتش مع مريم ومشات بقينا واقفين وهيا تقوليا مهدي عقلتي فاش سولتيني واش انا لي جبتلك لورد أه راه انا لي جبتو ليك وصيفطتو ليك معاها داك نهار حيت كنت تنوجد لعرسي.. كنت شاك فيها هيا قلت ليها خاصكم تصالحو بقات كتقوليا لا ولكن معامن غتصالحو هيا غتصالحو وغنقراو فنفس لensemble ونتوما عائلة وصحابات عيب حق الله عيب بقيت تنقرى عليها وهيا تقولي واخا مفهماتش بلي باغي نديرها طريق أصلا ختنى ضريفة وزوينة وبنت ناس على ما تيبان ليا حتال دبا وجابتلي لورد من لفوق وخا غير وصلاتو ولكن النية أسبق من الفعل تصالحو تاني داكشي عندهم زوين سمحي ليا الله يسامح كيتباوسو وتيبقاو رادين لبال من بعضياتهم لبقية حياتهم.. أنا إلا بغيت نطلب سماح من عشيري خاصني نخلص عليه فطور و غدا وعشا ونبوسلو راسو ولكن إلا سمحلك صافي راه سمحلك.. واقفين ب3 بنادم غيشوفني أيحسابلو واش أنا عنيبة هو انا عنيبة متافق معاكم ولكن شوهة لا إلا لكرامة وسمعة يا أعداء الإسلام واقف معاهم وهو يعيطلي كمال جاوبتو سلام سلام قاليا دوز لعندي لدار دبا.. وايلي إمتى رجعتي؟؟؟ قاليا غير ليوم أجي لعندي دبا بغيت نوريك شي حاجة قاليا غير ليوم أجي لعندي دبا بغيت نوريك شي حاجة وايلي أشنو باغي يوريني هدا ورجع بلاما يقولها ليا على لأقل نتلقا ليه فلمطار.. تحركت لعندو حل ليا لباب بقينا داوين كبرتي كي بقيتي.. قلت ليه شنو بغيتي توريني؟ وهو يقول ديك سلوى وهيا تخرج مراتو من لكوزينة صدمني قلت ليه ياك سرقاتلك فلوسك وهربات؟ قاليا راه رجعات شي زوج سيمانات دبا عرفات لخطأ لي دارت رجعاتلي لفلوس وكلشي تنشوف فختنى وهيا تحرك لعندي سلمات عليا قالتلي كيفاش بقيتي؟ مفهمت والو ختنا داتلو فلوس شويا رجعات تاني وهو بحال لبكرة سمح ليها قلت ليه نقد ندوي معاك بوحدنا طلعنا لسطح قلت ليه من نيتك؟ قاليا راه تنبغيها أساط وحتى هيا كون مكانتش تتبغيني كعما ترجعلي فلوسي مناقصاش منهم درهم.. هاد ساط نية مسكين نزلنا بارك معاهم كتوكلو بيدها وأنا تنشوف فيهم بنص عين ناري أش هاد زبل واش تنحلم كون كنت فبلاصتها كون راه من بلاد لبلاد دبا علاش رجعات الله أعلم زعما تكون بصح تتبغي خونا تنفكر وهيا تدوي معايا قالت ليا مهدي شكرآ على داكشي لي درتيه مع كمال كان يحسابلي غنرجع نلقاه باع كلشي وفات لحال باش نطلب سماح ولكن نتا عاونتيه يوقف على رجليه تاني من بين كاع صحابو وناس لي تيعرف نتا أخر واحد تخايلتو يدير هادشي ديال بصح شكرآ بزاااف نهار تحتاج شي حاجة مرحبا قاليا نفس لهضرة ديالها ودبا غنساو كاع هادشي كامل بحالا موقعش غادين نرجعو بحال لول.. قلت ليه ولمحل ديال نيس شكون مقابلو؟ أه راه بعتو غادي نوسع لي عندنا هنا ونبقاو فبلادنا حداك وحدا ناس لي تنعرفوهم.. مبقاش فيا لحال حيت غيرجع لنفس لمحل حتى ولفت نلعب دور ديال مولشي بالعكس مزيان ملي رجع يونسني شويا ويمشي معايا مرة مرة لفاك ونسركلو أما انا ديك لخدمة ولات عندي زايد ناقص نقدر من غدا نحبس جامع شويا دلفلوس ودار لي ساكنين فيها وطوموبيل لله يجعل لبركة.. باركين داوين شنو باغين يديرو من بعد خليتهم ومشيت لدار لواليد ولواليدة من شحال هادي متسركلناش خرجتهم معول غير على رضاهم وعلى الله , لغد ليه محرك على رجليا لفاك وصلت للباب تيباليا ساط مول رونج شداتني ضحكة فاش شفتو غادي داخل زعما مشفتوش وهو يعيط عليا قالي أجي ندوي معاك وقفت فجهة لاخرى ديال لباب لا أجي عندي نتا هههه بلانات ديال لبراهش قاليا أجي باراكة من تبرهيش قلت ليه هانتا نقسمو طريق نتلاقاو فنص😂😂 أنا غير باليا شاعل بغيت نزيد نطلعو نعصبو خونا وهو يجي لعندي قاليا بعد على مريم قلت ليه لباطل هدا راه هيا لي تابعاني ماشي أنا قاليا وختي متعاودش تدوي معاها ولا نسمعك هزيتيها شي نهار ولا وقفتو مع بعضياتكم راك عارف شنو غيوقعلك.. مزال مكملهاش ضربتو بديك رجل لي ضاراني لماتريال ديالو طلع ليه لحلاقم سيد ركع شي تصرفيقات مرادفين من شحال وأنا كنتسنى هاد نهار تيجرو فيا شي سيكيريتي ودراري معرفتش ختو منين خرجات حتى حطاتلي واحد تصرفيقة بقيت كنسمع ديك زنننننن ومع دالك لحس لفكاهي ديالي طالع داك نهار ودني فقدت لإحساس بيها ومع دالك قلت ليه ختك كتضرب حسن منك ترجل شويا وهيا تبقى تشوف فيا جراتو وخرجو حسيت براسي حيدت شي حاجة كبييرة على قلبي سيد كان خالعني داخل لونفي دخول لأبطال تتباليا مريم وأنا نبرك حداها قالتلي شكون مدابز؟ قلت ليها أنا وراجلك لقديم بقيت تنعاود ليها وطبعا غادي نزيد شويا ديال لفاخر خرجنا شادا فيا وغا تندورو من بلاصة لبلاصة وهيا توقف علينا شيماء قالت لمريم نتي ولله ما عندك علاش تحشمي نساي بلي كتعرفيني ولا تنجيك و نتا متعاودش تحط يدك على خويا ولا غتكون هضرة أخرى ديك ساعة.. قلت ليها ختي بردي خوك هو لي حط يدو عليا لول وإلا كنتي صرفقتيني قبيلا ومدويتش راه غير حيت بنت لمرة جايا غادي يكون حساب أخر حترمناك ومطلعيش بزااف تاني.. بقات كتطلع وتهبط فيا وخرجات لغد ليه مجاتش وحتى لي بعدو يمكن تحولات لشي بلاصة أخرى وليت قليل فاش تنمشي للخدمة وأصلا متنلقا مندير كمال ومراتو نهار كامل تما ومتناخدش شي حااجة فحال لول فاش كنت تناخد نص ديال داكشي لي تيطلع من واحد لمقام لمقام أخر تاني خوتنا بحالا تيقولو ليا فهم راسك وهادشي لي درت قلت منمشيش عندهم ونشوف واش غيعيطو عليا ولا لا خوتنا والو سيمانتين دازو ومعيطش ليا بحالا نساوني كان تيحسابلي عشراني زعما سرباية عيطو تيسولو فيا وبنادم لي درت معاه لمزيان لا وتيعجبوك بلسان لحلو داك نهار باركين تيصبغو فيا شكرآ شكرآ.. أودي بنادم مقود أصلا ولاو مشغولين موحال حتى واش عندهم وقت يولدو😇 فاش تندوز من تما تيباليا لمحل كبر تيوسعو فيه.. صراحة هوما راه خيرهم سابق دارو معايا رب ديال لمزيان فين كنت وفين وليت ومزال عندي فلوس ماشي معنديش خاص ندير شي حاجة شي مشروع شي لعبة محدي مزال عندي شي بركة غندير شي لعبة لراسي فلول كنت تنقول ندير شي محل بحال لي كنت خدام فيه ولكن خونا غيحساب ليه دايرها ضد فيه ولا شي لعبة وصعييب دير كليان ونتا جديد بقيت تنفكر وتنخمخم(هو سطاج لخر ديال تخمام) طاحت عليا واحد الفكرة مقاودا قلت مع راسي علاش مانديرش شي حاجة لي عمر شي حد دارها اولا عمرها كانت مشيت جنب البحر مريييح مقابل المواج و كانفكر اش ندير و جاني الملل كاع الافكار لي طاحو عليا كي والو مافيهم لا رباح لا تا زفتة كالس كانخمم تا بانت ليا بيرة مليوحة جيهت الصخر و تفكرت يامات البار تاني و كمال لي قلب عليا واخا كان كيكول عمرو يديرها مي الدنيا دوارة شوية ضربت ليا واحد الفكرة باسلة انني نتقدم بشي كونسيبط ديال شي بيرة عمرها كانت علاش مانصوبش بيرة حلوة و البورصونطاج د لالكول طالع عارف المغاربة اي حاجة فيها الدوخة كيموتو عليها بقيت كانبحث فهاد الضومين و نضور مابين لا برين و لاروس و لابلونض و لا نوار(غايعرفوهم غا السكايرية الصحاح😂) المهم بحث مزيان و عرفت شنو لازمني ندير تقدمت بداك الطلب لشلا شركات داز اشهر اللول و الشهر الثاني و باقي ماجاوبني حد حقدت على هاد العيشة تا قلت صافي تقادت و هي تعواج لفلوس غادا وتنقص غنتحنسر ديال بصح هاد لمرة طوموبيل مغنبقاش لاقي باش نحركها علاش يا سيدي ربي هاد الحالة يمكن هدا هو بلان ديال لحرام..دازت الايام مسركل فلافاك تا لكانة دلقراية مكايناش هزيت عيني كاتبان ليا مريم مع هزيت فيها عيني خنزرات دازت 2 دقايق كيوصلني ميساج وليت نقول يا ربي تكون غا مريم ع الله نشد معاها ستون شويا وبصح لقيتها هيا قالتلي اجي عندي حدا l'buvette بغيت ندوي معاك فشي حاجة غادي عند مريم كتسنى فيا حدا لbuvette منعرف شنو باغيا حتى هيا ومعامن كنتلاقا مع شيماء دازت من حدايا قلت ليها سلام مرجعاتهاش مبقيناش دوينا من نهار صلخت خوها..لمهم مشيت عند مريم سلام سلام معطلاتنيش نيشان دخلات فصلب الموضوع شوف أولد ناس منبقاوش هكدا محنا محسوبين على لخوت ولا على صحاب عزل دبا يمكن غنمشي نقرى على برى ولكن إلا كنتي نتا معايا فحال لول منقدرش نمشي لتما ونخليك بوحدك دبا بغيت نعرف.. دورتها فدماغي ختنى مفخبارهاش بلي وليت تنضرب 100 لحساب لدرهم قبل منخرجها من جيبي ولكن إلا مشات مغادي يبقى عندي معامن ندوي قلت ليه لي بالك بغيتي نرجعو نرجعو ولكن داكشي ديال شحال هادي نسايه وشراب وداكشي كامل.. قالت ليا واخا صافي صفحة جديدة وعنقاتني واحد سيكيريتي ضارب علينا من بعيد عينو فعيني أنا حشمت.. واقفين لبنت كتقولي على شنو غتبدل فيها سيدة تيحساب ليها غادين نتزوجو ولا منعرف ولكن بقيت جاري معاها ل10 فداكشي لي كتقول وأنا راه لواليد لي غيرجع يصرف عليا تاني من هنا لفوق . تنسمع تليفوني تيصوني نمرة ديال وحدة من دوك شركات لي صيفطتلهم لفكرة ديالي قلت لختنى سكتي وجاوبتو خونا باينا فرنسي من صوتو وطريقة باش تيدوي قلت ليه تقد تدوي بلونغلي فلبلاصة غيرها لونغلي قال ليا باللي الشركة سميتها بيترا(pietra) و هي شركة فرنسية باغا دير فرع هنا فالمغرب و عجباتو الفكرة ديالي و بغاني نطرق ليه فالتفاصيل شرحت لو مزيان علاش هاد البيرة ماتزادش فيها واحد البورصونطاج دلالكول لي وصل تال6℅ و نزيدو نكهة لي غادا تحيد المرورة ديال الشعير قال ليا بلي هاد الفكرة مزيانة و بغاني نحضر للمقر ديال الشركة السيمانة الجاية ناري تخويرة كحولية خماسية البرابر السيمانة الجاية واقيلا هادا كيتمركن كيغندير ليها و انا معندي تا باش نخلص الضو هاد الشهر القاضية محاكة شفت حتا عييت و قلت ليه سمحلي منقدرش نجي ماعنديش التكاليف د السفر حتا كنسمع واحد القهقهة كلاس ضحكة ديال مالين الفلوس كال ليا بالعبارة(dont worry it's on US) لي هي ماتخافش كولشي على حسابنا ناريييي بالروجولة يا ربي نكون غا كنحلم يا ربي واااااا التفاح ماقاداني فرحة خاصني نبدا نوجد قاليا شي شويا غتعيط ليك سكرتيرة ديالي وتصيفطلك فلوس باش تجي وختمها ب غنتشرفو بالخدمة معاك حسسني بلي غنولي شي لعبة من هنا لقدام.. كتقوليا مريم شكون هدا لي عيطلك؟ وشفتك كتدوي على شراب وتسافير أش هادشي؟ قلت ليها خلي حتى تجي وقتها ونقولك إلا صدقلي هاد لبلان غادي يتبدل كلشي.. رجعت ديك ساعة للدار مبقاتش راشقالي على لقراية وهيا تعيطلي ختنى لي خدامة معاها كتدوي بالعربية الفصحى أححح قالتلي واحد ليوماين وغتوصلك لConvocation باش تجي فلول ديال سيمانة لي جايا لهنا ولفلوس غادي يوصلك مساج فيه لكود سير خودهم.. قطعات ختنى كنت غنطير كتباليا غير لواليدة تنبوس فيها مفهمات والو و وخا نشرح ليها مغاديش تفهمني وهادي خدمة نقية واااع باغيني نمشي عندهم فنفس لوقت لي عندي إمتحانات ديال S1 ومعارفش إمتى غنرجع من تما ومحافظ والو هنا كان خاصني نعزل واش نمشي لتما ولا نقرا ولكن أصلا أنا مقاريش مقاريش ولازمني لفلوس.. بديت تنجمع حوايجي من ديك ساعة تيسولني لواليد فين غادي قلت ليه شي خدمة ف فرنسا بدا تيضحك قاليا شعند لمكلخ لي ولدك نتا من خدمة تما لواليدة فحال ديما نصير لوحيد كتقوليه لا تبارك الله مهدي دماغ بحال لموس فينما حطيتيه يدبح خارج ليا كلاش مع ديك 12 لواليد مدرى والو مسكين مضهصص منعرف أش عجبها فيه.. كمال من نهار رجعات مراتو مبقاش تفكرنا حتى بمساج زعما يقول نشوف داك لولد واش خاصاه شي لعبة ولا ندوي معاه سيد ولا مشغول حتى أنا محاشيتوش صافي إلا صدقاتلي هاد لخدمة غيولي هو يقلب عليا.. دوك ليوماين متحركتش من دار من غير إلا خرجت عند مريم.. وصلوني فلوس كما قالتلي ختنى شي 10 الاف درهم شديتهم فيديا وديجا شاد كتاار ولكن تما عرفتهم مكيتفلاوش باغين هاد لخدمة معايا مشيت لديك لمخدة كنت مخبي فيها شي بركة زعما إلا وقعاتلي شي حاجة بزربا تنقاد فوراقيا شنو غنلبس كيفاش غندوي شنو غنقول ولوقت معنديييش كاتبين ليا فدعوة لوقت بضبط لي خاصني نكون فيه فداك لإجتماع وبصح قاديت كلشي مريم مفخبارها والو ومعرفاتش علاش مبقيتش تنمشي لفاك قلت ليها غير مراشقاش ليا على لقراية وصافي عندي خدمة.. نهار غنمشي منبع لحنان كتوادع معايا بحالا غادي للحرب أما لواليد حاجة وحدة لي على لسانو "دير عقلك" وهاد دير عقلك راه ختاصر فيها بزااف ديال لهضرة+18 موصلني للمطار و مخلاش لواليدة تمشي معانا معرفتش علاش واحد شويا وهو يمد ليا باكية صغيرة ديال لCondoms قال ليا خود هادو وضرب وقيس على صحتك راك مزال مريض عاد فهمت علاش مخلاش لواليدة تجي معانا صدمني ديال بصح معرفت أش نقول ليه ومعمرو دوى معايا فهادشي ضربتهم فجيبي وسكت باش وقف جريت باليزتي وشديتها جريا وحدا قبل ميبدا ينصح فيا دوك نصائح وأصلا يلاه جبتها مع لوقت قد قد لواليدة عطلاتنا تنخوي فجيبي وأنا نجبد ديك لكريطينة حطيتها بنادم ورايا بقى تيدير فيا شي شوفات مقااودين كانو غيوليو مرجعين مي على ودها يقولك غيشوه بالمغرب غادين وتنعاود فديك لهضرة لي غنقول فدماغي خاصني نبان عارف شنو تنقول وتندير باش ميحاولوش يزربو عليا وصلت قالولي بلي غيتسناني شي واحد عند لباب بحال شي فيلم رجال الأعمال وداكشي لمهم معلينا غادي خارج حتى كتباليا واحد خيتي زويينة هازا سميتي فواحد لورقة كنت غنبدا نبكي والله حتى سميتي كنت غادي نصورها كونما خفت نولي زاير سيلون ديالهم من نهار لول وقفت عليها قلت ليها واش متأكدة من لإسم لي هازا قالتلي أه واش نتا؟ أه أنا هو قالتلي بلي هيا لي كانت دوات معايا داك نهار ومدات يدها باش تشد لباليزة وأنا نجرها وضفاك من نيتك راه جاي من لبلاد لي ختارعو فيها رييجال☺(لعنب زعما وداكشي) هاي هاي على داكشي غادين خارجين ختنى كتدوي بالعربية عادي كتسول فيا واش باغي نمشي لشي بلاصة قبل منمشيو لوطيل فين غنبقى حتى يوصل وقت لإجتماع قلت ليها لا مبغيتش نمشي لشي بلاصة بغيت نرتاح قالتلي واخا وصلاتني لوطيل مفركااع حتى هو طبعا كلشي على حسابهم طلعات معايا لبيت كتوري فيا دوش وتلفازا منين كتشعل ختنى سمعاتني جاي من أفريقيا تيحساب ليها مزال ساكنين فلخيام دوش عادي توريه ليا ولكن فاش وراتني تلفازا كيفاش كتشعل حتاقراتني أساط قالتلي غدا غنجي عندك مع ل10 باش نوصلك لإجتماع قلت ليها وخا خرجات بقيت تنطل من شرجم هادشي فشكل عندهم إلا صدقاتلي هاد لخدمة نجيب لواليدة تدوز هنا شي سيمانة وطبعا مغنجيبش لواليد مزال مزال عندي لباكية ديال داك لعجب لي عطاني يشوفها عندي شي واحد ياخد عليا نظرة خيبة جبدتها وأنا نلوحها من شرجم ودخلت لدوش دوش عندهم كبر من دارنا لقديمة خرجت على صوت دقان حليت لباب لقيت واحد خونا من خدمة لغرف وشنو شاد فيديه ديك لباكية ديال لcondoms قاليا طاحتلك هادي من شرجم مرڭت قلت ليه ماشي ديالي وهو يتبسم قاليا لا ديالك راه لقيناها تحت شومبر ديالك وشافوها خرجات من عندك خديتهم من عندو ومزدتش كلمة تا غا كرطونة لحتها مرجعينها ليا بدلائل خاصني نرجعها نعطيها معايا لمغرب دبا وأصلا مصاحب مع وحدة مطلقة غنحتاجهم🐸 يلاه طاحت فبالي وهيا تصيفطلي مساج فينك؟ قلت ليها أنا ففرنسا متيقاتنيش حتى صيفطتلها تصاور.. علاش مقلتيهاش ليا نمشي معاك وعلاش مشيتي؟ قلت ليها لبلان ديال سيد لي عيطلي قدامها ولبلان حتى خرجت لخدمة لي كنت فيها فلمحل ديال كمال ولكن دبا كلشي تبدل غندير شي حاجة ديالي.. ختنى حسيت بيها فرحاتلي من قلبها بقات حتى هيا كتقوليا ها كيفاش ندوي شنو نقول حتى داني نعاس لغد ليه طلعولب فطور حتال لبيت ومافطور ما والو جايبين ليا لحلوى وعصير مالني مريض لفطور إلا مكانش فيه لمسمن ولخبز وزيت زيتون وأتاي مغادي يدير معايا والو قلت لداك سيد عندكم زيت زيتون قاليا أه شنو بغيتيه؟ قلت ليه دير ليا شويا فطبسيل وشي قهوة وجيب لخبز أصاحبي جيب لخبز كتضحك عليا تشوف لواليدة شنو جايبلي تجيها سكتة قلبية قاليا واخا لي بغيتي خرج جاب ليا داكشي عاد حسيت براسي فاطر بحال بنادم بدلت حوايجي شي نص ساعة وأنا واقف قدام لمراية حتى جات ختنى غادين فديك طوموبيل ديالها يمكن سولتها واش خونا باغي هاد لخدمة ديالي ولا عندو زايد ناقص قالتلي مخاصنيش نقولك هادشي ولكن راه من نهار قرى لفكرة ديالك وهو داوي عليك خاص دبا غير نتا تافق معاه على نسبة ديال لأرباح ويمكن يقولك يعطيك 10% فلبدية إلا عرفتي كيفاش تدوي تقد توصلها حتال 15% ولى 20% قلت ليها شكرآ كنت شاك بلي تتبغيني دبا تأكدت أصلا تيموتو على لإفريقين ومتسولونيش علاش.. دخلنا لديك شركة طلعنا عند خونا تيفطر فلبيرو ديالو باش ميضيعش لوقت سلم عليا ويدو عامرة شكلاط تفو على بنادم بدا داوي بلونغلي بحال داك نهار قاليا بلي عاجباه لفكرة وبلي ديجا موجد فرع فلمغرب وباغيني أنا نتكلف بيه وغينتج داكشي لي باغي أنا وغادي ناخد 9% بديت تنضحك نفس لهضرة لي قالتلي سيدة قاليا مالك؟ قلت ليه 9% راه والو لفكرة ديالي راه جديدة ومتأكد بلي غادي تطلع بزربا فسوق يعني تندويو على صفقات معمر شركة ديالك دارتهم ونتا كتقوليا 9% منيتك؟ خونا دفع فطورو لجنب قلت ليك 9% راه مغادي تدخل نتا معايا بوالو شحال باغي نتا كاع 10% بقيت ساكت شويا لهضرة لي قلت قبيلا بصح يا نضرب يدي أنا ولا يحشيها هو قلت ليه بغيت 35% مزادش معايا كلمة قاليا سكرتيرة غادي توريك لباب إلا نسيتيه رجع منين جيتي قلت ليه شكرآ غادي خارج وخونا تيقوليا 11% لا 12% وأنا عاطيه بظهر وغادي لباب وصل ل20% كنت غادي نرجع نوافق ولكن واحد راس قاليا صبر معرفتي يزيد شي حاجة أخرى محسيت براسي حتى كنت تقريبا خارج من شركة باقي كنتسنى فيه يزيد شي 2% ويييع دبا مكين لا 1 لا 2 تنادم معايا لحال تناكت ديال بصح قصحت راسي كتر من لقياس ومجاتش نرجع عندو ولكن لا أي حاجة إلا نخسر لكرامة وشرف أمام أعداء الله غادي لشارع نشد شي طاكسي حتى تنسمع صوت ديك سكرتية كتقوليا إنتظر بالعربية😂 قالتلي رجع عندو منعرف شنو باغيك غادي راجع معايا دخلنا لعندو لبيرو تاني قالها قادي عقد أخر ديري فيه 35% وجيبي دفعة لأولى(لعروبن زعما) ختنى تصدمات أنا متيقتش وهادي خدمة نقية بركت وهو يجبد ليا واحد لقرعة ديال شراب وكاس واحد حطو قدامي قلت ليه أنا متنشربش بدا تيضحك قاليا حتى أنا لهربة ديما لي تيصيب لحاجة مكيستعملهاش جابتلنا ختنى شي وراق و ولاد ناس بلفرونسي مفهمت فيهم والو بانتلي غير ديك 35% وأنا نسني ينعل بو زلط.. بقيت داوي أنا وخونا قاليا بلي لفرع ديال شركة غيكون فجديدة وخاصني نبقى نمشي لتما مرة مرة قلت ليه وخا معنديش شي مشكل طوموبيل كينا مكينش شي مشكل سلم عليا ومدلي داك صاك فيه شي فلوس ونسخة ديال لعقد لي بيناتنا غادي خارج بزز رجليا مبقاوش قادين يهزوني من هنا لفوق غادي يولي مهدي أخر تاني دايز من حدا ديك سيدة سلمت عليها وهيا تقوليا واش بصح فعمرك 21 عام قلت ليها أه قالتلي كتبان كبير على عمرك معرفتش علاش قالتلي فحال هكداك يمكن ولات كتبغيني عادي لفلوس ديرها من بعد ونرجع ليها موصلاني لوطيل قالت ليا بقى هنا كمل هاد سيمانة وأنا نلوح ليها ديك معارف حتى بلاصة هنا ومعنديش مع لفرنسية قالت ليا إوا أنا عارفة لبلايص أححح سيدة راحت فداكشي سيدة باغيا تشري معايا معرفة قالتلي ديك بقى باش نخرجو بزوج بصواب مقديتش نقول لا وهيا هربااانة على تيتيز لي شفتو فحياتي كاملا بسنوات ضوئية سيدة لطاي عندها بحال لقرعة ديال FANTA نتمنى تكونو فهمتوني😂 متقدش تقول لا قلت ليها صافي أنا هنا هاد سيمانة وصلاتني لوطيل وطلعات معايا تاني ومعرفتش علاش قالت ليا بلي عندها 41 عام وييع قد مي وكتبان قدي يمكن قالتلي شحال فعمرها باش ميمشيش بالي بعيد تقنيا يرجع بالي من لبعيد حيت بالي مشا😂 خرجات وأنا نبدا نقز فوق داك سير بحال لڭور فاش تيكونو فرحانين داوي مع مريم قالتلي شنو وقع؟ قاليا راسي نجربها قلت ليها معجباتوش لفكرة دبا مبقى عندي والو فلوس لي كانو عندي شحال هادي خسرتهم باش خديت دار لي تحولنا ليها وطوموبيل وباش كنا عايشين كلشي تقلب عليا وحتى لإمتحانات مغاديش نقدر نجي ليهم... لمهم بينتلها بلي مكينش عندي شي مستقبل من هنا لقدام كنت متأكد بلي غتقوليا الله يعاونك وترجع لولد خالتها ولكن صدماتني فاش قالتلي رجع بعدا وغنديرو حل بزوج وبدات كتقوليا عندي شي فلوس مخليهم ليا بابا لله يرحمو وبزوجنا فهاد لمشكل ماشي نتا متقلقش.. دموع نزلو ديك ساعة ممتيقش واش هادي هيا بنت ناس لي تنعرف ولا مطلعاها عليا مقلتش ليها بلي غير تنكدب وصفقة نجحات قلت مع راسي خليها نشوف واش هاد لهضرة لي كتقول بصح ولا غير كتضحك عليا أححح لبغو تاني . لغد ليه طتعيطلي ديك سكرتيرة لميمة باش نخرجو قلت ليها مغاديش نقدر نخرج معاك قالتلي فين غادي جاوبتها أنا رايح فين أنا راجع تاني أنا مش حنساك ولا قلت انساني(عرفتي ديسك يلاه رجع قراه بلحن بس طالقو تنكنب عليه😂) غنرجع لبلادي منقدرش نبقى قالتلي واخا نعاودوها مرة أخرى راه غتبقى ديما من هنا لفوق قلت ليها إن شاء الله وقطعت غادي نرجع لمغرب فليل منقدرش نرجع معايا دوك لفلوس ديتهم لبنك وفليل غادي راجع لدارنا لواليدة معيطتش ليها تلقاها هرب ليها لفريخ هاد ليوماين وراجع فدرجة رجال الأعمال ينعل بو زلط محسيتش بلوقت حتى وصلنا وأنا نعيط للواليد يجي يوصلني قاليا تسناني شويا وهو يوصل طلعت معاه حاط حوايجي فلكراسى لي لور وانا بارك حداه غادين قاليا شنو بجتي ليا؟ قلت ليه وايلي منسيتكش بلاتي مديت يدي لباليزة جبدتليه داك لعجب ديالو لباكية مزال مسدودا تصدم😂 قلت ليه راه مشينا نخدمو أسمحمد واحد لخدمة لقيت شفتي داكشي لي كنت تندخل فصيف والو بالنسبة لهادشي لي جاي قاليا لله يعاونك أولدي درتي شي حاجة راه درتيها لراسك دير فبالك بلي واحد نهار غتمشي صحة ومغنبقاش أنا ومك ومكينش لي يعقل علك حتى بدرهم هادشي علاش خاص تضرب وتقيس فلمصروف ديالك حتى واحد معارف غدا شنو مخبي.. أول مرة يدوي معايا معقول دموعي سالو سيد قريب يموت واقيلا نزلنا لواليدة مشيت غير يوماين دارتلي بحالا مسافر هادي 20 عام بركنا قلت ليهم على لخدمة لي درت مع ديك شركة وبلي هاد 35% غادي تبدل لينا حياتنا ويمكن نتحولو لجديدة باش نقرب لخدمة لواليدة وهيا تقولي ولدي إلا كانت عندك خدمة نتا سير حنا غنبقاو هنا إلا رجع خوك وسول علينا فدرب لقديم غيصيفطوه هنا مخاصوش يلقا دار خاوية.. لواليدة معمرها غتنساه مزال مقلتش ليهم بلي شفتو داك نهار فوق لموطور طلعت لبيتي ننعس داير مع مريم غدا.. وهادشي لي وقع لغد ليه مشيت لعندها هزيتها وغادين تتقوليا يلاه لفاك نشوفو كيفاش ترجع تدوز لإمتحانات دياولك قلت ليها راه محافظ والو غير تنضيع وقتي تما.. مزال تنمتل عليها وهيا تحل صاكها جبداتلي واجد جورنال وسطو شي حاجة قالتلي هاك هادو وقفت فجنب جليت داك لعجب تيبانو ليا فلوس غير زرقات قالتلي عارفا بلي قلال ولكن لمهم مغاديش تبدا من 0 بقيت تنشوف فيها هاك فلوسك أبنت ناس راه كنت غير تنضحك معاك راه عجباتهم لفكرة ديالي وغادين يعطيوني 35% من لأرباح.. وهيا تقلق قالتلي كتجرب فيا وأنا متيقاش وباغيا نعاونك ونتا ونتا.. بزز باش سكتها قلت ليها بلي بالعكس غير تنضحك معاها وعارفها رجولة مغاديش تخليني محنسر مشينا تغدينا بزوج طبعا خلصنا من لفلوس لي هازا معاها😂 كيما قال لواليد ضرب وقيص تكايس على جيبك ولكن بروجولة لبنت وخا دايرا معايا شي حوابج خيبين شحال هادي ولكن عجبني لحال فاش جابتلي لفلوس لي فراس مالها وهيا عند بالها بلي مكينش كيفاش نرجعهم ليها دبا وخا نبغي ندير معاها شي حاجة مها ديجا شافتني نهار عطاوني لفلوس باش يخرج ولد ختها منعرف كيفاش غتشوف فيا من بعد داكشي.. رجعتها لدارهم وعيات معايا باغاني نشوف مها ولكن أنا منقدرش على لأقل دبا. رجعت لدار تنجمع حوابجي تاني خاصني نمشي نسافر تاني لجديدة باش نشوف داك لعجب ونشوف شنو تيديرو هاد ولاد ناس تما لغد ليه بقى لواليد تيقلب فطوموبيل قبل منخرج بيها هو لي تيفهم فهادشي , بغيتو يمشي معايا ولكن مكينش لي منقدروش نخليو لواليدة بوحدها ومبغاتش تمشي خليتهم وغادي من بلاصة لبلاصة غادي شاد طريق فليل ومعارفش فين غنبقر تما غنقلب على شي فندق ولى شي لعبة فهاد ليل وصلت مع ديك 3 ديال ليل مكين حتى مغربي تيدور وقفت حدا داك لمصنع لي غنخدم فيه نزلت لكرسي وأنا نعس فطوموبيل وطالق لمزيكا فقت صباح لقيت لباتري خاوي تخويرة كهربائية سانك سانك دبا فاش غنبغي نرجع خاص نقلب على بنادم يدفع معايا ولكن ماشي وقت طوموبيل دبا سديتها ودخلت لتما وقفني سيكيريتي قلت ليه أنا هو فلان ديجا قالو ليه بلي غادي نجي قاليا مرحبا اسي مهدي أححح خاص نولف هاد سي دبا داخل وبنادم تيسلم عليا بحالا صنعتلهم شي دوا دخلني لواحد لبيرو قلت ليه واش بداو لخدمة قاليا أه تيتسناو غير شي سلعة صبر تجي لمديرة هيا لي عارفة هادشي حسن مني وهيا لي قالت لينا بلي نتا غادي تجي واش تشرب شي حاجة قلت ليه لا شكرآ.. دفعت كبير وأنا راه باقي بلا فطور تنتسنى فلبيرو ديال لمديرة خاصني شي بيرو بحال هدا تا أنا باش تجي معايا ديك 35% وهيا تدخل ماشي شي وحدة كبييرة كيف كنت متخايلها تقادا ديالي سلمات عليا قالتلي واش فطرتي؟ معرفتش علاش سولاتني يمكن شافني سيكيريتي بايت فطوموبيل وقالها ليها.. عاودتلها بلي ملقيتش فين نبات وبقيت فطوموبيل يعني مفاطرش قالتلي حتى أنا نقدرو نفطرو بزوج إلا قبلتي علينا قلت ليها الله أودي وتؤجرين على هدا غادين وختنى كتدوي معايا باحتراام قالت ليا واش بصح عطاوك 35% قلت ليها أه متيقاتش حتى وريتها نسخة ديال لعقد قالتلي زعما تبارك الله علك أول مرة ليك فهادشي وتطيح عليك هاد لفكرة وتاخد هاد نسبة برافو والله أه بالمناسبة سميتي شيماء قالتلي سميتها شيماء قلت ليها مشرفين راه ديجا كتعرفي سميتي.. بقينا داوين على لخدمة جديدة وكيفاش غادين يخرجو لفكرة ديالي للواقع وصلنا لواحد لقهوة جابو كرواصة وشي لعيبات فطرنا بزوج بقينا باركين كتدوي ليا على راسها فين قرات دوك لقصص ديال لكفااح أخويا تنحس بحالا لواليدة كتعاودلي على حياتها مع لعلم لبنت مزال صغيرا غتكون كبر مني بعام كااع وفاش بدات كتدوي على لكفاح راه جبداتني بقيت تنعاود ليها على لقراية ولكسيدة وفين كنت وفين وليت لمهم ماشي من داك نوع لي تحس بالملل معاه مخليناش شي حاجة مدويناش عليها رجعنا لمصنع بقات كتسركل بيا فيه وهيا تجبدلي واحد لقرعة قالتلي خاص تكون نتا أول واحد يدوق لمنتوج ديالك قلت ليها وخا أنا مكنشربش ولكن هادي مناسبة خاصة كباتلي فكاس ديال أتاي☺ دقتها قلت ليها أول مرة نشرب هادشي معرفتش واش مزيانة قالت ليا شي حاجة بزااف.. دخلنا لبيرو ديالها قالتلي بلي غيديرو ليا بيرو تما نبقى نجي مرة فسيمانة ولا وقتما بغيت قلت ليها صافي درت داكشي علاش جاي غنوض نشد طريق وهيا تحلف عليا والله ما تمشي حتى تغدا نتا أول مرة تجي لعندنا وتمشي هكدا شنو غيقولو علينا.. مقديتش نقول ليها لا زربات عليا جبدات تيليفون عيطات على مها كتوجد فلغدا وبنت ناس ديال مريم ملقات إمتى تعيط عليا طفيت تيليفون بلاما نجاوبها ماشي وقتها دبا خرجت مع ديك سيدة بطوموبيلتها لدارهم كلشي ولا تيعاملني زوين وتيعرض عليا هادشي فشكل أسيدي دخلنا لدارهم خوها صغير عند لباب سلم عليا ودخلنا مها حتى هيا سلمت عليها باركين ومها ضرييفة وزويينة زين كيتقطر.. أسيدي بقينا مني منك منين نتا شحال فعمرك سيدة بقالها غير تاخد من عندي نسخة من الحالة المدنية كلينا وناس الله يعمرها دار داك طبسيل فيه شي 4 دجاجات بزز باش هزهم طبسيل وأنا متحتاجش تقوليا كول ولا متحشمش إلا فلماكلا واحد دجاجة قدامي نقيتها تبدل عليا لجو ديال لمدينة ولا فيا لموت دجوع سالينا حطو سفة وحياتي كااملا عمري مكليت سفة حتال داك نهار شهية ماشي غير تحلات.. تغدينا وغادين موصلاني لطوموبيلتي وشاد كرشي بيدي تنحس بيها غادي طرطق وصلاتني عيطت على سيكيريتي غير حركناها وهيا ديماري غادي راجع لدارنا لحمام راح فالكلام الفاحش غادي وأنا نشعل تيليفون ديك بنت ناس معيطالي 24 مرة غتكون واقعا شي حاجة عيطتلها الله يسمعنا خبار لخير شواقع قالتلي والو غير بغيت نشوفك توحشتك وبغيت نقولك شي حاجة قلت ليها وخا أنا كنت مسافر لجديدة وطفالي تيليفون من شارج غادي نجي لعندك نيشان نهزك من لبلاصة ديال ديما نصوني خرجي قالت ليا وخا.. غادي وكرشي كتقوليا لعطبمك حتال عند الله وتكون الهضرة وصلت لديك لبلاصة لقيتها ديجا واقفا وكتسنى فيا طلعات سلمات عليا وغادين قالت ليا توحشتك, هادي مالها وا بنت ناس شنو كنتي باغا تقولي ليا؟ قالتلي والو غير قلتلك هكداك باش تجي بزربا ليوم نبقاو بزوج حتال لفجر أنا بغيت مكرهتش ولكن خوكم شاابع دجاج وسفة قلت ليها راه ضاراني كرشي مرة أخرى ونعاودوها جبنا دورة ورجعتها لدارهم وحتى أنا مشيت لدارنا نيشان لحمام بقيت ساد عليا وشاد تيليفون تنكتب واحد لمساج لديك شركة بلي مشيت لمصنع وكدا ولواليد مرشقاتلو يدخل لحمام غير ديك ساعة بقى عاصر عليا شعب يعنكشك فكلشي حتى فبيت راحة ضربتها بنعسة لغد ليه ملقيتش لكرش ديال لبارح لمعدة عندي طحانة أخويا خطيرة غادي لحمام تاني دخلت دبا مرتاح تنضرب على واحد جاكيط ديال جلد معلقا فلحمام كعما رديت لبال معاها لبارح هزيتها وخرجت عندهم ديالمن هادي؟ قاليا لواليد اه ديالي نسيتها تما.. من نيتك ترخيها عليا وأنا ولدك هادي متجيكش نتا بعدا هاك لبسها قدامي سيد شدها مبغاتش تدخل ليه ليد وهو يغيرها قاليا جبتها ليك صبناتها مك ونساتها تما.. ولد ناس تا ريح من طليق درت يدي فلجيب لقيت باكيا ديال لغارو WINSTON ونتا جايب ليا لغارو مالني تنكمي أنا دوي زمطتك فهادي.. وايلي غارو شريتها قديمة يمكن مولاها نساه تما.. ولله ما كتحشم كتفسد ليا أخلاقي على فكرة زعما تربية راحت فداكشي وأصلا قلتي بفمك بلي لواليدة صبناتها كيدرتي ليها سكت متزيدش تكدب لواليدة ديالمن هادي؟ لواليدة مكتكدبش شافت فلواليد قالت ليه خاصو يعرف قالتلي هاديك راه ديال خوك.. والله حتى كنت تقريبا نسيتو كعما فكرت بلي غتكون ديالي أخر حاجة تطيح ليا فبالي ومن لفوق رجع لدار ومفخباريش يمكن تيخليني حتى نخرج وتيرجع قالت ليا لواليدة راه مزال مقلق منك شويا مباغيش يشوفك ولا تعرف بلي تيجي لعندنا ومقدرناش نقولو ليك هادشي داك لولد صغير لي كتعرف مشا هاد لي تيجي واحد أخر واتق من راسو وعارف شنو تيدير وتنسمع غير لواليدة ولواليد... داكشي لي قالتو ليا عليه خلاني نتخلع عليه كتر كاع منعرف فاش غيكون خاشي راسو هاد لبرهوش ومباغيش يشوفني من لفوق وصيتهم يجي لمرة جايا عيطو ليا بغيت ندوي عليه قالتلي لواليدة بلفرحات عليا أولدي باش يلاه تصالحو ويرجع كلشي كيف كان.. خليتهم وخارج بلا فطور بلا والو بحوايج ديال نعاس وسوارت طوموبيل بزطام وتيليفون بقى فيا لحال غير مبغيتش نبين ليهم خونا تيجي لداري من شحال هادي وهوما مخبين عليا بحالا أنا براني ولواليد حتى هو كنت غالط فيه صدق برهوش فعقليتو طبعا غنعيط على مريم بنت ناس وقتما عيطتلها كتقوليا أنا واجدة دوز لعندي وقفت تما كنتسنى فيها وهيا تباليا مها جايا معاها نارييي يخ وجهي مغاسلوش مخربق وحوايجي مبهدل وفيا جوع تفو على بلان منزلتش لعندهم حتى طلعو سلمت عليها خالتي بيخير؟ عرفاتني أنا هو لولد لي عطاوه فلوس باش تخرج ولد ختها ومقالت والو على هادشي قالتلي مريم غتمشي معانا ماما معندها متبقى دير فدار ليوم قلت ليها الله أودي مرحبا غادين ومها باركة حدايا كتطلع وتهبط فطوموبيل قلت ليها راه غير كنتعلم فيها أخالتي وهيا تشوف فيا ونتا مالك على هاد لحالة ناس فلحبس ومهلين فراسهم شفت فختنى ديك شوفة ديال سكتي مك ولا غندير ليها شي حاجة ففمها.. نعتولي واحد لمطعم مخلاونيش نطلب شنو باغي دواو مع سرباي بلفرونسي أنا مفهمت والو سيد مشا جابلي بحال داكشي لي عطاوني فداك لوطيل داك نهار أنا منقدش ناكل خبز وزيت قدام نسيبة لمستقبلية وفيها تبعصييييص ولكن هانية بنتها ولات رجولة شفتي وخا كلشي تبدل ولا رجولة معايا ولعراضات وضرارفات ولكن كتبقى ختنى ترجلات معايا فاش كان يحساب ليها معندي حتى ريال وكانت غتعطيني فلوس من جيبها.. وهيا تنطق مها قالت ليا شنو كتدير فحياتك دبا؟ ناري جبداتني طلقت ليها ديك ليقامة تخت كيف تيقولو كنت كنتسناها تسولني سيدة غير عرفاتني غادي نشد لعاقة ولات حنينة وضحوكية وفهاد لحظة تنسمع ديك مهدي؟ صوت مغريبش تندور وجهي كمال ومراتو باركين تيفطرو ورانا وييييع خارج مبهدل ليوم غادي نتلاقا بكاع بنادم لي متنحملش
كما قلت لوحيد لي تنعرف يقدر يعاوني معرفتش فين سافر مبقاش تيجي يشوف حتى لواليد ولواليدة لبوليس قالك مكينش دم معندنا منديرو منقدروش نبقاو مقابلينك بغيتي ندخلوك لحبس مرحبا مكينش لي غادي يقدر يدخل عندك.. بحال عادل إمام فواحد لفيلم نسيت على سميتو لمهم كملنا عادي لواليدة مفخبارها والو من هادشي تنبغي نخرج تيقوليا لواليد فين غادي ريح تكمش أمسخوط لواليدة ديك لعيبة ديال وينو منين نزل هاد لحكام.. مخلانيش نخرج ديك سيمانة حتال نهار لحد جا كمال هزني من قدام دار تيقوليا مالك غبرتي عاودتليه شنو وقع ولحصار لي داير ليا لواليد بقا مطلعها عليا غادين يغتالوك غيصيفطو ليك John Wick مشينا للمحل ديالو مزال مطلعها عليا زعما لحارس شخصي ديالي زكي شان(أححح هاد لفيلم♥) قلت ليه بلي غادي نخطب سيمانة جايا يمكن متيقش قاليا نمشي معاكم نهار لخطبة بروجولة تيعجبني داك لجو ومنها نشوف هاد بنت لعبد لي غتديلي خويا صغير قلت ليه مرحبا حتى أنا مكنتش حامل نمشي مع لواليدة ولواليد راس فراس بقى تيوصي فيا زعما لخبرة وهو مراتو داتلو كاع فلوسو كونما دارت عقلها ومكنتش حداه كون تلقاه نتاحر.. لمهم بعدا غيرنا لجو شويا رجعني لدار فليل مع ديك 2 وصرف تيباليا ضو فلكوزينة شاعل جيت نشوف لقيت لواليدة كتقاد فلحلوة لواليد تيدلك فلحلوة بحركة لا إرادية جبدت تيليفون صورتو لواليد عمرو غسل كاس اااو ولواليدة مصدق ليها والو طبعا غتمسحها فلواليد نتا سباب مكتدلكش مزيان سهرانين حتال 2 تيقادو فلفقاص وطالقين ليا ديك لكاسيطة ديال مجموعة سهام مني تنعقل على لواليد وهو تيطلقها فطاكسي راح طاكسي ولا تيطلقها فدار لمهم بقاو تيخربقو حتى ضربات 3 لواليدة طلع ليها دم قالت ليا حتى ناخدو حلوة من لباتيسري؟ قلت ليها هادشي لي باليا صافي حتى نمشيو وتقداي لي بغيتي لمهم وأخيرًا نعسو حطيت قدامي واحد شبكة تنضرب فلفقاص حتى داني نعاس وتخايل لغد ليه مع 11 كيفاش فايق بحالا مبربق منعرف شنو دايرين فداك لعجب دوشت عاد فقت لواليدة وصداعها محسيناش بديك سيمانة قلت ليها راه صاحبي غيمشي معانا قالت لك عرض عليه لدار نشوفوه بعدا زعما لا يكون شي شمكار غالطا فيا عيطتلها عليه حتى هو مقااود فصواب أنا مبقيتش تنعرفو قدام والديا تسمع غير خالتي عمي لواليد غير شافتو عقلات عليه من يامات صبيطار لكسيدة دازت عليا دوك لأيام ديال بصح كنت تنقول معمري أنرجع نتمشى على رجليا تاني ولكن لحمد لله أسيدي وصل نهار لي غنمشيو فيه عند دوك ناس وأنا محاملش نمشي باقي ممستعدش لهادشي مباغيش نتزوج دبا ولكن معامن غندوي لمهم شي تيقاد ليا وتيوريني شنو نقول زعما أنا كنت عايش فروسيا خرجنا أنا ولواليد ولواليدة وكمال وحتى مراتو وصلنا عند خوتنا باها ومها عند لباب ديك مرحبا وكدا دخلنا وشكون عندهم لقينا مريم ومها وسمعني زهر لكلاب كيفاش داير مدواوش وحتى ضحك دايرين ديك ضحكة صفرا لمهم بركنا أنا راه صافي ملي هاد خياتي كينين والله ما ندوي كمال مبقاش باغي يسكت داوي مع بات شيماء طلعو تيعرفو بعضياتهم باها تقريبا نفس لمجال ديال لخدمة هو لي تيجيب أغلبية سلعة وتيعاود يوزعها هنا طلع تيعرفني وتيعرف فاش ومعامن خدام لاح ليا ديك نتا عندك معارف فديك شركة دبا غادي يخصك تستافد منهم قلت ليه كيفاش قاليا من بعد ونشرح ليك دبا مغادينش ندويو فلخدمة ليوم عرس راه عاطيك بنتي لي عندي لواليد وهو يقوليه راه حتى حنا هاد لولد لي عندنا لواليدة وهيا تبدا تدمع تنقولو ليها علاش قالت ليك كون غير كان معانا خوك ليوم معرفتش لواليد علاش قال ديك لهضرة هكذاك بحالا بصح عندو غير أنا وقالها قدام لواليدة وخا عارفها قيسها فعينيها ومتجبدش ليها ولدها صغير لمهم غيرناها عرفتي داوي وتنحاول نشوف مريم واش كتشوف فيا وحشمان بضوبل أساط عرفتي شنو تخطب بنت خالة لكراش ديالك وتكون حاضرا كاع وحتى مها دارو ليا حبوبة داك نهار حطو لقصوص تناكل وتنقول هاد خوتنا غيكونو دايرين ليا شي سم ولا شي لعبة كيف والو لمهم ديك لهضرة ديالهم أنا غير ساكت معندي منقول وحشمان زعما دخلات ختنى ضاربة قفطان فصفر تفو على لون سمعنا لأذان وهيا تنوض تصلي لواليدة دارت فيا ديك شوفة ديال شوف أولد لعبد درية كي دايرا أنا لي مربية يهودي.. عرفتي تقريبا كلشي مشا يصلي ولا فلكوزينة بارك أنا وكمال ومراتو كتقوليا منعرف فين شايفا هاد لبنت قلت ليها فصبيطار يمكن قالت ليا أه والله هيا لي جابتلك لورد داك نهار وسولات عليك.. لمهم خوتنا تافقو على لوقت وكدا وغيرناها غادين راجعين لدار طالع مع كمال ومراتو غادي وتنخمم داك نهار كنت تنفكر بلي هاد ناس وافقو بزربا بحالا زربانين بحالا منعرف وكنت تنقول غتكون شي لعبة دبا طلع باها عارفني شكون وشركة لي خدام معاها وشحال تناخد وهو ينطق كمال قاليا مصادفة زوينة هادي باها راه يقدر يعاوني بزااف فلخدمة خديت نمرتو وحتى نتا إلا عاونتيه فشي حاجة ضرب على راسك مكيناش شي حاجة فابور ولا يطلق عليك ديك حنا عائلة قوليه أنا لواليد إلا خدمة معاه خاصني نتخلص.. وصلنا لدار نيشان لبيتي بدلت أخويا فديك لحرارة ديال صيف مكين لا زواج لا تا لعبة خويا داكشي حلاوتو لبرد لا ميمشيش بالك بعييد تاني زعما لمرقة وداكشي لمهم تخايل معايا كنت بارك معاهم ومعرفتش إمتى دارو باش نقادو لوراق ولعرس وكدا بالي مكانش معاهم كنتسنى مريم ولا مها يديرو شي تعليق والو صيفطت مساج لشيماء بنت ناس واش منيتش معيطا على مريم ومها ونتي عارفانا مزال مكملناش حتى سيمانة باش تفارقنا مبلان موالو حشمت منهم قالتلي راه حتى أنا محملتش راسي ولكن راك عارف ماما عيطاتلها راه ختها هاديك جايا متقدرش متجيبش بنتها معاها لحمد لله موقع والو.. شويا ديال لعنب راك عارف بغيت ندير فيها مقود لحت ليها زوج كلمات وهيا تندمني طلعات كتدوي ب 4 لغات سيدة كتنجح غير ب 15 ولفوق وكتصلي من لفوق كون كنت باها وجا شي واحد بحالي يخطبها غادي نقوليه ويييع لعطبمك دور قود متعاودش تدور بهاد دار وهادشي لي مرضني خوتنا سلام وعليكم السلام صافي خطب تزوج زربو عليا زربة مقااودة ولينا 24 ساعة على 24 داوين أساط مع خوكم معندو ميدار نهار تالت بعد لخطبة تيعيطلي باها سلام وعليكم سلام عمي صواب زعما كيدايرا خالتي لله يطولنا فعمركمهههه لمهم تعناب حلال على بحال هاد لعائلة قاليا إلا كان عندك لوقت نديرو شي قهيوة قلت ليه مرحبا وقتما بغيتي قاليا صافي فليل إن شاء الله تافقنا على واحد لقهوة وقطع 100% باغي يدوي معايا على ديك لخدمة سيد معطلنيش مع مشيت ندير مع باهت قهيوة هو لي عارض عليا منعرف فاش باغي يدوي معايا سولت بنتو قالتلي مفخبارهاش كاع بلي غنتلاقا ب باها لمهم بقيت كنتسنى فيه فديك لقهوة حتى جا سلام سلام دخلني بديك لهضرة ديال رتاحيتلك والديك لله يعمرها دار.. وأنا جاري معاه بأدب وهو يقوليا بالنسبة للخدمة لي كنا دوينا عليها قلت ليه مرحبا إلا كان فاش نعاون علاش لا قاليا بغيت نسني واحد لكونطرا مع ديك شركة لي راك خدام معاها ونتا لوحيد لي يقدر يعاوني.. سولتو أشمن عقد؟ قاليا باش نولي أنا لموزع لوحيد عندهم هنا.. خونا داخل سخون يحسابلي شي خدمة صغيرة صدق باغي يحشي يدو حتال لقاع قلت ليه ماشي بزاف شوية راه شركة كبيرة ومستحيل يوافقو قاليا هادشي علاش طحتيلي نتا فبالي وطبعا حنا عائلة دبا والعائلة كتعاون بعضياتها و هادشي ماشي فابور غادي تاخد لعمولة ديالك من هادشي.. قلت ليه وخا شنو مطلوب مني؟ قاليا تمشي معايا لتما شهر جاي إلا كنتي معايا نتا غادي يسهال كلشي مغنبقاوش نتسناو موعد وكدا وغتكون تتعرف لمدير لي تما.. مقديتش نقول ليه لا سيد نسيبي زعما وتيدوي بأدب تنسمع غير ولدي ولدي قلت ليه صافي إن شاء الله شهر جاي أنا معاك قاليا لله يرضي عليك شرب لقهوة ديالو بزربا قاليا نخليك تشرب قهوتك على خاطرك قلت ليه علاش متجيوش تعشاو عندنا ليلة قاليا واخا إن شاء الله ومشى عيطت على كمال قلت ليه خونا شنو باغي قاليا صافي نتا مخاسر والو منو ليهم.. رجعت لدار قلتها للواليدة بلي غادي يجيو عندنا ناس فليل مشات تقدى هيا ولواليد بارك تنطل من شرجم حتى تتوقف واحد jaguar قدام دار تنشوف شكون هاد ولد لعبد لي غادي يخلي طوموبيلتو قدام دارنا وشكون غادي ينزل لبرهوش ديال خويا وكين معاه شي واحد هو لي سايق طوموبيل بقى فيها غير خويا لي نزل شاف فيا بصدمة كنت غنطيح من شرجم قاليا حل حل لباب عرفتي شحاال ما شفتو محسيتش بداك دروج ولا طريق حتى كنت حدا لباب حليت معرفت ما نقول وحتى هو بقينا ساكتين تنطلع ونهبط فيه حطة لي ضارب ويييع ضارب صباط لي كنت شريت شحااال هادي وهرف ليا عليه لواليد وأنا لي كنت تنقول فين غبر شنو وصلو عندو مزال كيما خديتو شحاال دوز.. وهو ينطق قاليا وخا ندخل؟ قلت ليه دار دارك دخل وأنا نسد لباب وبقينا واقفين حدا لباب قلت ليه راه لواليدة ولواليد مكينينش برك تسناهم.. مجايش باش نشوفهم جاي على ودك.. ضرب يدو فجيبو مدلي سوارت سولتو ديالاش هادو؟ قاليا ديال داري سيرو ليها فيها سيكيريتي وصور حسن من هادي وعنداك تقول ليهم بلي أنا مولاها قولهم بلي ديالك.. قلت ليه شكرآ ولكن غير خلينا هنا أنا راد لباب على دارنا غير تهنى قاليا مهدي كون كانت شي حاجة تقدر ترد بالك عليها مكنتش غادي نجي من لخر ديال دنيا باش نقولك هادشي شد سوارت دار خاوية سير ليها ومبروك لخطوبة.. كيفاش سقتي لخبار؟ شنو واقع وشنو هادشي راه مبقاش تيجيني نعاس منين جاك هادشي كامل.. ماشي وقت هادشي زربان دبا سير لفين قلتلك ومدلي ورقة فيها عنوان وغادي خارج تبعتو لحت ليه ديك سمحلي على ود داك نهار قاليا أشمن نهار قالها وبواحد تبسيمة زعما راه نسيت كنت غادي نمشي نعنقو كونما طلع فطوموبيل نزل جاج قاليا ساط تهلا فلواليدة ولواليد وتحركو تنشوف فساط لي سايق بيه تيبان تبارك الله بقيت تنشوف فطوموبيل حتى مشات سديت لباب هاد لبرهوش ولا تيخلع ولات عندو واحد لهبة بحالا وهو يجي لواليد ولواليدة بحالا محققين على ساعة مع مع دخلو لقاوني عند لباب تيسولوني مالك واقف هنا خديت سوارت وخرجت غادي نشوف هاد دار تنشوف فديك لورقة لعوان مبعيدش بزااف شي 15 دقيقة تتباليا واحد لفيلا داير بيها شجر وسيكيرتي بانو ليا زوج غير عند لباب سلمت عليهم معرفتش شنو نقوليهم قلت ليه انا مهدي خويا عطاني هاد لعنوان ومعرفتش واش غالط ولا شنو؟ قاليا أه هو هدا راه قالينا بلي غادي تجي نتا ولواليدة ولواليد فين هوما؟ قلت ليه خويا جيت غير نتأكد نشوف واش هانية تدخلني نشوف قاليا ألله أودي دار داركم أسي مهدي دخل حل ليا لباب دخلت جردة قداش و لابيسين داكشي على حقو وطريقو وكاميرات وصور طالع كيما قاليا معرفتش كيفاش دار لهادشي لفيلا كيفاش مفرشا أنا وتخلعت تزعزعت مني شفت هادشي غادي خارج أغويا لدارنا وقفت على واحد سيكيريتي بديت تنجر ليه لسانو بشحال تقام هادشي.. واش عارف خويا منين جاتو فلوس باش دار هادشي قاليا سمحلي أنا خدام غير هنا معارف والو.. رجعت لدارنا لواليدة تنقاد فلعشا كتحمر دجاج لواليد تيقلي فبطاطا مبقى عندو ميدار مبقاش كيتفرق هو ولواليدة ليل نهار تفو صعيبة تعيش مع كوبل بحال هدا تتحس براسك حاسدهم وخا والديك تيصيفطوني نجيب زيتون جبتو قالك أاا هدا بالعضم سير جيب لي معندوش عضم تنحس بيهم محاملينش ديمي باغيني ندير بحال لأخر ونخوي ليهم دار.. لمهم وصلات وقيتا ديال لعشا كنتسناو فدوك ولاد ناس وتعطلو
كما قلتلكم لبارح وخا داير كلمة مع سيد باش نمشيو ليوم ولكن منقدرش نخلي خويا بوحدو باركين تنفطرو وانا نجبد تيليفون عيطت على نسيب صباح لخير صباح النور تيسول فيا واش واجد باش نمشيو قلت ليه منقدرش نمشي ليوم غير أجلها واحد سيمانة.. قاليا لااا ليوم لابدة دلير كلمة حتى أنا مع ناس وكلشي مقاد بلاما تخوي بيا.. بقى تيخطب عليا قلت ليه لعميم أنا منقدرش نمشي وقطعت منقدرش نشرح ليه علاش مغاديش نقدر نمشي غادي توصل لدار ولبرهوش مباغيهمش يعرفو هادشي.. سولني شكون هدا؟؟ قلت ليه فلان نسيبي بقى تيشوف فيا فشكل بحالا تيعرف خونا لمهم جبدتلو بيسي ديالو قاليا عندو شي خدمة ومبارطاجي ليه ل3G من تيليفون ديالي خونا دارليا نكحة تكتيكية من جميع الجوانب لمهم دخلت تنقلب ف ويكيبيديا على بحال هاد صدمة لي فيها قالك ديرلو خاطرو وحاول متخليهش بوحدو حتى يتقبل هادشي ولا يتشافى.. قطعت لويفي وهو يشوف فيا طلق أصاحبي واحد دقيقة أخرى قلت ليه نطلق ولكن عاود ليا شنو هادشي على لأقل قوليا كيفاش وصلتي لهاد لحالة كيفاش وقعلك.. طحت من دروج يلاه طلق ليا ولا خرج جيبلي تعبئة.. بقيت باغي نجر ليه لسانو والو مديت منو لا حق لا باطل تيقوليا طاح من دروج وأنا عاقل عليه فصغر طاح من فوق دار وناض صحة وسلام.. خبتلو تعبئة وما ياكل عطيتو نمرتي باش يعيط عليا وغادي لدار تلقاهم غادين يتسطاو وصلت كتباليا طوموبيل ديال نسيب قدام دار دخلت تيسولو فيا فين كنتي لواليد قاليا مكنتيش مع كمال راه دوينا معاه فين كنتي.. مالني دري صغير كانت عندي خدمة ومشيت درتها صافي بدلو لموضوع.. نسيب غير ساكت شفت فيه قلتلو سمحلي منقدرش نمشي مدواش معايا قاليا سيمانة جايا وخرج قالها وهو معصب.. معرفتش باش نجاوبهم وداك لمرض مباغي حتى واحد يعرف بلي هو رجع.. خرجت تاني نتقدالو شي حاجة لكوزينة خاوية لمهم ديتهم لدار تما تنحطهم لتحت باش يقدر يوصليهم وهو يقوليا مهدي سير جيب شي صاقطات وقفولا ركبهم لباب من لداخل وركبهم لتحت باش نقدر نوصليهم قلت ليه وخا علاش لا.. تنحس براسي وليت خدام عندو درت داكشي لي بغى بركنا كنتغداو قلت ليه شبالك نجيب شي حد يقابلك؟ قاليا علاش عيتي؟ قلتلو لا غير شي واحد تيفهم فهادشي غيكون حسن مني ويقابلك شنو خاصك وكدا.. فلبلاصة قاليا متجيب ليا حتى واحد قديتي تعاوني مرحبا مقديتيش خليني أنا قاد بشغلي.. رجعت لدار جمعت حوايجي قلت ليهم غادي مسافر عندي شي خدمة فداك لمصنع يوماين وغنرجع وهيا تنقز شيماء نمشي معاك قلت ليها ريحي فدارك معندك متمشي ديري هانا غادي وأنرجع بزربا.. مكين لا خدمة لا والو بغيت غير ندي لخوادري لعند شي إختصاصي ونشوف شنو غندير فهاد ليوماين لي تيحساب لدار بلي أنا مسافر فيهم.. تنسول نعتولي واحد خرجتو بلاما نقوليه فين غادين باش ميعكسش حتى فهادي هزيت تصاور وشي تحاليل لقيتهم مع حوايجو بلا خبارو معرفناش فين غادين حتى وصلنا لداك صبيطار مبغاش يدخل ولكن معامن دخلتو بزز منو مدخلو تيقوليا بلي غادي يسمع نفس لهضرة ومبقاوش عندو فلوس وكدا قلت ليه بغيت نسمع معاك ومتعاودش تقول فلوس نسيتي بلي عطيتيني دارك بلا ديال بلا زوج دبا سكتنا وخلي عندك أمل بقينا باركين حتى وصلات نوبتنا دخلنا عند طبيب عطيتو دوك لوراق وتحاليل علقهم فواحد لعيبة وبقى تيشوف فيهم واحد لمدة قاليه فكرني كيفاش وقعلك هادشي قلت ليه أنا تيقول بلي طاح من دروج وهو يبرك بقى طالقها علينا بلفرونسي وأنا راكم عارفين لبير وغطاه زليجة وهو يجاوبو لبرهوش ديال خويا بداو كيتناقشو صدمني ساط كان مكلخ كتر مني زعما كان يحسابلي أنا هو لواعي ديال لعائلة قلت لطبيب تقدر تدوي بلعربية أخويا حتى أنا بغيت نفهم قاليا أه علاش لا خوك هدا ياك؟ أه خويا شنو عندو؟ قاليا مهرس كتر من مرة على حساب هاد لوراق لي جبتولي هو ديجا بدا لعلاج على برى ولكن علاش مكملش لعلاج ديالو؟ سولتو واش يقدر يوقف هلى رجليه تاني؟؟ قاليا ماشي مستحيل ويقدر يكمل لعلاج ديالو هنا ونقدر نصيفطكم عند سيد صاحبي تيدير هادشي ديال ترويض وكين عمليات خاصو يديرهم ديال ترميم إلا موقفش من بعد هادشي كامل راه غيكون غير هو لي مباغيش يوقف.. خرجنا من عندو بعد ما عطاني لعنوان ديال هاد صاحبو لي تيدير ترويض راجعين لدار قلت ليه إمتى بغيتي تبدا تيقوليا حتى نضبر على لفلوس قلت ليه مالنا ماشي رجال ولا غتقولي فلوسك حرام راه متأكد بلي فلوسك حتى هوما ماشي حلال لمهم عتابرهم عطاهم ليك خوك لكبير ولا سلف رجعو وقتما بغيتي وكيما بغيتي لمهم ترجع توقف على ركابيك.. بقى ساكت وسكوت علامة رضا طلعتو لدار تنعيط على خونا ديال ترويض دويت مع سيدة لي خدامة معاه على لوقت ولفلوس قالتلي جيب لمريض ولوراق غدا قلت ليها إن شاء الله دخلت لدوش قاديتو تنعيط عليه خاشي راسو فداك لبيسي تاني كنت باغي نقول لواليدة ولواليد شنو واقع وبلي ولدهم فدار لولا وهو يصوني تيليفوني تنشوف نمرة غير ديال لبرهوش بحالا علمو الله جاوبتو قاليا باغي يمشي لشي بلاصة ومحتاجني نوصلو قلت ليه وخا صبر عليا شويا وغنجي.. بقيت تنكدب على دار باش نخرج غتقول دبا هاد زبل كبير وباقي فينما يبغي يخرج خاصو يدير قصة خويا نتا معندكش والديا وممزوجش تراه وليت تنكدب كتر ما كنتنفس خرجت لعندو تاني معرفتش فين باغي يمشي وضلام بدا تيطيح عاونتو لبس حوايج باينا فيهم ساوين عاونتو حسن وجهو وخرجنا تينعتلي حتى وصلنا لواحد لفيلا قاليا وقف بعيد شويا ونزلني وقفت هبطتو قاليا تسناني هنا بقيت مدابز معاه والو مبغاش يخليني نعاونو تم غادي تيدفع لكرسي بيديه بقيت كنتسنى فيه فطوموبيل تيبانو ليا دخلوه شي نص ساعة وأنا واقف حتى كنت غادي نمشي نسول عليه ولا نعيط على لبوليس وهو يتم خارج جا لعند طوموبيل ومعصب ديال بصح مبغاش يدوي معايا وحتى انا مبغيتش نقجر عليه وهو معصب تحركنا حتى قربنا لدار قاليا شفتك مسولتيش ليوم زعما قلت ليه مسكين لاش نسول وأنا عارفك مغاديش تجاوب.. طلعتو لدار قاليا هاد خونا لي مشيت عندو كان صاحبي فاش كانو لفلوس دبا بغيتو يعاونا على فلوس لعلاج معقلش عليا.. قلت ليه منيتك ممحتاجش لشي واحد أنا غادي نتكلف بكلشي واقيلا معارفش شحال تنطلع فشهر غادي تدير لعملية ديالك وكلشي غادي توقف على رجليك تاني ديال بصح كون غير خليتيني نقولها لواليد ولواليدة توحشوك وباغين يشوفوك وغادين يعاونونا؟ شوف قلت ليك فلول دير أي حاجة بغيتي إلا هادشي متقولش للواليدة ولواليد شنو واقع.. سولتو فاش كان خدام وكيفاش تزلط قاليا فاش غادي يجي لوقت غادي تعرف وفلوسك لي غادي تصرف عليا غيرجعولك.. خليتو ورجعت لدار لقيتهم نعسو لغد ليه تيسولو تاني تنقوليهم غير لخدمة وصافي.. باركين تنفطرو حتى تنسمعو دقان هدا بات شيماء دخل برك معانا عرفتو جاي باش يدوي فالخدمة تاني حيت داك نهار قلت ليه سيمانة ونمشيو باركين سيد غير قلت ليه منقدرش نمشي وهو يصخط ماشي فعايل ديال رجال فين هي لكلمة شاف فبنتو جمعي حوايجك ويلاه لداركم لواليد تيبرد فيه ولواليدة كتقوليا علاش مباغيش تمشي واش دايرها بلعاني كانت شي حاجة قولها دبا.. مقديت نقول ليهم والو ختنى طالبة عليها غير قاليها يلاه جمعات حوايجها وخرجو حتى أنا زايد ناقص كينا غير هيا خرجو بقا لواليد ولواليدة بديك لهضرة ديال تبعهم سير جيب مراتك قلت ليهم صافي خرجت بخاطرها ترجع بخاطرها هادشي كامل ومزال تنفطر لواليدة كتصرع لمسمن أصلا كل نفس ذائقة الموت تقدر تكون أخر مسمنة نضربها هادشي علاش مخاصنيش نضيعها.. كملت فطوري على خاطري وخرجت مشيت وصلت لبرهوش لداك صبيطار ديال ترويض خونا رجع خربقلي حياتي ديال بصح.. بارك كنتسنى فيه بداو من نهار لول خلص هادي خلص هادي دوزنا نص نهار غير تما حتى كملو خدمتهم معاه وضربو طلة على تحاليل فلخر دخلنا لعند لمدير قاليا بلي يقدر يبقى عندهم حتى يكمل لعلاج شي 3 شهر غيدير فيها شي 7 لعمليات معرفتش مال هاد لعائلة عندنا مع لعمليات عائلة غير مرقعينها وصافي قلت ليه صافي غادي يبقى وبالنسبة لفلوس خونا وهو يشد لبيسي بدا تيخربق تنسمعو تيدندن وتيحسب ولد ناس حشم يقرى رقم دور لينا لبيسي ديك لفلوس أنا معنديش وقاليا تقدر تخلص هادشي أقساط طبعا قلت ليه لا غادي نشوف كيفاش ندير وغادي نخلصوها دفعة وحدة غير خاصو يخرج من هنا على رجليه.. لمدير وهو يوقف قاليا تنضمن ليك هادشي غنديرو لي فجهدنا غدا غيلقا لغرفة ديالو واجدة ونبداو من غدا قلت ليه وخا.. خارجين ساط مدواش غادين لدار قلت ليه مالك أساط وليتي زيزون راه بزز باش غادين نقدو نرجعولك رجليك بدا تيضحك قاليا حامض القواد ولكن نتا عارف وأنا عارف بلي معندكش ديك لفلوس لي طلب خونا يلاه غنقوليه نتا راه معارفش شحال تندخل فشه.. وهو يقطعني راه عارف شحال كتدخل فشهر ولكن لفلوس لي جامع نتا حتال دبا مقاداكش.. وصلتو لدار ومشيت للبنك باش يقادو ليا شيك بالمبلغ داكشي لي عندي وما تبقى غادي نتسلفو من عندهم غادي يبقاو يقطعوه كل شهر من صالير ديالي ماشي بزااف شي عامين باش ميبقاو يتسالوني والو لمهم 24 ساعة عاد يقدو يعطيوني شيك إلا وقعلي شي مشكل مع شركة لي تعطيني ديك 35% غادي نتخور أكبر تخويرة فتاريخ ولكن هانية أصلا واحد سيدة دخلات لجنة فمشة غنديرو لخير فهاد لكلب حتى حنا على الله وعسى ندخلو عليه للجنة.. رجعت عندو لدار تنقاد ليه باش يتعشا وكدا قبل منرجع لدار قلت ليه متأكد طحتي من دروج؟ بقى ساكت شويا قاليا غنجاوبك على هاد سؤال وغادي تنساني متبقاش غير كتسول فيا خلي داكشي لأخر حتى نوقف على رجليا وغنشرح ليكم كاملين شنو وقع لمهم أنا مطحتش من دروج داك ساط لي كان سايق بيا طوموبيل داك نهار ولي جابلك لوراق تسنيهم نهار لعرس لاحني من هليكوبتر ومتسولش فين طحت ولا علاش.. بقيت تنشوف فيه واش بكامل قواك لعقلية؟ كتضحك ياك؟ قاليا داوي بصح ومغنجاوبك على والو عرفتي شنو بغيتي تعرف إوا زيد صبر وأتفهم قلت ليه وخا أسيدي هانا صابر.. خليتو وخرجت لدار دخلت لدار قالوليا بلي شيماء رجعت لدار وجابت حوايجها وبقات كتسنى فيك تعطلتي وكتعيطلك ونتا مباغيش تجاوبها وهيا تمشي تاني لدارهم دبا لبنت كتقول مع راسها هدا جاتو من الجنة وناس وييع نسيت تيليفون بقيت داير ليه mute ملي كنا فصبيطار بغيت نعيط ليها كتشدني لعلبة صوتية تنبغي نصيفط مساج والو بلوكاتني بغيت نخرج نمشي عندهم ولكن عياان ديال بصح دخلت لبيت غير حطيت راسي مشيت حتال لغد ليه فقت فطرت مقديتش نمشي لعندها تاني خاصني نوصل خويا لصبيطار وعاد نمشي نشوف واش يقدرو يعطيوني شيك ديالي عارف راسي قوتها معاها ولكن غير غنوصلو لتما غيرجع كلشي كيف كان غادي نبقى نمشي عندو ماارة مرة.. مشيت وصلتو لتما عاد مشيت جبت شيك عطيتو لمدير.. رجليه تقامو غلى من رجلين رونالدو😅 رجعت لدار جمعتها مخليناش شي لعيبة ديالو باش حتى إلا جا لواليد ولا لوالدة هنا ميجريوش مع شي حاجة.. رجعت لدار بارك تنفكر هاد لبرهوش تيقوليا لاحوه من هليكوبتر ديال بصح منعرف شنو دارليهم ولا تيدير معاهم وداك خونا لي لاحو هو لي جابلي وراق ديال دار سيد تيبان ضريف واقيلا مكانش خاصني نخلص ليه لعلاج واقيلا خاصو يبقى فلكرسي يلاه يدير عقلو شويا.. لواليدة ولواليد بقاو عاصرين عليا يلاه نجيبو لبنت مغاديش تلقا بحالها ونتا لي غالط.. مقديتش نقول لا خرجنا لعندهم وصلنا تندقو وهيا تحل سيدة لي خدامة عندهم قالت لينا مكينينش كتكدب وحنا تنشوفو فضو شاعل وطوموبيل قدام دار مقادينش حتى يديروها فلغراج قلت لواليد درنا لي علينا رجعتهم لدار ومشيت لعند كمال عاودتليه كلشي شنو وقع هاد شهر بتفاصيل بقى عليا طلع معاك لقالب ونتا مالك كون كنتي نتا لي باغي فلوس مغاديش يعقل علك.. لمهم ندمني ديال بصح وهيا هاديك مبقا عندي حتى ريال معرفتش كيفاش غادي نعدي حتال راس شهر رجعت لدار وهو يجي عندي سيكيريتي قاليا بلي شهر سالا 10 ايام هادي ومزال موصلاتهمش خلصتهم بصح لخوادري لي كان تيخلصهم راه تزلط كتر مني قلت ليه غير صبرو شويا أخويا واحد سيمانة وغاي تاخدو فلوسكم قاليا هانية إلا كانت شي حاجة تقدر تأجلها حتال شهر جاي قلت ليه لا غير سيمانة توصلني شي بركة وغادي تاخدو رزقكم من عندي من هنا ولفوق قاليا وخا ومشى دخلت لدار لفراش ولا تيجيني بارد وييع بحالا مدوزناش كتر من 22 عام زوافريا تنصيفط ليها مساج وا بنت ناس وجاوبي لعطبمك والو متيوصلوهاش بلوكاتني لغد ليه كتفيق فيا لواليدة نوض شوفليا ديالاش هاد لورقة عرفتي كتفيق فيا مع 8 وأنا ناعس معطل لموت لكحلا كتحل فشي جوى وهيا تمدلي ديك لورقة تنضرب كتباليا غير ديك divorce مجبدا قلت ليها لواليدة وايلي طلاق بعد هاد سنين كاملا ولحلوة(لعسل زعما ماشي) ولمرة غادين ديروها وي متافق معاك لواليد ماشي ديال زواج ولكن راه حتى نتي ماشي ديال زواج مغتلقاوش بحال بعضياتكم وغير صبرو على وجه لوليدات لي بيناتكم وهيا تحط ليا واحد لمسمنة فوجهي إوا محنى على فالك هادي راه ديالك أسي لفاهم ديك تصرفيقة بحالا غسلت وجهي بلما بارد فيقاتني تنضرب على سميتي وييع هادشي وصل لمحكة ختنى طالبة طلاق منقدرش نعيطليها مبلوكياني لمهم على ما فهمت خاصني نمشي لمحكمة بعد يوماين صدمة عرفتي جات فهاد لوقت معنديش فلوس مقودا عليا ديال بصح باركين تنفطرو داوين قالك باغين يمشيو عندهم تاني لدارهم قلت ليهم حتى أنا باغي نطلق أولاد ناس صافي سالينا زواج راه بالخاطر.. معندي فين نمشي خاصني نبقى فدار حتى نحل هاد لمشكل وتوصلني فلوس ديال هاد شهر يوماين وأنا بارك فدار وصل وقت لمحكمة بغيت نمشي بطوموبيل كتباليا غادي تضرب بيا نص فطريق وتسكت واكحة من شحاال مطلعت فطوبيس موصلت لتما حتى ضرني راسي هادشي فشكل لخبرة راحت فداكشي دخلت لتما مكين لا محامي لا والو غادي نطلقها والله يعاون واقف قدام لبيرو وهيا تجي هيا وباها ولمحامي لي خرجنا نهار صداع فمراكش بقاو واقفين بعاد وجا عندي لمحامي سلام سلام قاليا فين لمحامي قلت ليه معنديش أصلا جاي نسني حتى أنا موافق على هاد طلاق قاليا صافي غادي نساليو دبا ومدلي كارت ديالو نمرة قاليا إلا حتاجيتي محامي من هنا لفوق ديرني فبالك قلت ليه مرحبا درت لكارت فبزطامي ومشى دخلنا زربنا على لوراق خليتهم تما وخرجت غادي لدار وهوما يعيطولي لبنك راه وصلاتك فلوسك ديال كل شهر عرفتي فرحوني كنت محنسر ديال بصح شديت طاكسي حمر بالفرحة حطني تما يلاه خلصت سيكيريتي ودرت شي بركة فجيبي من تما لصبيطار عند لخوادري بغيت نشوفو قالو ليا راه عندو شي حصة ديال ترويض غادين يعلموه بلي مشيت عندو فاش يخرج.. عرفتي أساط رجعت لدار قلت لواليد فكرني فلوضو وصلاة شفت دموع تيخرجو من عينيه تيعيط على لواليدة أجي جري جري تسمعي قبل ميبدل رأي ديالو حتى هيا على لقرص جايا بيديها عاميرن عجينة قلت ليها بغيت نصلي وهيا تقوليه واش علامات لقيامة هادو ولا تنحلم دري غيموت هاد ليلة ديما تنسمع بحال هاد لقصص بنادم تيقرب يموت وتيطيح عليه لإيمان فدقة وحدة.. عرفتي شحال وأنا تنشرح ليهم بلي غير بغيت نصلي بحال ناس دبا هادي عائلة تعيش معاها.. لغد ليه كنفيق تاني على صوت لواليدة هاد لمرة كتجمع شي حوايج ديال شيماء بقاو عندنا فدار مدويتش معاها وهيا تقوليا مالك مصدوم واش باقي شي حوايج من غير هادو شيفور ديالهم قدام لباب وزربان قلت ليها رتاحي مالك خايفا من شي واحد تنفطر وهيا تجي لواليدة تاني قالت ليا ولدي كون غير شفتي كيفاش دير وترجع مع لبنت عرفتي والله ما غتلقى بحالها... تبخاتني ديال بصح قلت ليها راه طلقتها لبارح غير رتاحي دبا مبقات حتى حاجة كتجمعنا.. خرجت تنسركل دبصح مبقى عندي ميدار غير تندور مشيت لعند لخوادري متنلقا ميدار تنمشي نشوفو بدا تيدير دوك لعمليات ساط زربان باغي يوقف على رجليه تاني واحد نهار فايق صباح صهد ديال بصح خرجت مع لواليد نجيبو شي تقدية ومخلين لواليدة فدار رجعنا نزل لواليد دخلت معاه ديك تقدية وخرجت سيكيرتي تيعيطلي مشيت لعندو قاليا مهدي خويا بغيت نوريك شي حاجة لهربة قلت ليه مرحبا شنو هيا؟ وقفنا حدا لبيسي فين طالعين لكاميرات وهو يرجع وحدة منهم بلور حتى كتباليا شي لعبة كحلا طاحت من فوق دار لوسط لابيسين تخلعت فلول تيحسابلي شي واحد مات ولا شي جن ولا شبح هدا حتى كيباليا داك لعجب تيتحرك تيدرع تنحكر أجي هدا ماشي لخمار ديال لواليدة وييع مكانتش راشقالي وضحكت خونا بدا تيتركل بضحك قاليا راه ساعتين وأنا تنعاود فيه وتنموت بضحك كل مرة خويا مك مسطية عرفتي نلوحو هاد لفيديو فيوتيوب غادي يدير لبووز أصاحبي قلت ليه تديرها نكعا معاك راه لواليدة هاديك مسح هادشي دخلت لقيتها باركة كتقاد فديك تقدية فتلاجة لواليد فلبيت مشيت عندها ممشيتي حتى درتيها كون غرقتي دبا وبخمارك لا زعما الله ما قوي إيمانك دبا نقولها للواليد هاه نوريه لفيديو من لكاميرات واش تيحسابلك محطوطين ديكورهههه وهيا تبدا تطلب قلت ليها يلاه ديري ليا رفيسة مكليناهاش عامين هادي ملي وقع لمشكل وخرج لبرهوش دخويا مالنا حنا يهود قالت ليا راه كانت عزيزا عليه تنديرها على حسابو ولكن حتى دبا هيا لولا كون قلتيها ليا نصوبها لولدي بلا هاد تبزاز بقيت تنشوف فيها واحد 30 دقيقة بغيتي تقولي لإبتزاز ياك فهمتك فهمتك وديري واحد طبصيل بوحدو لواحد صاحبي مريض غنديه ليه كتري لعدس راه مزيان ليه لحديد
أححح شحاال زوين تكون شاد على بنادم شي حاجة لواليدة أول مرة تسمع لهضرتي فحياتها أول مرة نقصي رفيسة بدوك لمواصفات ديك لقصرية تستحق عليها جائزة نوبل للسلام شفتي ستيفن هوكينغ يقصي ديك رفيسة يولي يضرب للمغاربة سلام لمهم غادي لخوادري بداك طبسيل لي تيحساب للواليدة بلي غنديه لشي عشيري قبل منخرج لاحلي سيكيريتي لفيديو ديال لواليدة كتدير لقفز لحر و وقف عليه حتى مسحو.. وصلت لصبيطار بغيت ندخلو ليه مخلاونيش موقفاني واحد لفرملية شنو غادي تدخل ليه؟ وريتها طبصيل وهيا تقول ديك أوووف أش هاد ريحة لحلبة؟؟ بقيت تنشوف فيها هادي مالها بحالا شمات شي ريحة ماشي حتال لهيه كرهاتني فكرشي خوكم يلاه ضارب نص قصرية.. قلت ليها خويا لداخل غندخل ليه هادشي مصيفطاه ليه لواليدة وغادي نخرج بقات كتبعصص قلت ليها سيري عند لمدير قولي ليه مهدي لي عطاك ربع مليار سيمانة هادي باغي يدخل لخوه رفيسة بقات كتشوف فيا وتي سيري دخلات وبقيت واقف هاد زبل غادي يبرد باش دخلات وهيا تخرج كتجري أه اسي مهدي لغرفة 3 طابق تاني طلعت عندو مدخل ليه رفيسة بحالا مدخل ليه قنبولة وحق الله حتى قلبها سيكيريتي بعاشق خربقها كانت تحفة فنية ولات بحال عشا لكلاب(لمصطلحات) دخلت ليه داك لعجب مبقيتش عارف شنو هو بدا تيقصي تنعاود ليه داك طبصيل شحال شافو من طبيب وفرملية وسيكيريتي حتى وصل لعندو قاليا سكت لله يحفظك بلاما تعيفني غير خليني ناكل تيمضغ وأنا نجبد تليفون قلت شي حاجة خاصك تشوفها خدمتلو لفيديو ديال لواليدة قاليا شنو هدا جبتو سدادر من دار لقديمة؟ قلت ليه هدا ماشي سداري أولد ناس عمرك شفتي سداري تيدرع عاد جرى لعشرة بلي لواليدة هاديك داكشي لي كان ففمو تشتت فلبيت ولات فيا ريحة لحلبة بقينا باركين تنضحكو شويا حتى كمل وخرجت رجعت لدار قبل ما يخرج كاع ومكناش تنبركو ولا تندويو دبا ولينا تندويو شويا تنضحكو راجع لدار فرحان دخلت لدار قالتلي لواليدة بلي شيماء مشات تكمل قرايتها ففرنسا قلت ليها إمتى غادي تفهمي بلي صافي سالينا وا لواليدة صافي نسايها معرفتي تجي ما حسن منها نساي بقات عليا بديك لهضرة ديال لا ولبنت ضريفة وكدا غادين وتينساو بشويا بشويا ساط بدا لعمليات على رجليه بدا تيحركهم شويا ولكن ميقدرش يوقف عليهم كان لمدير قاليا بلي غادي يخصو 3 شهر باش يعاود يوقف على رجليه واحد نهار دخلت عندو لقيتو واقف حدا شرجم تيشوف منو صدمة ديال بصح ولا تيوقف شويا ولا كيتمشا لمدير ضرو خاطرو كان قال 3 شهر باش يوقف على رجليه خويا دارها فشهر وسيمانة مزال مكملش حتى لعمليات 7 لي عندو ولا تيجري ولكن مخلاوهش يخرج قالك خاصو يكملهم ويكمل لعلاج باش ميعاودوش يوقعو ليه شي مشاكل هو تيقوليا بلي صافي رجع بحال لول وحسن خوتنا مباغينش يطلقوه غير حيت غيخصهم يرجعو شي حاجة من ديك لفلوس قلت ليه متزربش مالنا شنو خاسرين معرفتي تكون هضرتهم بصح.. كنت تقريبا شهر باش سمعت شي لعبة على ختنى شيماء ديبلوكاتني رجع تيطلع ليا لكونط ديالها فيسبوك بنت لعبد لايحا ديك "لا تراقب شيئا لم يعد لك" هرب ليا ديال بصح شفتي لي تيبقاو يديرو بحال هاد لمساجات هوما لي مقصحين ديال بصح ومقادينش ينساو حتى أنا محاشيتهاش ليها خليتها بوحدها صراحة مرة مرة تندخل نضرب شي طلة لا تكون لايحا شي طوف مع شي واحد ولا حاجة هكذا أححح غنولي نسمع لحسني لحاجة مكتعرف بقيمتها حتى كتخور فيها ولكن دبصح ماشي لخاطري داكشي جا متابع غير حتى بان خويا تاني ولمشكل لي كان عندو ميقدرش يدخل حتى لحمام بوحدو مجاتش نخليه بوحدو ونمشي نسافر مع باها باش يربح على ضهري فلوس معرفتش هاد ناس شبغاوني ندير نتقسم على زوج راه ميمكنش ولكن حتى دبا بيخير لبرهوش صافي وقف على رجليه تاني رجعنا كتر من عشران ولا خوت ولينا تندويو فكلشي إلا فين كان ومنين جاب دوك لفلوس وفين مشاو ليه وهادي لحاجة لوحيدة لي مزال مبغاش يدوي معايا فيها قاليا بلي فاش غادي يخرج غنرجعو بزوجنا لدار عند لواليدة ولواليد وغيشرحلي وانرجعو كيف لول وكتر كاع دبا لوقت تبدلات قرب يكمل شهرين ديال لعلاج حتى تيفيقني تيليفوني مع 3 ديال ليل ولا قول صباح وي فيقني تيليفون مع 3 دليل نعاسي ولا خفيف تنشوف لقيتها نمرة ديال صبيطار تيعيطو ليا عرفت بلي شي حاجة وقعاتلو تيقولو ليا بلي ملقاوهش سيد غير حتى غبر حتى سيكيريتي مشافوهش فاش كان خارج لبست حوايجي ومشيت ديك ساعة لقيتهم مرونين دنيا تيقلبو عليه دخلت لبيت ملقيتش حوايجو تما مخلا والو وحتى سرير ديالو جمعو يعني خرج على خاطرو.. فلول كنت فكرت بلي غيديرها ولكن دبا بعد هادشي كامل لي درت معاه ولفلوس لي معنديش وحضرتها يهرب تاني بلاما يخلي حتى ورقة هادي مكنتش كنتسناها قلت لناس دصبيطار صافي لي عليكم درتوه.. مشيت لدار لي كنت مخليه فيها شحال هادي مكينش تما دبا تلقاه غادي راجع منين جا لله بوحدو لي عارف فين.. رجعت لدار معاودش جاني نعاس حسيت بشمتة ديال بصح خرجت على حياتي على ودو وهو غير وقف وصح هرب.. مبلان موالو متنجيش وتنقوليه برهوش غير هكذاك درت بحالا مشفتوش ومرجعش كاع بشويا بشويا فهمت بلي مكاعيش غير حيت مشى كاعي حيت مبقى عندي ميدار بعد ما مشى كنت غير تندور ونمشي عندو(كنتفلسف عميق زعما).. مزال كنتسنى فيه يطل ولا توقع شي حاجة يوصلوني شي فلوس ولا يعيطلي والو حتى بغيت نخلص سيكيريتي بقاو تيشوفو فيا لا راه وصلاتنا فلوسنا يوماين هادي عرفتو هو لي خلصهم بحال شحال هادي معرفتش كيفاش جاب لفلوس تاني وعلاش مخسرش عليا حتى مساج بحال لول تاني مكتوصلنا عليه حتى خبار من غير لفلوس لي كتوصل لدراري لي خدامين تما ديما رجعت تنمشي لعند كمال للبار ديالو ماشي على ود فلوس غير تنقتل معاه لوقت وصافي عرفتي شي حوايج كنت تنقول عمرني غنديرهم درتهم محسيتش براسي حتى وليت تنشرب بالمناسبة شراب لي صاوبت مقااود تنبقى فدار كمال حتال صباح عاد تنرجع لدارنا مخاصش لواليد ولا لواليدة يعرفو حيت يقدر يسكت لشي واحد فيهم لقلب واحد نهار يلاه دخلت لتما ومعامن كنتلاقاه بارك تما بمريم تاني مشفتهاش من شحااال ومعرفتش فين كانت غابرا وكيفاش تلاقينا وفين فلبلاصة لي بدا فيها كلشي بحالا كانت عارفاني رجعت تنعمر بزااف تما بركنا بزوج أول مرة تندويو فين مشيتي شنو وقع تانيا وصلتها لدار تالتة راك عارف هههه لمهم مبقيتش بوحدي
النهاية